15
Huicat para quihueyichihuas TOTECO
1 Huajca Moisés inihuaya nopa israelitame huicaque ni huicat para TOTECO:
“Nihuicas para TOTECO pampa tatanqui ica ihueyi chicahualis.
Quinisahuilti ipan hueyi at nopa cahuayojme inihuaya cati ininpa tejcotoyaj.
2 TOTECO techchijtoc ma nihuica ica paquilisti.
Yaya Notemaquixtijca cati techmaca tetili.
Yaya Dios noTeco cati nijtepanita, huan nijpaquilismacas.
Yaya nopa Dios cati notata quihueyichijqui, huan nijhueyitalis.
3 TOTECO ya nopa tatehuijquet cati más quipiya chicahualisti.
Quena, TOTECO, ya nopa itoca.
4 Quinisahuilti ipan hueyi at nopa tatehuijca carrojme,
inihuaya isoldados Faraón.
Nopa soldados cati más cuajcualme ipan nochi tali Egipto,
misahuijque ipan hueyi at cati itoca Chichiltic.
5 Huetzque hasta atatzinta quej teme.
Huan nopa at cati huejcata quinatzonpolihuilti.
6 ¡Ay, TOTECO! Tijpiya hueyi chicahualisti,
huan tiquintamilti tocualancaitacahua.
7 Huan ica mohueyi chicahualis tiquinpolo cati motalijque moixpa.
Tejcoc mocualancayo quej se hueyi tit,
huan quinpolihuilti.
Inijuanti tami tataque quej sacat.
8 Chicahuac tiquilpitzqui nopa hueyi at,
huan nopa at motajcoitac.
Nopa hueyi at motananqui huan moquetzqui oncac,
quej moquetzaj ome huejcapantique tepame.
Nopa hueyi at cati huejcata motetictali.
9 Tocualancaitacahua mohueyimatque huan quiijtojque:
‘Tiquintoquilise hasta tiquinajsitij,
huan tiquinquixtilise nochi cati quipiyaj,
huan timochihuase titominpiyani ica cati iniaxca.
Teipa tijquixtise tomacheta huan tiquintzontamiltise ica tomax.’
Quej nopa moilhuijque.
10 Pero ta, TOTECO, titailpitzqui, huan nopa hueyi at quintolo.
Misahuijque quej teposti ipan at cati huejcata.
11 ¡Ay TOTECO! Amo aqui seyoc Dios cati ica huelis timitzhuicalotise.
Amo aqui tatzejtzeloltic quej ta.
Amo aqui quipiya mohueyi chicahualis. Cati ta tijchihua temajmatía.
Huajca quinamiqui para timitzhueyichihuase.
12 Titenextili mochicahualis, huan quintolo nopa tali.
13 Ica moteicnelijcayo techyacanas tojuanti timomasehualhua cati techmaquixtijtoc.
Ica mochicahualis techhuicas hasta mochaj cati tatzejtzeloltic.
14 Nochi tacame ipan nochi talme huihuipicase quema quimatise cati tijchijtoc.
Nopa filisteos majmahuise pampa quinitzquis majmajti.
15 Huan nopa tayacanani ten soldados ipan tali Edom, yon amo huelis taijyotilanase.
Nopa tanahuatiani ten tali Moab huihuipicase ica majmajti.
Huan ayecmo quipiyase chicahualisti inijuanti cati mooquichmatiyayaj ipan tali Canaán.
16 Hueyi majmajti quinajsis.
Quena, quinamiqui ma majmahuica.
Tocualancaitacahua ayecmo techtehuise,
san majmahuise ica mohueyi chicahualis, TOTECO,
huan mocahuase quej teme.
Tojuanti cati techcojtoc para timoaxcahua tijpanoque nopa at ica temachili.
Inijuanti amo teno huelqui techchihuilise pampa ta techmanahui.
17 ¡Ay TOTECO! Techhuica para tiitztotij ipan motepe cati tatzejtzeloltic.
Techyacana hasta nopa tali campa tijtapejpeni para tiitztose,
nopona ipan mochaj cati ta tijchijchijqui.
18 TOTECO, titanahuatis para nochipa.”
Cati huicac María
19 Quema itatehuijca carrojhua Faraón huan icahuayojhua huan cati ipan tejcotoyaj calajque ipan hueyi at, TOTECO quichijqui nopa hueyi at ma quinhuica. Pero nopa israelitame quiixcotonque nopa hueyi at ipan se ojti huactoc. 20 Huajca nopa sihua tajtolpanextijquet María, ihuelti Aarón, quicuic se tepos tatzilinti, huan nochi israelita sihuame quitzilinijtiyahuiyayaj nopa tepos tatzilinti, huan huicayayaj, huan mijtotiyayaj. 21 Huan María huicayaya huan quinnanquiliyaya ica ni camanali:
“Xihuicaca para TOTECO,
pampa tatanqui ica ihueyi chicahualis.
Quinisahuilti ipan hueyi at nopa cahuayojme,
huan inijuanti cati ipan tejcotoyaj.”
Nopa at cati chichic
22 Huan Moisés quinyacanqui nopa israelitame huan quistejque ten nopa Hueyi At Chichiltic, huan yajque ipan nopa huactoc tali itoca Shur. Huan nejnenque para eyi tonati pero amo quipantiyayaj at. 23 Huan quema ajsitoj campa se ameli cati itoca Mara, amo huelque quiique nopa at cati oncayaya nopona pampa eliyaya chichic. Yeca nopa ameli quitocaxtijque Mara cati quinequi quiijtos “chichic”.
24 Huan nopa israelitame pejque cualancamanaltij ica Moisés, huan quiijtohuayayaj: “¿Taya huelis tiquise?” 25 Huajca Moisés quitajtani TOTECO itapalehuil para quimatis taya quichihuas, huan TOTECO quinextili se cuamacuayot. Huan Moisés quimajcajqui nopa cuahuit ipan at, huan nopa at mocuetqui se cuali at.
Huajca nopona TOTECO quincamanalhui israelitame para quinyejyecos sinta quitoquilisquíaj huan ya ni cati quintencahuili. 26 Quinilhui: “Sinta anquitacaquilise cati niamoTECO Dios nimechilhuía, huan anquichihuase cati xitahuac noixpa huan anquineltocase notanahuatil, amo nimechtitanilis yon se cocolisti cati nijtitanqui ipan nopa egiptome, pampa na niamoTECO Cati Nimechchicahua.”
27 Huan teipa nopa israelitame ajsitoj Elim campa oncayaya doce ameli huan 70 palma cuame, huan nopona nechca at quiquetzque iniyoyoncalhua.