1 Jiisuuꞌke napoꞌ karoma aaꞌpuruꞌ, “Teka ninge masikung naurampimang, Diiꞌkoo nariong anke otorining dooriaꞌ ooverioꞌ Kumponing bakaang Muuꞌ basiaravaing tee ninka purintoꞌ.”

2 Eeꞌnoko ˜naꞌmung-taa doong tankinuioꞌ Jiisuuꞌke Piita dovang Jeemisi eeꞌnoko Jooni bokuvuritaaꞌ biiꞌka iuꞌ isikara-koo deto koinauꞌ, eeꞌnoko teke otoroi ooaioꞌ Jiisuuꞌnung mono niiꞌnaꞌ paariaruꞌ. 3 Bakaang mononopaꞌ aaꞌnaꞌ kakaravora siisiouꞌ. Naning otoaꞌ duuꞌpura teeꞌ oroꞌantavupeuꞌnung. 4 Eeꞌnoko Jiisuuꞌ bakaninge ooauꞌ Eliasi eeꞌnoko Moosesi nariꞌ kareaako Jiisuuꞌ ninka. 5 Eeꞌnoko Piitai karoma Jiisuuꞌ aaꞌpuuꞌ, “Nau-anta Pankaing ee, bakei tampaꞌ niiꞌ anke oꞌnorimaang. Aiaꞌ, niiꞌke beevaari bare kaniampiai: navaꞌ daꞌ dakanavaꞌ, navaꞌ Moosesi bakanavaꞌ, eeꞌnoko navaꞌ Eliasi bakanavaꞌ.” 6 Aing teing avoreaara minkuvupeuꞌning otoaruko aung minkuvuuꞌnung. 7 Eeꞌnoko teka kamoꞌke dakaꞌpuruꞌ, eeꞌnoko teketa auronge karoma aaꞌpuuꞌ, “Aung tee nnuring ninge piaavamaung. Taaraveriaing tee.”

8 Eeꞌnoko daꞌdeng avitoitoi ookaama naning ooaavaꞌ, Jiisuuꞌ narung teing ninka otoko ooauꞌ. 9 Eeꞌnoko iuꞌketa depeto siarima Jiisuuꞌke teing potevuruꞌ kapooꞌ ooauꞌning nantoong nauaariarooꞌnaang bera Tee Naning-naumpoꞌ Paning-etaing booainooꞌketa daaꞌaravainooꞌ basi. 10 Eeꞌnoko teinge Jiisuuꞌ bakaang kara meumpauꞌ, eeꞌnoko biiꞌka kareaama aaꞌpaakoꞌ, “Aunge aming kapooꞌ booꞌketa napoꞌ daaꞌaravaing tampumang?” 11 Eeꞌnoko Jiisuuꞌ tanaꞌaama aaꞌpauꞌ, “Aming-koo boto naunukai aaꞌpaamaung Eliasi damaꞌ tee tee-koo Kumponinge Pakoꞌpariꞌniiꞌkoo uroꞌke poaing?” 12 Eeꞌnoko Jiisuuꞌke bariꞌurima aaꞌpuruꞌ, “Masikung, Daari Meekunge aaꞌpui otong, ‘Eliasi tutung poaing ookara kapooꞌ maamu-antavuaꞌnaang.’ Eeꞌnoko Daari Meekunge napoꞌ ning-koo aaꞌpui otong, ‘Tee Naning-naumpoꞌ Paning-etaing aaꞌnaꞌ sisikeera kompuaing pooreꞌaako.’ (Malakai 4:5; Aisaiaꞌ 53:1-8)

13 Teka iroꞌ ninge naurampiai. Eliasi tee masikaꞌ tutunaꞌ pouꞌnung, eeꞌnoko nantoonge tee-koo orakaꞌ piavorouꞌnaꞌ nariꞌ nkoauꞌ tee, Daari Meekunge minkuvui otoinaꞌ.”

