1 Teketa minkuaakotaaꞌ taneꞌpuioꞌ ookarai aaꞌninge piristiꞌnuka-koo ovontung eeꞌnoko nantoong-koo pankeuꞌ urantanukai Jiisuuꞌ dupisiꞌaavaꞌnaang maneauꞌ. 2 Eeꞌnoko daiꞌaara teketa tee Pailatiꞌanko, tee-anko Roomaꞌnung ovoꞌmaꞌanko, tavoꞌauꞌ.

3 Teketa tenang teie Judasie tooka kompui Jiisuuꞌ tauraꞌpuuꞌnunge tee maneauꞌnaꞌ oovura orarunsiaruꞌ. Eeꞌnoko orarunsiarara teing mooniꞌ silivaꞌnanka beenaumo kivora-nuri bera torovuuꞌ piristiꞌ pankenanka-koo eeꞌnoko nantoong-koo pankenuka-anko aaꞌpuma, 4 “Bakei orakaꞌ nkomarieeng! Tee naning orararopa kare-nupoong-koo tauraꞌpansieeng tavaavaꞌnaang.” Eeꞌnoko teinge pankenankai makuꞌaama aaꞌpauꞌ, “Tee tee kapooꞌ dakaang, niiꞌ tee-koo dake mankiꞌantameriaukaꞌnung.” 5 Teketa Judasie mooniꞌ teꞌ dootuuꞌnava pankava-koo kuung duaꞌura tenkenuuꞌ. Teketa bera keniꞌaruꞌ. 6 Teketa teinge piristiꞌkoo pankenankai teing mooniꞌnanka teka ukuaara aaꞌpauꞌ, “Aung tee boto-koo eeꞌ oroꞌ orokoari otong teꞌ meepoꞌ mooniꞌ koreꞌdoma siꞌkoo tee tooka-koong deemparako.” 7 Teketa teinge narung naning utau taꞌnang bakaang kansiꞌ mooꞌkoo kara naroompauꞌ nantoong Juꞌdeeaing teꞌ dakoꞌaarimaatooꞌnaang. 8 Eeꞌnoko teeꞌkoo eeꞌnaꞌkoo tevoraꞌ kansiꞌnavoraꞌ miring tookanavoraꞌ tampaamaung bera eꞌmung doonko basinooꞌ. 9 Eeꞌnoko teeꞌ nkoarioꞌ tee kara teie Jeremaiaꞌke nakaronarai minkuvuuꞌnung dupearuꞌ Daari Meekung-koo aaꞌpuuꞌnooꞌka,

11 Enang napoꞌ tee Jiisuuꞌ tee-anko ovoꞌmaꞌanko donkong-antavaioꞌ niaꞌuma aaꞌpuuꞌ tee, “Daꞌ ee tee Juꞌnupoong biikaang daurarong?” Jiisuuꞌke makuꞌuma aaꞌpuuꞌ, “Teeꞌ nariꞌ minkueinaꞌ oꞌnong.” 12 Teketa teinge pankenankai piristiꞌnuka-koo eeꞌnoko nantoong-koo daang tuumpiaako kasivuaꞌ karoarukoꞌ. 13 Teketa Pailatiꞌke niaꞌuma aaꞌpuuꞌ, “Dake ee taaraveaꞌ otong kapooꞌ mmauꞌnanka-koo tuumpiraamaang daꞌ?” 14 Teka Jiisuuꞌke niiꞌnauꞌ kapooꞌnauꞌkoo makuꞌuriaꞌ. Teeꞌkoo tee ovoꞌmaꞌ aaꞌnaꞌ taꞌninuuꞌ.

15 Tenang tee teke narung aarumo ovoꞌmaꞌke nkovukoꞌnung eeꞌ oroꞌ: Ookara mareꞌ kante-koo Taamang Baariꞌkoong˜ nkoaako tee narung naning kiimata-nupoong-koo simpiriꞌantaevurikoꞌ nantoong karikaꞌ piavorokoꞌnung. 16 Eeꞌnoko tenang eeꞌnang teke tee narung naning orara, ookarai noruꞌaakoꞌnung miring Barabas kiimata-nava-koo otokoꞌ. 17 Teeꞌkoo tenang nantoong karinga naroꞌaririoꞌ Pailatiꞌke niaꞌurima aaꞌpuruꞌ teing, “Anaanka-koo arera ninge simpiriꞌanta-koo piarorimang, tee Barabas aiꞌ tee Jiisuuꞌ, tee Pakoꞌpariꞌniiꞌ tampaamaung?” 18 Teka eeꞌ noruꞌui, teinge tee Jiisuuꞌ mamairo-ita tee-anko tavoꞌauꞌnung.

