1 Nelía paquij nochi tlen monejnemiltíaj xitlahuac,

huan tlen senquistoc quichijtinemij tlen quiijtohua iley TOTECO.

2 Paquij nopa tlacame tlen quitemohuaj TOTECO ica nochi ininyolo huan quichijtinemij tlen yajaya quiijtohua.

3 Pampa inijuanti ax quichihuaj tlen ax cuali.

Monejnemiltíaj senquistoc ipan iojhui TOTECO.

4 Ta titechmacatoc motlanahuatilhua para ma tijchihuaca tlen quiijtohuaj.

5 ¡Tlahuel nijnequisquía nijchijtinemis senquistoc tlen titechyolmelajtoc ma tijchihuaca!

6 Queja nopa ax nimopinahuasquía intla niquinchijtinemis nochi motlanahuatilhua.

7 Na nimitztlascamatis ica nochi noyolo quema ya nijmachilis nochi motlamachtilhua tlen xitlahuac.

8 Na nijchihuas nochi tlen titechyolmelajtoc ma tijchihuaca ipan toyolis.

Yeca amo xinechtlahuelcahua.

9 ¿Tlachque monequi quichihuas se telpocatl para itztos tlapajpactic moixtla, TOTECO?

Monequi quipohuas motlajtol huan quichihuas tlen quiijtohua.

10 Na ica nochi noyolo nimitztemojtoc, Toteco.

Amo xinechcahuili nimoiyocacahuas tlen motlanahuatilhua.

11 Ipan noyolo nicajcoctoc nochi tlen tiquijtojtoc,

para ax nitlajtlacolchihuas ica ta.

12 TOTECO, ta tlen nochi mitzhueyimatij,

xinechnextili quejatza nijchihuas nochi tlen tinechyolmelajtoc.

13 Na nitepohuilijtoc nochi motlamachtilhua tlen ta tinechmacatoc.

14 Más nimopaquilismacatoc pampa ninemi ipan moojhui huan nijchihua tlen ta tiquijtojtoc,

huan ax ipan ricojyotl.

15 Nimoyolilhuis tlen motlanahuatilhua huan ninemis ipan nopa ojtli campa quiijtohuaj ma ninejnemi.

16 Nimopaquilismacas ica tlen tinechyolmelajtoc,

huan ax quema niquilcahuas motlajtol.

17 Xinechchihuili tlen cuali, na nimotlatequipanojca.

Xinechcahuili ma niitzto miyac tonali para nijsenhuiquilis nijtlepanitas motlajtol.

18 Xinechixtlapo para niquitas nopa huejhueyi tlamachtilistli tlen quipiya moley.

19 Na san nipaxalohua ipan ni tlaltepactli.

Amo xijtlati motlanahuatilhua tlen na pampa monequi ma nechyacana.

20 Ipan noyolo tlahuel nijnequi nijchihuas nochi tlen xitlahuac queja quiijtohua motlamachtil.

21 Ta tiquinajhua nopa tlaixpanoca tlacame tlen mohueyimatij.

Inijuanti itztoque queja tlatelchihualme pampa quinhuejcamajcahuaj motlanahuatilhua.

22 Amo xiquincahuili ma nechpinahualtica pampa na nijtlepanita nochi tlen ta tiquijtohua.

23 Hasta nopa huejhueyi tlacame tlen quipiyaj tequihuejcayotl mosehuijque para nechijilnamiquise,

pero na nimotlatequipanojca,

senquistoc nimoyolilhuía tlen nochi tlen ta tinechyolmelajtoc.

24 Pampa motlajtol nechtlahuilía huan nechconsejomaca.

25 Nelía nimocuesohua hasta nihuetztoc ipan tlaltejpoctli.

Xijyancuili noyolis ica motlajtol.

26 Na nimitzpohuili nochi tlen nijsencajtoc nijchihuas huan ta tinechtlacaquili.

Ama xinechnextili quejatza nijchihuas nochi tlen tinechyolmelajtoc.

27 Xinechchihuili ma nijmachili nopa ojtli tlen ipan ninemis para niquintoquilis nochi motlanahuatilhua.

Huan na nimoyolilhuis ipan nochi nopa huejhueyi tlamantli tlen tijchihua.

