Chongmalar.
5.
Reng in-ongna munna in-ongpa kutchangtiang khan chejuol larik inkhat ichoi kha kei'n kaleimu; chejuol larik kha apeek inni reella injia halli chejuol larik kha madanna (seal) sari indeeng. 
Halli kei'n aka-ngartak marwaan tirton inkhat kaleimu, marwaan tirton khan rasa inringnga aleiti, “Tume hiwa madanna ngaihi makoili chejuol larik hi kamalong mator?”” 
Takkha marwaanna, nuoipil chungnga emakli manmasituol nuoiya kaom tuteii inkhat innum larik kha kamalong mator emakli ka-en mator leiommu. 
Khawa chejuol larik kha kamalong mator emakli ka-en mator kha tuteii leiommu jarra kei'n kamalung intooktheiya kaleichap. 
Khawa phakhan upa soomni leimili ngai karra upa inkhat in keidiang aleiti, “Chapmaro. Enro! Akaraatkhet David sapa, Judah phung makheiya Sabakkai, ama'n raal amatorjei, halli ama'n madanna sari kha amakoili chejuol larik kha amalong mator.”” 
Khawa tisuoli kei'n akaring khouring mili khat-um upa ngai'n inkahiil reng in-ongna mun laicheiya Keelngamteii ngirra kaom inkhat kaleimu. Keelngamteii kha inleithat angnga kaleimu. Keelngamteii kha araki sari khat-um amit sari indou, khawa ngaikha manmasituol pumpuiya injuotir Pathian ratha sari ngaikha in-eii. 
Keelngamteii khan asiya reng in-ongna munna in-ong ama kutchangtiangnga kaom chejuol larik kha ajuolei. 
Ama'n chejuol larik kha ajuoleisuo phakhan, Akaring khouring mili khat-um upa soomni leimili ngai'n Keelngamteii maikuungnga injuo-inbok. Inmani rakip ngai'n saraangdar inchoiwiak halli berou kasipchei soonna kheengkam inchoiwiak, hiwahi Pathian mi ngai'n Pathian diang inni ngaikha eii. 
Inmani ngai'n laa kathar kha inleisak: “Larik kha kaleisik ah nang rahoi na-eii halli madanna ngaikha makoili kamalong sik-ah nang rahoi na-eii. Ajarchu nang kha innaleithat, halli nang thisen khan zaat rakip, chong rakip, phungli zaat rakip, halli manmasi miring rakip makheiya inphut Pathian sik-ah mi narachojei. 
Nang'n inmani ngaikha eini Pathian sepa kathosik-ah rengram thiampu ngaikha namin-ejei, halli inmani ngai'n nuoipil chungnga wai inroonsik eii.”” 
Woikhat inlet-ah kei'n kalei-ennook, khawa phakhan kei'n marwaan tirton lising lising rasa kha kaleijet! Inmani ngai'n reng in-ongna mun, akaring khouring mili khat-um upa ngai chungnga inleikahiil, 
halli rasa inringnga laa inleisak: “Inleithatjei Keelngamteii kha thomatorna ranak, neilenung, lungsing lungwar, ranak, khoya, lurna khat-um minpaakna kachangsik kha rahoi eii!”” 
Khawa phakhan marwaanna kaom, nuoipil chungnga kaom, nuoipil suungnga kaom, tuipuiya kaom khat-um manmasituolla kaom khouring rakip in laa insak kha kaleijet: “Reng in-ongna munna in-ong amadiang khat-um Keelngamteii diang, minpaakna, khoya, lurna khat-um raatna kha kumsoot erase!”” 
Akaring khouring mili ngai'n inleimasang, “Amen!”” Halli upa ngai'n inbok-ah chubei inleitho.