1 Eeꞌnoko poroma Jerusalemaꞌ dueꞌ Oliveꞌpoꞌnamii-koo basiariruꞌ, osi Bepasi eeꞌnoko Beetani dueꞌ masipoꞌ. Eeꞌnoko bakaning barevare-nupoong-koo Jiisuuꞌke kenaankara uroꞌke botovurema aaꞌpuretuꞌ, 2 “Deeꞌ ureresi bereta osi uroꞌkanooꞌke otoi-namono-koo duꞌdareai. Eeꞌnoko basirareta doonkiiꞌnu kampianu oovereai biꞌari otoko naning mmeꞌ teu-koo baꞌnamparavaꞌ. Dipiꞌereta poꞌantavereai.” 3 Eeꞌnoko naninge tanaꞌdurema aaꞌdureko, “Aung aming-koo teeꞌ nkoveremang? Aaꞌpereai, ‘Ovoring piavoing. Napoꞌ torovuaing namuꞌke.’ ” 4 Eeꞌnoko bereta oovuretuꞌ tee doonkiiꞌ kampia taung-koo meuꞌke biꞌari otoko pava karanaange; 5 Eeꞌnoko dipiꞌureko narionge dueꞌ donkonai otorokoꞌninge tanaꞌaarema aaꞌpaaretuꞌ, “Deeꞌ aming nkoverema doonkiiꞌ dipiꞌeremang?” 6 Eeꞌnoko tenaankai Jiisuuꞌke nauvuretuꞌnaꞌ makuꞌuretuꞌ, eeꞌnoko nantoonge tenang tauraꞌpaaretuꞌ. 7 Eeꞌnoko tenaankai poꞌantavuresioꞌ Jiisuuꞌanko teinge biikaang baarong tevoroꞌkoo dau taniꞌauꞌ. Eeꞌnoko Jiisuuꞌ tee-koo dau baꞌnamparuꞌ. 8 Eeꞌnoko nantoong karikaꞌke biikaang baaronankai taunge danto taniꞌauꞌ, eeꞌnoko narionge uurung tovang poraꞌka napuꞌaama taniꞌauꞌ. 9 Eeꞌnoko nantoong Jiisuuꞌkoo uroꞌke nanauꞌning eeꞌnoko niiꞌnariong damaꞌdu-eta porouꞌninge eura bokiaama aaꞌpaakoꞌ, “Biraanke! Biraanke-poꞌnung aung Ovoring bakaang miring-koo pomaang! 10 Biraankeniiꞌ tee muuꞌ niuma Deevitaꞌketaing napoꞌ donkonge dueꞌumaang! Biraanke otoi otoaing aꞌdeiꞌke paning-koo nariꞌ!” 11 Eeꞌnoko aarenuuꞌ Jiisuuꞌ tee-koo osi Jerusalemaꞌ. Eeꞌnoko teketa pava dootuuꞌnava pankava-koo kuung tumparara avitoitoi nanuma beeroꞌuuꞌ. Eeꞌnoko muung-aapevuioꞌ napoꞌ toroaruꞌ Beetani-aape bakaning nanaiꞌketa kenaankara ninka.

12 Eeꞌnoko daunaꞌmung Jiisuuꞌ toroaruꞌ Beetaniꞌketa peeravoitaaꞌ. 13 Eeꞌnoko koiꞌnavari miring piikiꞌ isiꞌisipoꞌketa oovuuꞌ paraꞌ narung uumaananuꞌ. Eeꞌnoko sinang-poꞌnavari tampuma beuꞌ tevari-anko. Eeꞌnoko beraiꞌnange sinang oovuaꞌ, paraꞌ narung otoko oovuuꞌ, sinang biꞌkoong bakaang batei deeaꞌ. 14 Eeꞌnoko Jiisuuꞌke tevari aaꞌpuuꞌ, “Naning otoaꞌ dakaang sinang napoꞌ maaꞌderuaing.” Eeꞌnoko bakaning barevare-nupoonge taaravauꞌ.

15 Eeꞌnoko Jerusalemaꞌ napoꞌ tavoꞌarira Jiisuuꞌ parang-koo tumparara pava dootuuꞌnava pankava-koong-koo, nantoong sipisipiꞌ dovang parekanumpoꞌ baaveveekoꞌning bataꞌ tutumpuruꞌnung. Aaꞌnoko batanananka mooniꞌ aampariꞌaakoꞌning biikaning eeꞌnoko napoꞌ baꞌnavaꞌnananka kuukuuꞌ baaveaarikoꞌning biikaning teka piakatuꞌuruꞌ. 16 Eeꞌnoko potevuruꞌ Pava Dootuuꞌkoo kapooꞌnanka nkavai beꞌkoo. 17 Eeꞌnoko napoꞌ nau-antavurima aaꞌpuruꞌ, “Aming-koo noruꞌeriaꞌ otong Kumponing bakaang kara Daari Meekung-koo aaꞌpumanaꞌ

