1 Huajca Tanahuatijquet Asuero ihuaya Amán yajque ichaj nopa Sihua Tanahuatijquet Ester para nopa tacualisti. 2 Huan quema tacuayayaj, nopa tanahuatijquet sempa quiilhui Ester:

―Techtajtani cati tijnequi huan nimitzmacas, masque techtajtanisquía tajco ten nochi cati nijpiya.

3 Huan Ester quinanquili:

―Totanahuatijca, sinta techicnelía huan tiquita cuali, san ya ni cati nimitztajtanis. Techmaquixti para amo techmictise. Huan xiquinmaquixtili ininemilis nojquiya nochi nomasehualhua. 4 Pampa se technamacatoc nochi tiisraelitame para techmictise. Quinequi ma techtzontamiltica nochi tojuanti. Sinta san technamacatosquía para titetequipanose, huelis amo nimolinijtosquía. Pero sinta techmictise nochi tojuanti, quicocos nochi motanahuatilis pampa miyac tijpolos.

5 Huajca Asuero quitatzintoquili Ester:

―¿Ajquiya nopa tacat cati moyolilhuijtoc para quichihuas ni tamanti? ¿Canque itztoc?

6 Huan Ester tananquili:

―¡Ni tacat Amán! ¡Yaya cati techcualancaita!

Huajca quema Amán quicajqui ni camanali, tahuel momajmati iixpa nopa tanahuatijquet ihuaya isihua. 7 Huan Asuero moquetztiquisqui ica cualanti, huan quisqui ten campa momesatalijtoya para tacuas huan yajqui campa ixochimil. Huan Amán quiitac para nopa tanahuatijquet moilhuijtoya para quimictis, huajca monechcahui campa itztoya Ester huan chicahuac quitajtaniyaya nopa sihua tanahuatijquet ma quimaquixti para amo miquis. 8 Huan quema nopa tanahuatijquet mocuetqui ten ixochimil huan sempa calajqui campa tacuayayaj, quiitac Amán motancuaquetztoya campa mosehuijtoya Ester, huan noja más cualanqui huan quiijto:

―¿Huelis nojquiya tijnequi tijpinahualtis Ester noixpa ipan nochaj?

Huan nimantzi quema ne tanahuatijquet quitamiijto ni camanali, ajsicoj sequij soldados huan quiilpijque Amán para quihuicase quimictitij. 9 Huan Harbona, se itapalehuijca nopa tanahuatijquet, quiijto:

―Tanahuati Amán para ma quicualtalica se cuahuit para ipan quicuapilosquía Mardoqueo nopa tacat cati mitzmaquixtili monemilis. Cati quisencajtoc eltoc icalteno huan quipiya 22 metros ihuejcapanca.

Huajca nopa tanahuatijquet quiijto:

―¡Huajca nopona xijcuahuiyonica Amán!

10 Huajca quicuapilojque Amán ipan nopa huejcapantic cuahuit cati yaya quisencajtoya para Mardoqueo. Huan ica ya nopa moyoltali nopa tanahuatijquet huan ayecmo cualanqui.