19 Teketa tenang Pailatiꞌ teke bakanooꞌke baꞌnanui kara simpeꞌdomai baꞌnanuioꞌ baꞌaang botoarioꞌ narung kara tee-anko poꞌantavauꞌ eeꞌ minku, “Tee naning kapooꞌ orararopa dake tokoonaꞌ nkoveaukaꞌ, aiꞌ ninge tee eꞌmung tee-koo noone ooamira domang aaꞌnaꞌ mankiꞌmoi oꞌnoing.” 20 Teka teinge piristiꞌnuka-koo eeꞌnoko nantoong-koo pankenankai dera-antavaarikoꞌ ookara nantoonge Barabas bake-antavuma Jiisuuꞌ dupisiꞌantavuaing tampaavaꞌnaang. 21 Teketa teie ovoꞌmaꞌke aaꞌpuuꞌ, “Anaanka-koo naninka-koo baa arera diiꞌke bake-anta-koo piarori otong?” Teinge makuꞌaama aaꞌpauꞌ, “Tee Barabas.” 22 Teketa Pailatiꞌke nantoong niaꞌurima aaꞌpuuꞌ, “Teka tee Jiisuuꞌ, tee Pakoꞌpariꞌniiꞌ tampaamaung, arekeeꞌ nkoamaꞌnaang?” Teinge ookarai makuꞌaama aaꞌpauꞌ, “Aaꞌbarataꞌkoo taakaveaing tee.” 23 Pailatiꞌke makuꞌurima aaꞌpuuꞌ, “Aming-koo, aiꞌ kapooꞌ orara aming nkovuing teie?” Teka teinge napoꞌ baruꞌ aaꞌnaꞌ bokiaama aaꞌpauꞌ, “Aaꞌbarataꞌkoo taakaveaing tee.”

24 Teketa tenang Pailatiꞌke tamung kariarakoꞌnung noruꞌarara eeꞌnoko nantoonge karakarare tutumpaioꞌ teie ntong nkavura bireng duuꞌparuꞌ teing-koo karikaꞌkoo uroꞌkanooꞌke aaꞌpuma, “Ning tee kapooꞌ oꞌnoaꞌ, aung naning bakaang ereng ning-koo biromparavaukaꞌnunge, kapooꞌ diiꞌ diikaang.” 25 Eeꞌnoko ookara nantoonge makuꞌaama aaꞌpauꞌ, “Makosi, bakaang ereng niiꞌkoo biromparavaing eeꞌnoko ookara-koo niurukaaꞌkoo.” 26 Teketa teie Barabasi simpiriꞌantavevuruꞌ. Teka teie Jiisuuꞌ muraꞌaavaꞌnaang botovuruꞌ Pailatiꞌke, eeꞌnoko damaꞌke aaꞌbarataꞌkoo taakavaavaꞌnaang botovuruꞌ.

27 Teketa tenang ovoꞌmaꞌ bakaning piatooronukai Jiisuuꞌ ovoꞌmaꞌ bakanava-koo beꞌantavauꞌ, eeꞌnoko ookara piatooronukai teka tapoꞌeera koroauꞌ tee eeꞌ akapeuꞌaavaꞌnaang: 28 Teinge bakaning mononopaꞌnanka kiruꞌaara napoꞌ mononopaꞌ urumpumaung dauraronuka biikaang-pinaꞌ oroꞌ kurumpauꞌ tee-koo. 29 Teketa baakopo tooꞌmurintaaꞌpoꞌnung dauraronuka biikaang-pinaꞌ kaamaum paara tee-koo boreꞌkoo kurumpauꞌ. Eeꞌnoko banaꞌ kong-antavauꞌ tee-koo bireng-koo tampavine-koo eeꞌnoko tee-koo uroꞌkanooꞌ kinkinaakoꞌ aaꞌpaama, “Tampara masikung, Daurarong Juꞌnupoong Biikaang!” 30 Eeꞌnoko teinge tutupaaꞌaama banaꞌ pariꞌaama amutemuꞌke boreꞌkoo muraꞌaakoꞌ teie.

31 Teketa akapeuꞌaakotaaꞌ tee mononopaꞌ urung kiruꞌauꞌ, teketa tee bakaang masikung mononopaꞌ kurumpauꞌ tee-koo. Teketa aaꞌbarataꞌkoo taakavaavaꞌnaang beꞌantavauꞌ. 32 Teketa beroma naning narung kuneꞌauꞌ Sairini-nung miring Saimoniꞌ, eeꞌnoko teinge tee etuauꞌ tee teie aaꞌbarataꞌ nkaevuuꞌnaang. 33 Teketa Kolokataꞌ tampaamanooꞌ basi-antavauꞌ, miruꞌnooꞌ Makupiꞌnooꞌ. 34 Eeꞌnoko teka teꞌ basiarira teinge Jiisuuꞌ uaini nonang-koong maꞌnaange pitunisi avuꞌkoo paaravauꞌ teie naivuuꞌnaang, teka teie toraꞌpura nai-koo kasivuaruuꞌ. 35 Tenang tee aaꞌbarataꞌkoo taakavaara teinge tee bakaning mononopaꞌ tankaampeuꞌ kapooꞌ deikooꞌkoong nkoaara. Teeꞌ nkoaioꞌ tee kara nakaronunge minkuvuuꞌnung dupearuꞌ Daari Meekung-koo aaꞌpuuꞌnung,