28 Nichoca pampa tlahuel nitlaijiyohuía.

Xitechyolchicahua ica motlajtol.

29 Xinechpalehui mojmostla para ax niistlacatis.

Huan pampa tinechicnelía, xinechpalehui ma nijmati nochi moley.

30 Na nijtlapejpenijtoc nopa ojtli tlen melahuac,

huan san nimoilhuía tlen motlamachtil.

31 Na nimotlatzquilijtoc ipan motlajtol huan nijchihuas tlen quiijtohua.

¡TOTECO, amo xinechcahuili nihuetzis ipan pinahualistli!

32 Intla tinechmacas noyolo tlen cuali moixtla,

huajca na achi más nijchijtinemis tlen quiijtohuaj motlanahuatilhua.

33 TOTECO, tinechnextili quejatza nijchihuas nochi tlen tinechyolmelajtoc.

Huan nijchijtinemis nochi tonali hasta nimiquis.

34 Xinechmaca tlalnamiquistli huan nijchijtinemis nochi tlen quiijtohua moley.

Quena, nijchijtinemis ica nochi noyolo.

35 Xinechyacana ipan nopa ojtli tlen tinechnextilía motlanahuatilhua,

pampa san ya nopa nijnequi nijchihuas.

36 Xijchihua para más ma nijnequi motlajtol huan ax tomi.

37 Xinechhuejcatlali tlen nochi tlamantli tlen ax cuali para ax niquixtocas.

Más cuali ajachica tinechyolchicahuas para senquistoc ninemis ipan moojhui.

38 Xinechmatilti na, nimotlatequipanojca, para temachtli tinechmacas tlen tinechtlajtolcahuilijtoc,

pampa san ta nimitzimacasi huan nimitztlepanita.

39 Amo xinechcahuili ma niquinimacasi tlen nechpinahualtíaj pampa nimitztlepanita,

pampa motlamachtil senquistoc cuali huan xitlahuac.

40 TOTECO, na tlahuel nijnequi nijchihuas tlen quiijtohuaj motlanahuatilhua.

Xijyancuili noyolis pampa ta senquistoc tixitlahuac.

41 TOTECO, xinechtlasojtla huan xinechmaquixti tlen nocualancaitacahua,

san queja tiquijtojtoc tijchihuas.

42 Queja nopa huelis niquinnanquilis inijuanti tlen nechpinahualtíaj,

huan niquinmatiltis para san nimotemachía ipan motlajtol.

43 Amo xinechquixtili motlajtol tlen melahuac huan amo xinechcahuili ma niquilcahua,

pampa san ipan motlamachtil na nimotemachía.

44 Na nijtlepanitas moley mojmostla.

Quena, para nochipa nijtlepanitas moley huan ax quema tlamis.

45 Ninemis nimalacantoc pampa niquintemohua motlanahuatilhua para nijchihuas tlen quiijtohuaj.

46 Na niquinpohuilis motlajtol tlanahuatiani,

huan ax nimopinahuas.

47 Na nimopaquilismacas ipan motlanahuatilhua pampa tlahuel niquinicnelía.

48 Nimomatlalanas para nijnextis notlatlepanitacayo ipampa motlanahuatilhua,

huan san nimoyolilhuijtinemis tlen nochi tlen tinechyolmelajtoc ma tijchihuaca ipan toyolis.

49 Ax quema xiquilcahua tlen tinechtlajtolcahuilijtoc tinechchihuilis na, nimotlatequipanojca,

pampa san ya nopa nijchixtoc.

50 Tlen tinechtencahuilijtoc tinechchihuilis nechyoltlalía quema nimopantía ipan tlaijiyohuilistli.

Quena, nochi tlen tiquijtojtoc nechmaca yancuic chicahualistli ipan noyolis.

51 Nopa tlacame tlen mohueyimatij nechpinajtíaj pampa nimitztlepanita, Toteco,

pero yonque ya nopa, na ax nimohuejcatlalis tlen moley.

