1 Teeꞌkoo bakei teeꞌ nariꞌ Ovoring-koo masikaꞌantarariri otoriaing, ee mmaikoriꞌ, aiꞌ diiꞌ teing ninge aaꞌnaꞌ piaarampimaing, eeꞌnoko aaꞌnaꞌ oo-koo piamokooꞌ diiꞌ nkaning doturotunuka eeꞌnoko nkaang nko-nko-koo mooꞌ makosinanka deentaririoꞌ.

2 Deeꞌ Iuodia naanka eeꞌnoko daꞌ Sintiki aaꞌdampemang, deeꞌ tee-koo Ovoring-koo kuunge napoꞌ navurareaing. 3 Napoꞌ dake Sisikusie pakueresioꞌ tenaanka manikumaara nari-antaveereai beekaang mankimankiꞌketa, aiꞌ tenaanka tenaanka niꞌninka nariꞌ mantaꞌmarimanaanka doorenang tampara bereng-anta-koo eeꞌnoko tee Kelemeni nariꞌ teing ninka niiꞌning nariꞌ mintoomarimaing, aaꞌning niikaang miring tee teneꞌkoo buukunaneꞌ domamariaining oꞌnorinaneꞌkoo daariariri otong.

4 Doong kante Ovoring-koo doturoturariri otorimaatoai, napoꞌ unampama aaꞌpamaang, Doturariri otorimaatoai! 5 Ookara kapooꞌ nkoveriaining-koo nantoong-koo dutakanooꞌke onou tampara oroꞌantaverimatoai, eeꞌ noruꞌeri, Ovoring poainooꞌ tee dueꞌui otong. 6 Kapooꞌnanka-koo baruꞌ noruꞌ otoriaukaꞌ, teka ookara kapooꞌnanka-koo tee Kumponing eentaveriai kunsirarima tampaꞌ tamperima diikaang domang-eta. 7 Eeꞌnoko teie Kumponing-nung mooai pankainge nantoong biikaang matau-koo dau basie mankimankiꞌketa unaa-anta aruriaing tee diikaang domang eeꞌnoko diikaang onou Jiisuuꞌ Karistooꞌkoo kuunge.

8 Ee mmaikoriꞌ, asiꞌnamooraꞌkoo aaꞌdampimang, “Aing eeꞌ oroꞌning minkuamaꞌnaang diiꞌke norunoruꞌeriaining aaꞌning: tee kapooꞌ masikung, tee kapooꞌ pankaing-anta-koo makosi, tee koontoꞌ, tee kiiroraaꞌ, kapooꞌ piaa-koo makosi, tee miring tampara-poꞌnung. Niiꞌning kapooꞌ tampeng daangang-koo makosining otoko deekoꞌ makosie diiꞌke teing norunoruꞌkoo. 9 Eeꞌnoko teing teing kapooꞌnanka ninge naurampiko taaraverira noruꞌke pinkaꞌeruꞌning eeꞌnoko teing ning-koo ooverira barerariruꞌning teing teeꞌ nariꞌ napoꞌ diiꞌke nko-koo paaraveriaining. Teeꞌ nkoveriko tee Kumponing mooa-poꞌnung tee diiꞌ ninka nariꞌ otoaing.”

10 Bakei aaꞌnaꞌ dotumaring tee-koo Ovoring-koo diikaang piaa ning-koo napoꞌ daaꞌantaverieeng-koo mmauꞌ batei tamung tankinuioꞌ. Aꞌnooꞌkoo tee diiꞌke piaameri paarararikoꞌ diikaang avuavuꞌ boto-koo, teka taung otoaruko ning-koo daꞌdeng tavoꞌaravaruuꞌ. 11 Teka aaꞌperiꞌneenga, “Tee pa bakei aaꞌnaꞌ papovura teeꞌ minkuvuing.” A, ning aaꞌ tee bakei datamoi oꞌnomaung bane aremuriiꞌ batei-koo. 12 Aiꞌ ning tee kapooꞌkoo apukaꞌmari otoꞌnaꞌkoo datamouꞌnung eeꞌnoko napoꞌ mmauꞌ otoꞌmemui otoꞌnaꞌkoo. Ning baremaruꞌnung tee kapooꞌ makensiꞌnung amutemuriiꞌ batei-koo tampaꞌ nariꞌ datavoi otoꞌnaꞌkoong, aaꞌnoko poomui deekoꞌ niiꞌnooꞌ peeramoi deekoꞌ, niiꞌnaꞌ mmauꞌ otoꞌmemui deekoꞌ niiꞌnooꞌ apuapukaꞌkoo oꞌnoi deekoꞌ. 13 Ninge tee ookara kapooꞌnanka Karistooꞌ bakaang purintoꞌkoo kuunge nko-koo makosi.

14 Teka tee makosi tampara diiꞌke nkaang arikananka-koo ning pakumerimaung-koo. 15 Napoꞌ diiꞌke Pilipai-nupoonge tee tampaꞌ noruꞌeri otong, tenang urikamuꞌ tutunaꞌ ninge tee doorenang tampara daankiankoꞌnang, Masedoniaꞌketa tenkenansioꞌ diiꞌ nainge avuavuꞌnanka tankaamperima ning makosi-antameruꞌ. 16 Napoꞌ teie, bane osi pankamono Tesalonaikaꞌnamono-koo basimarako, mmauꞌnamuꞌpie diikaang pakupaku beꞌantaveruꞌ papoansi oꞌnoko. 17 Teka ninge avuavuꞌnanka nkavampainaꞌ besiꞌampaung. Tee kapooꞌ pankaing ninge oo-koo piamoi oꞌnoing tee sinang tampara, Kumponinge diikaang tampara nko-nkonanka-koo deeru-koo dau beꞌnuꞌumaung. 18 Tee diikaang avuavuꞌ tee Epaparodaitas averioꞌ nkavui pouꞌnung tee enang nkavansing. Tee bakei mmauꞌ masikeng bonoꞌ divuꞌui otong. Aaꞌnaꞌ maantoꞌmuing. Tee avuavuꞌ tee boontunang makosi tampaꞌ nuuraaꞌ Kumponing-koo, aiꞌ Kumponing tee boontunang temuriiꞌkoo dotuaramaung. 19 Eeꞌnoko teie nkaang Kumponinge teing ookara kapooꞌnanka diiꞌ apukaꞌdariaining aruriaing, mmauꞌ aaꞌnaꞌ makotui otoko teieta bakaang paning-koong oꞌmeeva-ita Jiisuuꞌ Karistooꞌkoo kuunge. 20 Bakei daangang Niuma Kumponing-koo otoi otoaing ookara batei-koo. Eeꞌ.

21 Nkaang tampaꞌ tang nauereriai teing ookara meekupoong Jiisuuꞌ Karistooꞌkoo kuunge. Ainge mmaikoriꞌke niꞌninka nariꞌ oꞌnorimainge diiꞌanko biikaang tampaꞌ tang botoaamang. 22 Ookarai Kumponing bakaning meekupoonge anke Roomaꞌke otoromainge tampara tampaamaang diiꞌkoo, baruꞌnooꞌ teinge botovotonaaꞌnukai tee daurarong˜ Siisaꞌ bakanavaꞌkooninge.

23 Tee biraanke tee Ovoring Jiisuuꞌ Karistooꞌ bakaang diikaang tanuaang ninka nariꞌ otomatoaing.

Masikung.