36 Eeꞌnoko teke baꞌnanai tanatavai otorokoꞌ tee teka. 37 Eeꞌnoko tee-koo boreꞌkoo daua teing kapooꞌ tee tuumpiaakoꞌning daariaara sipauꞌ eeꞌ minkuning:

AUNG TEE JIISUUꞌ, JUꞌNUPOONG BIIKAANG DAURARONG.

38 Napoꞌ kenaanka naninka mutaaꞌo tee ninka nariꞌ taakavaaretuꞌ teka. Narung tee-koo tampavine-aape eeꞌnoko narung mareꞌaanavine-aape.

39 Eeꞌnoko nantoong teke tankinaakoꞌninge kooviꞌai tankinaakoꞌ, orakaꞌ minkuaama. 40 Eeꞌnoko aaꞌpaakoꞌ, “Daꞌ tee pava dootuuꞌnava pankava turampera beenang doong-koo kanieeꞌnaang tantaramaung, enang daka domaang mooꞌdarama aaꞌbarataꞌketa depeto siraravai, daꞌ tee Kumponing Bauring deekoꞌ.” 41 Napoꞌ teeꞌ nariꞌ teinge ainge aaꞌninge akapeuꞌaakoꞌ tee, piristiꞌnuka-koo ovontunge, boto naunukai eeꞌnoko nantoong pankeuꞌ urantanukai. 42 Aaꞌpaakoꞌ, “Aunge tee nantoong oovuning domaang mooꞌurikooꞌ, teka baka domaang mooꞌkoo makotuaꞌ. Tee Isireeli-nupoong Biikaang Daurarong deekoꞌ enang aaꞌbarataꞌketa depeto siaravaing eeꞌnoko niiꞌke masikaꞌantavampiaing tee. 43 Bakei Kumponing bauring tamparama tee-koo aaꞌnaꞌ pinkaꞌaramaung tamparakooꞌ, enang Kumponinge pakuvuaing teka tee domamparaaꞌnaang piavoi otoing deekoꞌ.” 44 Eeꞌnoko napoꞌ teeꞌ nariꞌ tenaanka mutaaꞌo nkorai tee ninka nariꞌ taakavaaretuꞌnaankai pooreꞌuretuꞌ.

45 Enang tee duaakiꞌuioꞌ mutaanang pouꞌ temeng ookutunameng bera kamunooꞌnang-koo basi. 46 Eeꞌnoko kamunooꞌnang Jiisuuꞌ aaꞌnaꞌ karoma osinung karai aaꞌpuuꞌ, “Eloi, Eloi, lama sabakatani,” eeꞌ minkuvuma, “Nkaang Kumponing, nkaang Kumponing, ning dake aming-koo siꞌmeing?” 47 Eeꞌnoko niiꞌninge nantoonge teke donkonai otorokoꞌninge teeꞌ taaravaara aaꞌpauꞌ, “Eliasi bokuvumaang.” 48 Teketa namuꞌke narung teing-koo kuaꞌparara kapooꞌ uaini kaaveeriiꞌke boovong-antavura banaꞌkoo daiꞌantavura Jiisuuꞌaape deto toong-antavuuꞌ musiꞌuuꞌnaang. 49 Teka niiꞌninge aaꞌpauꞌ, “Sipeko baka otoai tee. Iroꞌ ooampiaing, Eliasie pa pora pakuvuuꞌnaang.” 50 Teka Jiisuuꞌ aaꞌnaꞌ napoꞌ deto bokuma tenang eeꞌnang domang siꞌnuuꞌ. 51 Eeꞌnoko tenang eeꞌnang tee baarong pava dootuuꞌnava pankava-koong, meekavaro kuꞌnung, meuꞌ keꞌmeꞌaruꞌ aꞌdeiꞌketa depeto dereꞌarama bera aꞌdoong kainuꞌ. Kansiꞌ uꞌmiꞌke aaꞌnaꞌ biruꞌuuꞌ, eeꞌnoko boiaꞌnanka keꞌmeraꞌariruꞌ. 52 Eeꞌnoko napoꞌ nantoong dakoꞌaaruꞌnanka-koong kuvinanka daateꞌariruꞌ, eeꞌnoko nantoong meekupoong tero dakoꞌ aaruꞌning biikaang mononanka domamparira daaꞌarira kuvi-eta bakoariruꞌ; 53 Teketa Jiisuuꞌ domamparara daaꞌarioꞌ teing Jerusalemaꞌkoo kuung berora nantoong mmauꞌkoo oroꞌpariruꞌ. 54 Eeꞌnoko tenang teie piatooro daakuꞌ tarenara teing ninka teke Jiisuuꞌ tanatavai otorokoꞌning ninka nariꞌ tee uꞌmiꞌ nkoaruꞌnung ooaara eeꞌnoko ookara kapooꞌnanka tavoꞌkuuꞌning teing teing bakei aaꞌnaꞌ avoreauꞌ, eeꞌnoko oitaꞌkaama aaꞌpauꞌ, “Aung bakei masikaꞌ Kumponing Bauring.” 55 Eeꞌnoko manikuꞌ mmauꞌ teke otorokoꞌ isipoꞌketa tee Jiisuuꞌ ooaitaaꞌ Kaaleliꞌketa Jiisuuꞌ siompaitaaꞌ nariꞌ porouꞌning tee pakuaama kapooꞌ apukaꞌparakoꞌning-koo. 56 Teing-koo niiꞌnani Meeriꞌ Maꞌdala-nani, eeꞌnoko niiꞌnani napoꞌ Meeriꞌ Jeemisi namainta Josepaꞌ beuko, eeꞌnoko napoꞌ Siebedi baurinketa beuko.