52 TOTECO, na niquilnamiqui motlamachtil tlen huejcajquiya tinechmacac.

Huan motlamachtil nochipa nechyoltlalía.

53 Nelía tlahuel nicualani ica nopa tlaixpanoca tlacame tlen quitlahuelcahuaj moley.

54 Nochi tlen tinechyolmelajtoc nechhualiquilijtoc paquilistli,

huan nechchijtoc ma nihuica campa hueli campa niitztinentoc queja nisejcoyoc ejquetl.

55 Ica tlayohua nimitzilnamiqui, TOTECO,

huan nijnequi nijchihuas tlen quiijtohua moley.

56 Nijseli tlahuel miyac tlatiochihualistli pampa nijchijqui tlen quiijtohuaj motlanahuatilhua.

57 ¡TOTECO, san ta nijpixtoc!

Na niquijtojtoc para nijtlepanitas tlen quiijtohua motlajtol.

58 Ica nochi noyolo nijnequi motlatiochihualis.

Xinechtlasojtla senquistoc queja tinechtlajtolcahuilijtoc para tijchihuas.

59 Nimotlachili quejatza nimonejnemilti

huan nimantzi nimocuepqui para nijchihuas tlen quiijtohua motlajtol.

60 Quena, nimoisihuiltía para nijchihuas tlen quiijtohuaj motlanahuatilhua.

61 Miyac tlaixpanoca tlacame nechyahualojtoque para nojquiya ma nitlajtlacolchihua ininhuaya,

pero na ax niquilcajtoc moley.

62 Tlajco yohual nimehua para nimitztlascamatis ipampa motlamachtil tlen senquistoc xitlahuac.

63 Na niquinita queja nohuampoyohua nochi tlen mitzimacasij huan mitztlepanitaj,

huan nochi tlen quichihuaj tlen quiijtohuaj motlanahuatilhua.

64 ¡TOTECO, nochi tlaltepactli temitoc ica moteicnelijcayo!

Xinechnextili nochi tlen tinechyolmelajtoc ma nijchihua ipan noyolis.

65 ¡TOTECO, tlahuel tinechchihuilijtoc tlen cuali na, nimotlatequipanojca!

Tinechtiochijtoc senquistoc queja tiquijtojtoc para tijchihuas.

66 NoTeco, xinechchihuili ma nijmachili tlen cuali huan xinechmaca tlalnamiquistli,

pampa na niquinneltocatoc motlanahuatilhua.

67 Achtohuiya quema aya tinechicnotlalijtoya para tinechtlatzacuiltis,

san nimocuapolojtinenqui.

Pero ama senquistoc nijchihua tlen quiijtohua motlajtol.

68 Ta nelía ticuali huan tijchihua san tlen cuali.

Huajca xinechmachti quejatza ma nijchihua tlen tinechyolmelajtoc para nijchihuas.

69 Nopa tlacame tlen mohueyimatij nechistlacahuijtoque,

pero na ica nochi noyolo nijchijtinemis tlen quiijtohuaj motlanahuatilhua.

70 Inijuanti huihuitique huan tzactoc inintlalnamiquilis,

pero na nochipa nimopaquilismaca ipan moley.

71 Nelía cuali para tinechicnotlali,

pampa tinechnextili para ma nijchihua nochi tlen tinechyolmelajtoc ma tijchihuaca ipan toyolis.

72 Para na más ipati moleyes huan ax millones tlen oro huan plata.

73 TOTECO, ta ica moma tijsencajqui notlacayo.

Huajca ama xinechpalehui ma niquinmachili motlanahuatilhua huan niquintzontecomatis.

74 Nochi tlen mitztlepanitaj huan motemachíaj ipan ta,

paquise quema nechitase,

pampa na nimotemachía ipan motlajtol.

75 TOTECO, na nijmati para motlamachtil senquistoc xitlahuac.

Huan nopa tlatzacuiltili tlen tinechmacatoc nojquiya xitlahuac,

huan nechhualiquilis tlamantli tlen cuali.

76 Huajca ama xinechyoltlalis ica moteicnelijcayo,

senquistoc queja tinechilhuijtoc na, nimotlatequipanojca, para tijchihuas.

