1 NoTeco Dios, xinechtlacaquili quema nimomaijtohua ica ta.

Amo ximotlati quema nimitztzajtzilía.

2 Xinechtlacaquili huan xinechnanquili,

pampa tlahuel nimocuesohua huan nichoca pampa nitlaijiyohuía.

3 Nocualancaitacahua nechtzajtzilíaj chicahuac huan quinequij nechmictise.

Tlahuel nechcocolíaj huan ica nochi inincualancayo nechtoquilijtihualahui para nechtzontlamiltise.

4 Nelía nechcocohua noyolo pampa nechitzquía se hueyi majmajtli.

5 Quena, tlahuel nimajmahui huan nihuihuipica.

6 ¡Cuali elisquía intla nijpiyasquía noeltlapal queja quipiya se paloma para huelisquía nipatlantehuasquía huan nimosiyajcahuati!

7 Quena, nicholosquía hasta nepa campa huactoc tlaltini tlen mopantíaj huejca huan nepa nimocahuasquía.

8 Nimoisihuiltisquía para nicholos huan nimotlatis tlen nochi ni tlaijiyohuilistli tlen hualajtoc nopani.

Eltoc queja se hueyi ajacatl hualajtoc tlen tlamitlaxolehua.

9 Toteco, xiquintzontlamilti nocualancaitacahua.

Xijchihua ma mocuapoloca inijuanti ininseltitzi quema camatij.

Na niquitztoc para nochi tlatehuíaj campa hueli ipan ni moaltepe.

10 Tlayohua huan tonaya yonque itztoque tosoldados tlen quiyahualojtinemij ni altepetl ipan nopa tepamitl para quimocuitlahuise tlen tocualancaitacahua,

inijuanti tlen nica ehuani ininseltitzi motehuíaj se ica seyoc ipan ni altepetl.

11 Tlatlajco nopa altepetl quichihuaj miyac tlamantli tlen ax cuali,

huan ax onca tlatlepanitacayotl.

Ipan tianquis huan campa hueli momictíaj,

tlaxtequij huan tlacajcayahuaj.

12 Ax elqui se nocualancaitaca tlen nechcajcayajqui,

pampa intla queja nopa eltosquía, huajca niquijiyohuijtosquía.

O hueltosquía nimotlatis huan nicholos.

13 Pero elqui se tlen nemiyaya nohuaya,

se tlen nechyacanayaya huan tlen nonelhuampo.

14 Quena, elqui yajaya tlen sentic timopohuiliyayaj nopa tlamantli tlen tijpixtoyaj ipan toyolo,

huan yejyectzi timocamahuiyayaj quema san sejco tiyohuiyayaj ipan mochaj, Toteco Dios.

15 Ma tlalochmiquica nochi nocualancaitacahua huan ma yaca hasta mictla quema noja yoltoque,

pampa ipan ininchaj huan ipan ininyolo san onca tlajtlacoli.

16 Pero na san nijtzajtzilis Toteco Dios para ma nechmaquixti.

Huan quena, temachtli yajaya nechmaquixtis.

17 Na nimomaijtos ica ijnaloc, ica tlajco tona huan ica tiotlac.

Huan yajaya nechtlacaquilis huan nechnanquilis.

18 Ipan tlatehuijcayotl yajaya nechmanahuis,

yonque tlahuel miyac nocualancaitacahua nechtehuise chicahuac.

19 Toteco Dios tlen ipa itztoc huan tlanahuatijtoc hasta tlen huejcajquiya,

yajaya nechtlacaquilis huan quintzontlamiltis.

Pampa nocualancaitacahua ax quipatlaj ininyolis tlen fiero,

niyon ax quitlepanitaj itlanahuatil.

20 Nopa tlacame tlen ax cuajcualme momatlalanaj huan quintehuíaj hasta ininhuampoyohua.

Quiixpanoj nopa tlajtoli tlen quichihuaj ininhuaya sequinoc.

21 Quitequihuíaj tlajtoli tlen nelyejyectzi huan yamanic queja mantequiya,

pero ipan ininyolo san moilhuíaj quejatza tlatehuise.

Nochi tlen quiijtohuaj eltoc alaxtic queja aceite,

pero ixtacatzi teyolcocohuaj ica tlajtoli queja quema timotzontequis ica machete.

22 Nochi mocuesol xijcahua imaco TOTECO huan yajaya mitzmacas temachili.

TOTECO ax quicahuas ma huetzi se tlen quitlepanita.

23 Pero ta tinoTeco Dios,

tiquintitlanis nocualancaitacahua ipan nopa tlacoyoctli tlen tlahuel huejcatla.

Nopa temictiani huan istlacatini ax itztose niyon tlajco tlen ininyolis,

pampa ax huejcahuase itztose ipan ni tlaltepactli.

Pero na nochipa nimotemachis ipan ta para tinechmaquixtis.