1 ¡TOTECO, xinechtlacaquili quema nimomaijtohua!

Xijchihua cuenta notlajtol quema nimitztzajtzilía para xinechpalehui.

2 Amo ximohuejcatlali tlen na ipan nopa hora quema nitlaijiyohuía.

¡Ximopacho para tinechtlacaquilis huan nimantzi xinechnanquili quema nimitznotza!

3 Pampa mojmostla noyolis tlantiya queja poctli.

Huan noomiyohua nijmachilía queja tlatlasquía.

4 Tlahuel nimococohua ipan noyolo.

Ayoc nijpiya chicahualistli.

Niitztoc queja se xihuitl tlen pilintoc.

Ayoc nimayana huan niquilcahua para nitlacuas.

5 Huan pampa tlahuel nitlaayijhuijtoc,

tlamicuahuaqui nocuetlaxo ipan noomiyo.

6 Nijmati queja nielisquía nopa tzopilotl tlen nemi ipan nopa tlali campa ax tleno eli,

o queja cuamojmojtli tlen iselti itztoc ipan huactoc tlali.

7 Nochi yohuali ayoc nicochi.

Niitztoc queja nopa tototl tlen nemi iselti huan mosehuía itzonpac se cali.

8 Nocualancaitacahua mojmostla nechpinajtíaj huan nechtelchihuaj.

9 Ayoc nijcua pantzi.

Ama nijcua cuanextli huan tlen niqui momanelohua ica noixayo,

10 pampa tlahuel ticualantoc ica na.

Ama tinechtlanantoc huan teipa tinechhuejcamajcajtoc.

11 Noyolis panoti chicahuac queja tlayohuilotl.

Huan notlacayo pilinti queja xihuitl.

12 Pero ta TOTECO, tiitztos para nochipa,

huan nochi tlen tlacajtiyase para nochipa mitzilnamictose.

13 Na nijmati para ta timotlalanas huan tihualas para tijtlasojtlaqui altepetl Jerusalén.

Huan ama ya ajsic tonali para tijtlasojtlas huan tijpalehuis queja tijtlajtolcajtoc.

14 Pampa motlacajhua tlahuel quinicnelíaj sese tetl ipan itepa Jerusalén,

huan hasta quitlasojtlaj nopa tlaltejpoctli tlen onca ipan icalles ni altepetl pampa nochi moaxca ta.

15 Huajca nochi tlaltini huan inintlanahuatijcahua ma huihuipicaca iixtla TOTECO.

Quena, huihuipicase quema quiitase ihueyitilis.

16 Pampa TOTECO sampa quicualtlalis altepetl Jerusalén.

Huan nopano yajaya monextis ica nochi ihueyitilis.

17 Yajaya quintlacaquilis nopa teicneltzitzi quema momaijtose,

pampa yajaya nochipa mochixtoc para quintlacaquilis huan quinmacas tlen quitlajtlaníaj.

18 Niquijcuilohua ya ni para nochi tlen tlacajtiyase teipa ma nojquiya quihueyichihuase TOTECO ipampa nochi tlen quichijtoc.

19 Pampa TOTECO quihualtlachili tlaltepactli tlen nepa elhuicac campa eltoc itiopa.

Quena, tlen elhuicac quitlachili tlen onca ipan tlaltepactli.

20 Huan quintlacaquili quema tlaayijhuiyayaj itlacajhua tlen tlatequipanohuayayaj ipan sequinoc tlaltini.

Huan quinmanahui imaco miquistli.

21 Huajca miyac tlacame sampa hualase ipan altepetl Jerusalén para quipaquilismacase TOTECO.

Quena, quipaquilismacase ipan nochi ni altepetl.

22 Huan miyac tlanahuatiani tlen ni tlaltepactli hualase para quitequipanose huan quihueyichihuase TOTECO.

23 Yajaya nechquixtili nochicahualis quema noja polihuiyaya tlajco para nimiquis,

huan noyolis quichijqui más cototzi.

24 Pero nijtzajtzili huan niquilhui:

“NoTeco Dios, ta tiitztoc para nochipa.

Amo xinechcahuili nimiquis quema noja nechpolohua tlajco imiyaca tonali para niitztos.

25 Hasta ipejya tonali ta tijtlali itzinpehualtil ni tlaltepactli,

huan ica moma tijsencajqui elhuicactli.

26 Yonque nochi tlen tijsencajqui se tonali tlamis,

ta tiitztos para nochipa.

Quena, nochi tlen tijchijtoc sosolihuise queja se yoyomitl,

huan ta tiquinpatlas queja se tlacatl mopatla huan moquentía se iyoyo tlen yancuic,

huan nopa tlen sosoltic quimajcahua.

27 Pero ta ax quema tihuehuentiyas.

Nochipa san se tiitztos.

Tiitztos para nochipa huan moyolis ax quema tlamis.

28 Pero tojuanti tlen timotlatequipanojcahua,

hasta toixhuihua, itztose ica temachili,

huan hasta iniixhuihua tlen tlacajtiyase itztose cuali moixtla.”