77 Xinechyahualo ica moteicnelijcayo para ma niyolto,

pampa san ipan moley nijpantía paquilistli.

78 Ma huetzica ipan pinahualistli nopa tlacame tlen mohueyimatij,

pampa tlahuel nechcocojtoque ica iniistlacaticayo.

Pero na san nimoyolilhuijtinemis tlen quiijtohuaj motlanahuatilhua.

79 Ma sampa mosentilica nohuaya nopa tlacame tlen mitzimacasij huan mitztlepanitaj,

huan tlen quiixmatij motlajtol.

80 Xijchihua para noyolo ma monejnemilti xitlahuac ipan nochi tlen tinechyolmelajtoc.

Huan queja nopa ax quema nimopinahualtis.

81 Na nitlapolosnequi pampa nijchiya para tinechmaquixtis tlen nocualancaitacahua,

pampa nimotemachijtoc ipan tlen tiquijtojtoc para tinechchihuilis.

82 Noixtiyolhua tlaxicohuaj pampa quinequij quiitase ma pano nochi tlen tinechtlajtolcahuilijtoc para tijchihuas.

¿Hasta quema tinechyoltlalis ica motlapalehuil?

83 Ya nihuehuentzi huan nitzocoyolijtoc queja se cuetlax bolsa tlen quitlalijtoque campa poctli,

pero ax niquilcajtoc tlen tinechyolmelajtoc.

84 ¿Quesqui tonali monequi nijchiyas para tiquintlatzacuiltis tlen nechtoquilijtinemij?

85 Nopa tlacame tlen mohueyimatij huan tlen quicocolíaj moleyes quichijtoque se hueyi tlacoyoctli para ma nimasi.

86 Xinechpalehui, pampa motlanahuatilhua senquistoc xitlahuac,

huan nechtepotztocatinemij yonque ax tleno nijchijtoc.

87 San quentzi nechixpolihuiltíaj,

pero na ax niquinixpanotoc motlanahuatilhua niyon ax niquincajtoc.

88 Pampa hueyi moyolo, xinechcahuili ma niitzto.

Huan queja nopa nijsenhuiquilis nijchihuas tlen quiijtohua motlajtol.

89 TOTECO, motlajtol eltos temachtli para nochipa nepa elhuicac.

90 Mojmostla ta titemachtli huan tiitztos temachtli ica nochi tlen tlacajtiyase para nochipa.

Cuali ta tijtlatzquilti ni tlali huan queja nopa eltoc.

91 Nochi tlamantli mocahua campa tiquinnahuati ma eltojca hasta ama ni tonal.

Quena, nochi tlamantli tlen tijchijqui mitzneltocaj huan mitztequipanohuaj.

92 Intla ax nimopaquilismacatosquía ipan moley,

huajca ya nimictosquía ica cuesoli.

93 Ax quema niquinilcahuas motlanahuatilhua,

pampa ica motlanahuatilhua tinechmacatoc yancuic chicahualistli.

94 Na nimoaxca, xinechmaquixti pampa nochipa nijchijtinentoc tlen quiijtohuaj motlanahuatilhua.

95 Yonque nopa tlaixpanoca tlacame motlatise ipan ojtli para nechtzontlamiltise,

na san nimoyolilhuijtos tlen motlajtol.

96 Nochi tlamantli tlen más cuajcualtzi niquitztoc canque ontlami,

pero motlanahuatilhua, ax quipiyaj inintlamiya.

97 ¡Tlahuel niquicnelía moley!

San tlen ya nimoyolilhuijtinemi se tonal.

98 Motlanahuatilhua nechchijtoque más nitlalnamiqui que nocualancaitacahua.

Pampa motlanahuatilhua nechyacantiyohuij mojmostla.

99 Quena, achi más nitlalnamiqui hasta niquintlani inijuanti tlen notlamachtijcahua,

pampa na nimoyolilhuijtinemi tlen motlajtol.

100 Na más nijmachilía que nopa huehue tlacame,

pampa nijchihua tlen quiijtohuaj motlanahuatilhua.