14 Eeꞌnoko Jiisuuꞌ ninka iuꞌketa siarima niiꞌning barevare-nupoong meuꞌpaaruꞌ, eeꞌnoko napoꞌ nantoong karikaꞌ kuneꞌaaruꞌ, nariong boto naunuka Jiisuuꞌ bakaning barevare-nupoong ninka mantekaveeko. 15 Eeꞌnoko namuꞌke Jiisuuꞌ ooaara bakei ookara taꞌnimparira kuaꞌpariruꞌ tee-anko onkeonkeꞌaavaꞌnaang. 16 Eeꞌnoko Jiisuuꞌke bakaning tanaꞌurima aaꞌpuuꞌ, “Diiꞌ aming-koo mantekareerimang?” 17 Eeꞌnoko naninge karikaꞌkoo meuꞌketa bariꞌuma aaꞌpuuꞌ, “Nau-anta ee, ninge nnuring daꞌanko tavoꞌama moing maꞌnaang orara otoi kara kereng-antavuuꞌnung. 18 Teie maꞌnaange tavuma kansiꞌkoo kosiꞌuko kaꞌbuairavarama kakirinkuarakooꞌ, eeꞌnoko bakaang mono taꞌnaaꞌokooꞌ. Ninge dakaning barevare-nupoong tanaꞌaransioꞌ tee maꞌnaang bataꞌkoo makosiaavaruing.” 19 Eeꞌnoko tenang Jiisuuꞌke aaꞌpuruꞌ, “Nko diiꞌ masikaꞌanta otoriainge, koontariaing, areꞌ basinaroonge diiꞌ ninka nariꞌ oꞌnorimaatoainge dooroontampiri? Poꞌantaveai tee okiꞌnara ning-anko.” 20 Eeꞌnoko tenang poꞌantavauꞌ Jiisuuꞌanko. Eeꞌnoko maꞌnaange Jiisuuꞌ oovura namuꞌke tee nemaka kanuꞌantavuioꞌ dankurankuꞌarama kansiꞌkoo duaꞌarara korimparuꞌ kaꞌbuaaꞌke sisiꞌarama. 21 Eeꞌnoko Jiisuuꞌke bauma tanaꞌuma aaꞌpuuꞌ, “Aung arekeeꞌning doonge teeꞌ nkoaramaung?” Eeꞌnoko baumai bariꞌuma aaꞌpuuꞌ, “Okiꞌnaꞌnooꞌketa. 22 Mmauꞌ doonge ntong tovang-koo ntaꞌ duaꞌantavukooꞌ dupisiꞌkoo keviꞌuma. Daꞌ makosi deekoꞌ piaamerira pakumeriai.”

23 Eeꞌnoko Jiisuuꞌke aaꞌpuuꞌ, “Arekeeꞌkoo ning makosi deekoꞌ tammemang, aiꞌ teie daꞌ makosi deekoꞌ. Ookara kapooꞌ arikaꞌparavaꞌ naning-koo Kumponing masikaꞌantavumaung-koo.” 24 Eeꞌnoko tootoꞌke bauma namuꞌke bokuma aaꞌpuuꞌ, “Masikaꞌantavansing. Makotumparuko deekoꞌ pakumeaing.” 25 Eeꞌnoko Jiisuuꞌke nantoong karikaꞌ porora naroꞌariko oovurira tee maꞌnaang orara akaꞌpuma aaꞌpuuꞌ, “Daꞌ kipau eeꞌnoko amako maꞌnaang botoramaang naning-eta bakorarara tenkeng-koo eeꞌnoko napoꞌ tee-koo kuung beaukaꞌ.” 26 Eeꞌnoko tenang maꞌnaang uiarama naning kanuꞌantavura sipuuꞌ. Eeꞌnoko nemaka bakei davoru-pinaꞌ oroꞌparioꞌ nantoonge aaꞌpauꞌ, “Aung aaꞌ booꞌparing.” 27 Eeꞌnoko Jiisuuꞌke aung naning nemaka bireng-koo kompura deto donkong-antavuioꞌ donkonuuꞌ.

28 Eeꞌnoko Jiisuuꞌ teketa pava-koo tumparioꞌ bakaninge barevare-nupoong makenge tanaꞌaama aaꞌpauꞌ, “Arekeeꞌkoo niiꞌke maꞌnaang bataꞌkoo makotumpiaꞌ?” 29 Eeꞌnoko Jiisuuꞌke bariꞌurima aaꞌpuruꞌ, “Unkumuari kunsi narunge deekoꞌ temuriiꞌ bataꞌkoo makosi.”

30 Eeꞌnoko teketa tenkenaara Kaaleliꞌnamenge berouꞌ makemparitaaꞌ, biiꞌka bireꞌariri bakaning barevare-nupoong nau-anta-koo. 31 Eeꞌnoko aaꞌpuruꞌ, “Ning Tee Naning-naumpoꞌ Paning-etaing tee nkaning-koo navumainuka-koo narunge tooka kompui simuuꞌnaang nantoong oreng biikaang bireng-koo. Teinge dupisiꞌmaavaing, teka beenang doong tankinuko napoꞌ domamarara daaꞌmaravaing.” 32 Eeꞌnoko teinge nauvurioꞌ tasiꞌpaavaꞌ, eeꞌnoko napoꞌ amaiaaꞌorouꞌ tanaꞌkoo.

