Chongmalar.
4.
Hiwa thengli kei'n mangtalar inkhat-ah marwaanna kot inlong inkhat kaleimu. Matiangnga kijetjei tampalooi rasa ka-ang inkhat in keidiang anati, “Hin hongro, halli kei'n hiwa thengnga kasuoksik kha naminmu kate.”” 
Khawapha takkhan kei'n ratha-ah kaleiom. Kama-ah kaom marwaan khan reng in-ongna munkhan miring inkhat in-ongnga om. 
Ama meel kha lungman katam jasper li carnelian iwar angnga awar, halli reng in-ong munkha emerald jia ka-ang sumneisaaang in akahiil. 
Reng in-ongna mun kakahiil khan reng in-ongna mun soomni leimili um om, khawa mun ngaikhan upa soomni leimili in puondiar kabang khat-um soonna renglukhu inkhu-ah in-in-ong. 
Reng in-ongna mun makheiya kool-inlek, rasa intir, khat-um ruo inri rasa ngaikha aheisuok. Reng in-ongna mun ma-ah meiser sari kaiya om, khawa ngaikha Pathian ratha sari ngaikha in-eii. 
Khale inruoiya reng in-ongna mun ma-ah crystal inthiang angnga inthiang meengsial tuipui ka-ang inkhat um om. Reng in-ongna mun kakahiil raki mili ngaikhan anuk ama khat-um inpum paraangnga inmit indou akaring khouring mili in inkahiilla inom. 
Mansa kha sabakkai ang; inni huuina kha saraatchal ang; inthum huuina kha miring maisuo ang; halli mili huuina kha murmu kawuong ang. 
Akaring khouring mili ngaikha inmurtha kuruk indouwiak, innuk inma inpum paraangnga imit indou halli suun zaan boiya laa insakkha minchatmu: “Inthiang, inthiang, inthiang, Karaatkhet Pumi Pathian kha eii, matiang um Pathian ka eii, tuun um Pathian ka-eii, khat-um akajuosik Pathian.”” 
Akaring khouring mili ngai'n reng in-ongna munna in-ong kumsoot-ah akaring amadiang minlurna, khoya thona khat-um minpaakna laa insak rachamma, 
upa soomni leimili ngaikhan reng in-ongna munna in-ong kumsoot-ah karing amadiang inbok-ah chubei intho. Inmani ngai'n inreng lukhu kha inliik-ah reng in-ongna ma-ah inreiiya inti, 
“Keini Pumi li Pathian! Lurna, khoya, khat-um thomatorna ranak ngaihi kachang sik-ah nang rahoi na-eii. Ajarchu ang rakip ngaihi nang kutbool kha eii, halli nang lungdou nuoiya ang rakip ngai'n injir le inruoiya inring.””