57 Muung-aapevuma nanuko naning narung teꞌ pouꞌ kavonanka mmauꞌpoꞌnung miring Josepaꞌ Arimateaꞌnung, teenooꞌ tee Jiisuuꞌ bakaning-koong barevare-nupoong-koo narung deemparuꞌnung. 58 Eeꞌnung tee Pailatiꞌanko bera Jiisuuꞌkoong mono niaꞌuuꞌ, eeꞌnoko Pailatiꞌke arooꞌura avaavaꞌnaang botovuruꞌ. 59 Eeꞌnoko Josepaꞌke tee Jiisuuꞌkoong mono nkavura teie baaronge kakaarai nerakunge booꞌnuka daiꞌnaꞌ daiꞌuma nopaꞌuuꞌ. 60 Eeꞌnoko bakaang-koo kuvi dakoꞌdoma-koo nerakung-koo kuung sipuuꞌ tee kapang-koo nenkeꞌuuꞌnareng-koo. Eeꞌnoko kapang pankaing kaavororiiꞌ kovempura teꞌ kuvi dakoꞌdoma karanaang kuꞌnumpuuꞌ, eeꞌnoko teeꞌ nkovura tenkenuuꞌ. 61 Teni Meeriꞌ Maꞌdala-nani eeꞌnoko napoꞌ niiꞌnani Meeriꞌ teꞌ kuvi-eta avetekaꞌkoo baꞌnanuresi tarevuresi otorekoꞌ.

62 Teketa daunaꞌmung teing piristiꞌnuka-koo pankeng eeꞌnoko Boto Keperuuꞌnuka Pailatiꞌanko berora aaꞌpauꞌ, 63 “Ee pankaing, niiꞌke tee tosi bauko bakaang kara norunoruꞌampiring domampari minkuvuuꞌnung aaꞌpuma, ‘Beenang doong tankinuko ning napoꞌ daaꞌmaravaing.’ 64 Teeꞌkoo dake boto sipeko teꞌ kuvi dakoꞌdoma tanatavaavaing bera beenamparavainaꞌmung-koo basi, teinge bakaning barevare-nupoonge porora Jiisuuꞌkoong bonkuꞌnooꞌ bakiaaꞌaara nantoong nauaarima aaꞌpaaꞌneenga, ‘Tee Jiisuuꞌ booꞌketa daaꞌaring.’ Aung tee teeꞌ oroꞌ tositosi beremparavaing deekoꞌ bakei koontoꞌ orara masikung, tutunaꞌnung tositosi divuꞌui otoainge.” 65 Eeꞌnoko Pailatiꞌke aaꞌpuuꞌ, “Berira tanatavaavaining bokuereriaing, eeꞌnoko tee kuvi tampaꞌ mataueri pinkaꞌeriai diiꞌke makosieriainaꞌ.” 66 Eeꞌnoko tee teinge berora tee kuvi pinkaꞌauꞌ, aaꞌnouꞌ, ovoꞌmaꞌ bakaang taaꞌniꞌanta kapang-koo dau sipauꞌ teie paraꞌaama, eeꞌnoko tanata nkonuka miruꞌaaruꞌ.