101 Ax quema nijnectoc nijtoquilis se ojtli tlen ax cuali,

pampa senquistoc nijnequi nijchihuas tlen quiijtohua motlajtol.

102 Ax nimohuejcatlalijtoc tlen motlamachtil,

pampa ta tinechnextilía quejatza ma nimonejnemilti.

103 Motlajtol nelía cuali queja se tlatzopelcayotl.

Achi más tzopelic nijmati que sayolnectli.

104 Motlanahuatilhua nechmacaj tlalnamiquistli.

Yeca ax nijnequi niquitas niyon se tlamantli istlacayotl.

105 Motlajtol eltoc queja se tlahuili tlen quitlahuilía noojhui campa ninejnemi para ax nimotepotlamis.

106 Se huelta nitlatestigojquetzqui,

huan ama sampa nitlatestigojquetzas para nijchihuas tlen quiijtohuaj motlamachtilhua pampa nelía xitlahuac.

107 TOTECO, nechca huala nopa tonali para nimiquis ininmaco nocualancaitacahua.

Xinechmaca yancuic chicahualistli queja tiquijtojtoc para tijchihuas.

108 TOTECO, nimitztlajtlanía xijseli nopa tlascamatili tlen nimitzmaca queja se tlacajcahualistli.

Huan xinechnextili motlamachtil.

109 Mojmostla nimopantía campa mahuilili para noyolis,

pero ax niquilcajtoc moley.

110 Nopa tlaixpanoca tlacame quitlalíaj tlaquetztli para ma nimasi huan nihuetzis ipan tlajtlacoli,

pero na ax nimoiyocanequis tlen motlanahuatil.

111 Na san nimoaxcatijtoc motlajtol,

pampa san ipan motlajtol nijpantía paquilistli.

112 Ica nochi noyolo nijchihuas tlen quiijtohuaj motlanahuatilhua nochipa hasta nimiquis.

113 Ax nijnequi niquinitas tlacame tlen quichihuaj ome ininxayac.

Pero na niquicnelía moley.

114 Ipan ta nimotlatía para ax nechcocose nocualancaitacahua huan ipan ta nimomanahuía.

Pampa nimotemachía san ipan motlajtol.

115 Ma nechtlalcahuica nopa tlacame tlen fiero inintlalnamiquilis.

Ma ax nechcuatotonica pampa na nijnequi nijchihuas tlen quiijtohuaj motlanahuatilhua, Toteco Dios.

116 Huajca noTeco, xinechmaca yancuic fuerza senquistoc queja tinechtlajtolcahuili.

Huan queja nopa sequinoc ax quema huelis quiijtose para san tlapic nimochixtoc ipan ta.

117 Xinechfuerzajmaca para nimomaquixtis ininmaco nocualancaitacahua,

huan nochipa nijpiyas paquilistli para nijchihuas tlen tinechyolmelajtoc.

118 Ta tiquinhuejcamajcajtoc nochi tlen quitlahuelcahuaj tlen tinechyolmelajtoc.

Inijuanti quiijtohuaj tlalnamiquij, pero ax neli, san mocajcayahuaj.

119 Nochi tlacame tlen quinpactía tlajtlacolchihuaj ipan ni tlaltepactli tiquinita queja itetejtzo tepostli tlen mocahua quema tijmolonía para tijtlapajpacchihuas.

Pero na niquicnelía huan nijtlepanita motlajtol.

120 Nochi notlacayo huihuipica pampa mitzimacasi huan mitztlepanita, Toteco.

Huan nojquiya niquimacasi motlatzacuiltil,

huan yeca ax nijnequi nimitzixpanos.

121 Na nijchijtoc tlen xitlahuac huan tlen melahuac moixtla.

Amo xinechtlahuelcahua ininmaco nocualancaitacahua,

122 Xitlatestigojquetza para tinechtiochihuas na, nimotlatequipanojca.

Amo xiquincahuili ma nechtlaijiyohuiltica nopa tlacame tlen mohueyimatij.

123 Campa hueli nitlachixtoc pampa nijchixtoc xinechmaquixtiqui tlen nocualancaitacahua,

hasta tlaxicojtoque noixtiyolhua.