33 Eeꞌnoko Kapaneumeꞌ tavoꞌarira Jiisuuꞌke bakaning tanaꞌurima aaꞌpuruꞌ, “Diiꞌ taunge aming mantekavering?” 34 Eeꞌnoko kareaavaꞌ, aiꞌ taunge nanaama mantekaveema aaꞌpauꞌ, “Niiꞌkoo baa pankaing?” 35 Eeꞌnoko Jiisuuꞌ baꞌnanuraiꞌnange bakaning nanaiꞌketa kenaankara bokuvurira aaꞌpuruꞌ, “Naning paninung muuꞌkoo uroꞌnara deemparaaꞌnaang piavora deekoꞌ, baka enang ookara-koo damaꞌdu siparara biikaang pakupakunung otoai.” 36 Eeꞌnoko Jiisuuꞌke tootoꞌ kompura uroꞌkanooꞌ teing-koo donkong-antavuuꞌ. Eeꞌnoko tankaꞌke bokoꞌura aaꞌpuruꞌ teing, 37 “Baa tee naning ning nkaang miring-koo narung tootoꞌ okiꞌnara aung-pinaꞌ oroꞌ onkeonkeꞌuainge tee ning onkeonkeꞌmuaing, eeꞌnoko ning narung deeaꞌ, naning ning botomuing onkeonkeꞌuainge.”

38 Joonie aaꞌpuuꞌ, “Nau-anta, niiꞌke naning ooampiring dakaang miring-koo maꞌnari bataꞌuriko. Eeꞌnoko ooampira poteampiri tee niiꞌ ninka nariꞌ daꞌ siontuaung-koo.” 39 Eeꞌnoko Jiisuuꞌke bariꞌuma aaꞌpuuꞌ, “Poteveriaukaꞌ tee. Naning nkaang miring-koo kuunge kapooꞌ purintoꞌ nkovura namuꞌke orakaꞌ minkumuarupeuꞌ. 40 Baa naning niiꞌ tooꞌdemuriaung tee pakumurimaung-pinaꞌ noruꞌampiaing. 41 Eeꞌnoko noruꞌeriai naning oovununge diiꞌ ntong aruriko deekoꞌ Karistooꞌ bakaning tantaririoꞌ teie bakaang mooꞌ divuꞌuaukaꞌnunge.

42 Baa tee naning aing toireꞌ ning masikaꞌantamaamaing-koo narung duaꞌantavuaing tee-koo orara aarumo-koo deekoꞌ tee tee piaaruꞌ. Teeꞌ oroꞌ naning baukoi paravuaruuꞌnung dei tampaꞌ, aiꞌ Kumponinge aaꞌnaꞌ kiimatavuaing tee. 43 Eeꞌnoko dakaang tankaꞌke duaꞌantaruko napuꞌdaravai. Tampaꞌ masikaꞌ tankaꞌnanaang ninka domaang otoi-otoꞌnooꞌ beaing, eeꞌnoko tankaꞌ kenaanta ninka tampaꞌ deeaꞌ mosianung-aape nanuꞌkoo. 44 Teeꞌ aaꞌnomanooꞌ kikiꞌnanka booroaꞌnooꞌke eeꞌnoko ntaꞌ siriꞌaravaꞌnooꞌke. 45 Eeꞌnoko dakaang kauꞌke duaꞌantaruko napuꞌdaravai. Tampaꞌ masikaꞌ kauꞌnanauꞌ ninka domaang otoi-otoꞌnooꞌ beaing, eeꞌnoko kauꞌ kenauꞌka ninka tampaꞌ deeaꞌ mosianung-aape nanuꞌkoo. 46 Teꞌ aaꞌnomanooꞌ kikiꞌnanka booroaꞌnooꞌke eeꞌnoko ntaꞌ siriꞌaravaꞌnooꞌke. 47 Eeꞌnoko duta narutai tapiriꞌantaruko pasiꞌdarara duaꞌeai. Aaꞌnaꞌ tampara duta naruta ninka Kumponing bakaang muuꞌkoo tung-koo eeꞌnoko duta kerutara ninka tampaꞌ deeaꞌ mosianung-aape duaꞌkoo. 48 Teꞌ aaꞌnomanooꞌ kikiꞌnanka booroaꞌnooꞌke eeꞌnoko ntaꞌ siriꞌaravaꞌnooꞌke.

49 Niiꞌ ookara teing meekaꞌmariri Kumponing-koo boontunang deemariiꞌnaang ntaꞌke miang-pinaꞌ taimuriko, Daari Meekunge minkuvui otoinaꞌ.* Moosesie temuꞌ botovuruꞌnung miang sipaavaꞌnaang biikaang boontunang-koo, mooa-aapenung deeng-antavai. Ooveaing Boontu 2:13; Kena 50:5; 2 Noruꞌanta 13:5. 50 Miang tee kapooꞌ tampara, teka miang-koo tariiꞌnooꞌ paaꞌarako arekeeꞌ napoꞌ naninge tariiꞌantavupeuꞌ? Makotuaꞌ! Teeꞌkoo, dau basinaꞌ, ning-koo arooꞌdariri imaꞌdariaing, eeꞌnoko meekupoong masikeng otori pinkaꞌdarima nariꞌ mooarariri otoriai.”