18 Eeꞌnoko teinge piristiꞌnuka-koo ovontunge eeꞌnoko boto naunuka taaravaara taung besiꞌauꞌ Jiisuuꞌ tavuꞌnaꞌ, nantoong karikaꞌ Jiisuuꞌ bakaang kara-koo taꞌnimparima biꞌariko avoreaara. 19 Eeꞌnoko muung-aapevuioꞌ Jiisuuꞌ bakaning ninka tenkenauꞌ

20 Eeꞌnoko napoꞌ daunaꞌmung oraꞌka-ita tevunge toroarima tevari piikiꞌnavari ooauꞌ maraꞌora booꞌparioꞌ untuꞌketa kaakeng-koo basi. 21 Eeꞌnoko Piitai nkoaruꞌnaꞌ noruꞌura Jiisuuꞌ aaꞌpuuꞌ, “Nau-anta Pankaing, ooveai. Tee koiꞌ dake barakosiꞌeieeng maraꞌoi booꞌparing.” 22 Jiisuuꞌke teing kara makuꞌurima aaꞌpuruꞌ, “Masikaꞌ naurampimang ninge, 23 Baa naning baito Kumponing-koo otoꞌevui dei aunteto iuꞌ aaꞌpupeuꞌ, ‘Daaꞌdarara pirung-koo duaꞌdaravai,’ eeꞌnoko bakaang noruꞌ keekooꞌaravaꞌ minkuvuinaꞌ nkoaraaꞌnaang masikaꞌantavuko teeꞌ nkoarapeuꞌ. 24 Teeꞌkoo aaꞌdampimang, tenang eentararima eeꞌ noruꞌeriai, ‘Kapooꞌ nkavampiring,’ eeꞌnoko tee okoruriaing. 25 Eeꞌnoko tenang donkoniri kunsirarima tontaꞌevurereriai kapooꞌ orara diiꞌkoo nkoauꞌnanka. Eeꞌnoko Diuma, paning-koo otomaunge napoꞌ diikaang orara tontaꞌderuriai. 26 Eeꞌnoko napoꞌ diiꞌke nariong biikaang orara tontaꞌeriaruko Diuma paning-koo otomaunge diikaang aarumo orara tontaꞌkoo makotuaꞌ.”

27 Eeꞌnoko Jerusalemaꞌaape napoꞌ toroariruꞌ eeꞌnoko Jiisuuꞌ dootuuꞌnava pankava-koong-koo parang-koo kuunge nanuuꞌ. Eeꞌnoko piristiꞌkoo ovontung, boto naunuka eeꞌnoko nantoong-koo urang-antanuka Jiisuuꞌanko porouꞌ. 28 Eeꞌnoko tanaꞌaama aaꞌpauꞌ, “Tee aung aremuriiꞌ tauraꞌ otoko dake aing kapooꞌnanka nkovemaatoing? Eeꞌnoko napoꞌ baie tauraꞌ aruioꞌ nkovemaatoinge?” 29 Eeꞌnoko Jiisuuꞌke kara bariꞌevurima aaꞌpuruꞌ, “Enang aaꞌ napoꞌ ninge tanaꞌdampiaing eeꞌnoko diiꞌke bariꞌmeriko ninge napoꞌ naurampiai tee tauraꞌ ning otoꞌmemuko aing kapooꞌnanka nkoamaung. 30 Naumeriai, Jooni baie tauraꞌpuioꞌ nantoong ntong-koo minkivurima meekaꞌantavurikoꞌ, Kumponinge aiꞌ tamung nantoonge? Enang bariꞌmeriai.” 31 Eeꞌnoko teing biiꞌka niaꞌeema aaꞌpeekoꞌ, “Areꞌpampiaꞌnaang? Aaꞌpampiko deekoꞌ, ‘Kumponinge,’ teie aaꞌmuriiꞌnaang, ‘Teka aming-koo diiꞌke Jooni masikaꞌantaveriarukoꞌ?’ 32 Eeꞌnoko aaꞌpampiko deekoꞌ, ‘Tamung nantoong-etaing,’ nantoonge tamaariꞌneenga, aiꞌ teinge tee ookarai Jooni nakaronara Kumponing-etaing tasiꞌpai otong.” 33 Eeꞌnoko teinge Jiisuuꞌ makuꞌaama aaꞌpauꞌ, “Niiꞌke aaꞌ noruꞌampiaꞌ.” Eeꞌnoko Jiisuuꞌke aaꞌpuruꞌ, “Nnaꞌ ninge napoꞌ diiꞌ naurampiarooꞌnaang baa tee ning tauraꞌ amuuꞌnung aing kapooꞌnanka nko-koo.”