Nijchixtoc xinechmanahui senquistoc queja tiquijtojtoc para tijchihuas.

124 TOTECO, ipan moteicnelijcayo xinechchihuili tlen cuali na, nimotlatequipanojca.

Xinechnextili quejatza nijchihuas tlen tinechyolmelajtoc ma tijchihuaca.

125 Na nimotlatequipanojca, xinechmaca tlalnamiquistli,

para niquixmatis motlajtol.

126 TOTECO, ya ajsic hora para timonextis huan tijchihuas tlen tiquita para cuali.

Pampa ni tlaixpanoca tlacame ayoc quitlepanitaj moley.

127 Pero na más niquinicnelía motlanahuatilhua huan ax queja oro tlen senquistoc cuali.

128 Pampa nochi motlanahuatilhua nelía xitlahuac.

Yeca ax nijnequi niquitas niyon se tlamantli istlacayotl.

129 Motlajtol nelía yejyectzi, TOTECO,

yeca nijtoquilijtinemi ica nochi noalma.

130 Quema quiixtomaj motlajtol,

techtlahuilía huan techtlalnamictía nochi titlacame,

hasta nojquiya tlacame tlen san quentzi quimachilíaj.

131 Yeca tlahuel nijnequi niquixmatis más tlen quiijtohuaj motlanahuatilhua,

huan ya nopa nijtemohua.

132 Xinechtlachili huan xinechtlasojtla,

queja timomajtoc tiquinchihuilía tlen mitzicnelíaj.

133 Xinechyacana ipan se cuali ojtli ica motlajtol para ax nechtlanis niyon se tlaixpanoli.

134 Xinechmanahui tlen nopa tlacame tlen mosisiníaj huan quinequij nechtlaijiyohuiltise.

Huan queja nopa nijchihuas tlen quiijtohuaj motlanahuatilhua.

135 Ma monexti moteicnelijcayo ipan moxayac quema tinechtlachilía na, nimotlatequipanojca,

huan xinechmachti nochi tlen tinechyolmelajtoc para ma tijchihuaca.

136 Tlahuel nichoca pampa miyac tlacame ax quitlepanitaj moley.

137 TOTECO, ta nelía tixitlahuac huan nochi tlatzacuiltili tlen titemaca nojquiya xitlahuac.

138 Nochi motlajtol xitlahuac huan temachtli para ipan ma timotemachica.

139 Nelía nimocuesohua huan nicualani,

pampa nocualancaitacahua ax quitlepanitztoque tlen ta tiquijtojtoc.

140 Nochi moley nijyejyecojtoc huan niquitztoc para nelía tlatzejtzeloltic.

Yeca niquicnelía.

141 Nelía niteicneltzi huan miyac ax quinequij nechitase,

pero na ax niquinilcajtoc motlanahuatilhua.

142 Ta tijchihua tlen xitlahuac para nochipa huan moley senquistoc melahuac.

143 Nopani huetztoc cuesoli huan tlaijiyohuilistli,

pero motlanahuatilhua san ya nopa nechyolchicahuaj.

144 Motlajtol nochipa xitlahuac.

Xinechmaca tlalnamiquistli para nijmachilis huan queja nopa huelis niitztos.

145 Ica nochi noyolo nimitztzajtzilía.

Xinechnanquili noTeco, huan nijchihuas tlen tinechyolmelajtoc.

146 Na nimitztzajtzilía huan nimitzilhuía:

“Xinechmaquixti tlen nocualancaitacahua”,

huan nijchihuas tlen quiijtohua motlajtol.

147 Nimehua ica ijnaloc quema aya quisa tonati,

huan nimitztzajtzilía, TOTECO, pampa san ipan motlajtol nimotemachía.

148 Ica tlayohua ax nicochi pampa san nimoyolilhuía tlen nochi tlen tiquijtojtoc tinechchihuilis.

149 Xinechtlacaquili pampa titetlasojtla, TOTECO.

Xinechmaca yancuic chicahualistli queja quiijtohua motlamachtil para tijchihuas.

150 Nechca hualahuij nopa tlacame tlen mosisiníaj huan nechtepotztocatinemij.

Inijuanti mohuejcatlalijtoque tlen moley.

151 Pero ta tinoTeco tiitztoc nonechca.

Nochi motlanahuatilhua senquistoc melahuac.

152 Hasta quema niitztoya nipilsiltzi niquixmatqui motlajtol,

huan nijmatqui para motlajtol ax quema mopatlas para nochipa.

153 Xijtlachili notlaijiyohuilis huan xinechmanahui,

pampa ax niquilcajtoc moley.

154 Quena, xinechtenpalehui huan xinechmanahui queja tinechtlajtolcahuilijtoc para tijchihuas.

155 Ax tiquinmaquixtis nopa tlacame tlen ax mitztlepanitaj.

pampa inijuanti ax quichihuilíaj cuenta tlen tinechyolmelajtoc.

156 TOTECO, ta tlahuel tinechtlasojtla.

Xinechmaca yancuic chicahualistli queja quiijtohua motlamachtil para tijchihuas.

157 Miyac nocualancaitacahua nechtepotztocatinemij huan quichihuaj campeca para ma nimitzixpano,

pero na ax nijcajtoc motlajtol.

158 Na niquincocolía nopa tlacajcayahuani,

pampa inijuanti ax quichihuaj tlen quiijtohua motlajtol.

159 Xiquita TOTECO, na tlahuel niquinicnelía motlanahuatilhua.

Xinechmaca yancuic chicahualistli pampa ta nelía ticuali,

huan hueyi moyolo.

160 Nochi motlajtol senquistoc melahuac.

Quena, nochi motlamachtil senquistoc xitlahuac huan huejcahuas para nochipa.

161 Tlacame tlen quipiyaj tequihuejcayotl nemij notepotzco para nechcocose yonque ax tleno niquinchihuilijtoc,

pero ipan noyolo san niquimacasi para niquixpanos motlajtol.

162 Na nimopaquilismaca ipan motlajtol queja se tlen paqui miyac quema quipantijtoc tlen tlahuel patiyo.

163 Nijcocolía nochi tlamantli istlacayotl,

pero niquicnelía miyac moley.

164 Nimitzhueyimati chicome huelta ipan se tonal,

huan nimitztlascamati pampa xitlahuac motlamachtil.

165 Nochi tlen quiicnelíaj moley quipiyaj miyac tlasehuilistli ipan ininyolo,

huan ax huetzise ipan tlajtlacoli.

166 TOTECO, tlahuel nimochixtoc para tinechmaquixtis

huan yeca niquintlepanita motlanahuatilhua.

167 Na nijneltoca motlajtol huan niquicnelía ica nochi noyolo.

168 Na nijchihua tlen quiijtohuaj motlanahuatilhua huan motlajtol,

pampa ta tiquixmati nochi tlen nijchihua.

169 TOTECO, xijtlacaquili tlen nimitztlajtlanía,

xinechmaca tlalnamiquistli senquistoc queja tiquijtojtoc para tijchihuas.

170 Xijtlacaquili tlen nimitztlajtlanía quema nimomaijtohua,

huan xinechmanahui queja tiquijtojtoc tinechchihuilis.

171 Na nimitzpaquilismacas,

pampa ta tinechnextilijtoc quejatza nijchihuas nochi tlen tinechyolmelajtoc ma tijchihuaca.

172 Nitepohuilis nochi tlen tiquijtojtoc,

pampa nochi motlanahuatilhua senquistoc xitlahuac.

173 Ximocualtlali para tinechmanahuis,

pampa na nijtlapejpenijtoc nijchihuas tlen quiijtohuaj motlanahuatilhua.

174 TOTECO, nijnequi xinechmaquixtiqui,

pampa na san nimopaquilismaca ica moley.

175 Xinechcahuili ma noja niitztos para nimitzhueyimatis.

Xijcahuili para motlamachtil ma nechpalehui.

176 Na nimocuapolojtoc queja se pilborregojtzi,

yeca xihuala para xinechtemoqui,

pampa na ax niquilcajtoc para niquintlepanitas moley.