1 Ihcuac panolotiu, in Jesús omotac se tlacatl aquin otlacat ixpatzac. 2 Huan in tetlamachticahuan otetlahtlanihque:

―Tlamachtiyani, ¿tleca otlacat ixpatzac inin tlacatl? ¿Cana ica intlahtlacol itatahhuan, noso yehhuatl itlahtlacol?

3 Huan Jesús oquiniluiloc:

―Ahmo ica itlahtlacol, niyan ahmo intlahtlacol itatahhuan. Ocachi nele yes ic mamotenextili ica yehhuatl in tlen cuali mochihua in Dios. 4 Ic oc ipan tonali, nehhuatl nicpiya tlen nicchihuas in tequitl den aquin onechualtitlaniloc, tleca ipan miquilistli, niyan aquin ayacuel tequitis. 5 Ic oc nica nican ipan inin tlalticpactli, nehhuatl niquinyolmatiltis in tlalticpac tlacamen.

6 Satepa ic omihto inin, Jesús ochihchaloc tlalpa, ic omochiu chihton soquitl ican techihchac, huan omixtlalili ipan iixtelolo in ixpatzac. 7 Oncan omoluic:

―Xiyau ximoixpaca ipan in atl nepa Siloé.

Itocahyan Siloé quihtosnequi Tlatitlanili. In ixpatzac oya huan omoixpacac. Huan queman omocuep, yicuali otlachix. 8 Oncan in ichantlacahuan, huan in aquihque achto oquitayayahque ixpatzac, oquitohque:

―¿Ahmo yehhuatl inin in aquin omotlaliyaya quitlahtlani in limosnahtomin?

9 Sequin oquihtohuayahque:

―Queme, yehhuatl.

Oc sequin oquihtohuayahque:

―Ahmo yehhua, san ixnesi yehhuatl.

In tlacatl oquihto:

―Queme, nehhuatl.

10 Oncan oquitlahtlanihque:

―¿Huan queni yicuali titlachiya?

11 Yehhuatl oquinnanquilic:

―Inon tlacatl mach itoca Jesús oquichiu soquitl, huan onechixtlalili ipan noixtelolohhuan, huan onechiluic: “Xiyau ipan in atl den Siloé huan ximoihxami.” Oniya, tel, huan queman onimoihxami, cuali onitlachix.

12 Oncan oquitlahtlanihque:

―¿Caninca inon tlacatl?

Huan yehhuatl oquiniluic:

―Ahmo nicmati.

13 Oncan oquihuicaque inixpa in fariseos in aquin ocatca ixpatzac. 14 Huan yeh in tonali den nesehuilistli ihcuac in Jesús omochiu in soquitl, huan omotlachiyalti in ixpatzac. 15 Huan ic inon noyojqui in fariseos oquitlahtlanihque in tlacatl quenin axan cuali tlachiya. Yehhuatl oquiniluic:

―Onechtlalili soquitl ipan noixtelolohhuan, huan onimoihxami huan axan nitlachiya.

16 Oncan sequin den fariseos oquihtoque:

―In tlacatl aquin oquichiu inin ahmo ohuala den Dios, tleca ahmo quichihuas cuenta ica in tonali den nesehuilistli.

Huan oc sequin oquihtohuayahque:

―¿Quenin cuali quichihuas tlachiuten mahuestic quen inin in tla san tlahtlacolyo?

17 Ic inon omoxexelohque ic yehhuanten, huan oc sepa oquitlahtlanihque in aquin ocatca ixpatzac:

―¿Huan tehhuatl, tlen tiquihtohua ica in tlacatl aquin omitztlachiyalti?

Huan yehhuatl oquihto:

―Nehhuatl niquihtohua inon se tlayolchicahuani.

18 Huan in tequihuahten den judeahtecos ahmo oquineltocayayahque in tla ixpatzac ocatca. Huan ic inon oquinnotzque in itatahhuan in aquin ocatca ixpatzac. 19 Huan oquintlahtlanihque:

―¿Yeh inin in namoconeu in aquin nanquihtohuahque otlacat ixpatzac? ¿Quenin axan yicuali tlachiya?

20 In itatahhuan oquinnanquilihque:

―Ticmatihque inin yehhuatl in toconeu, huan otlacat ixpatzac. 21 Huan ahmo ticmatihque quenin axan cuali tlachiya, niyan ahmo ticmatihque aquinon oquitlachiyalti. Xictlahtlanican yehhuatl; ayacmo semi in conetl, huan yehhuatl mechiluis quenin ocatca.

22 In itatahhuan oquihtoque inon ica inmoucayo, tleca in tequihuahten den judeahtecos yoquisemauticatcahque ic quinquixtohuetzosque ipan tiopantli yehhuatl in aquin quihtosque in Jesús, yehhua in Cristo. 23 Yeh in ica in itatahhuan oquihtoque: “Xictlahtlanican yehhuatl, tleca yitlacatl, ayacmo cana conetl.”

24 Oncan in tequihuahten den judeahtecos oc sepa oquinotzque in tlacatl in aquin achto ixpatzac ocatca, huan oquiluihque:

―Xiquihto nele Dios in tlahmo nele tlahtlacolyo inon tlacatl. Tehhuanten ticmatihque inon tlacatl tlahtlacolyo.

25 Oncan yehhuatl oquinnanquilic:

―Nehhuatl ahmo nicmati in tla yehhuatl in tlahtlacolyo noso ahmo. San nicmati quenin onicatca niixpatzac huan axan nitlachiya.

26 Huan oc sepa oquitlahtlanihque:

―¿Tlen omitzchihuilic? ¿Quenin oquichiu ic omitztlachiyalti?

27 Oquinnanquilic:

―Yonamechiluic, huan ahmo nantlacaquihque. ¿Tleca nanquinequihque oc sepa maniquihto? ¿Cana namehhuan noyojqui nanquinequihque nanquicuitlapanuisque?

28 Oncan oquipactecahque huan oquiluihque:

―¡Tehhuatl xicuitlapanui inon tlacatl! Tehhuanten ticuitlapanuisque itlanahuatil in Moisés. 29 Tehhuanten ticmatihque quen Dios omonotz in Moisés, huan inin Jesús, niyan ahmo ticmatihque de canin.

30 Oncan in tlacatl oquinnanquilic:

―Ahmo nicnehnehuiliya tleca nannechtlahtlanihticaten ica inin tlahtoli. Nanquihtohuahque ahmo nanquimatihque de canin ohuala, huan nehhuatl onechtlachiyalti. 31 Ticyecmatihque quenin Dios ahmo quincaquilos in tlahtlacolyohque. San quincaquilos in aquihque temahuestiliyahque huan quichihuahque tlen monequi. 32 Ic opeu in tlalticpac ahyic ticmautoque tla oncan aquin yoquitlachiyalti in aquin otlacat ixpatzac. 33 In tla inin tlacatl ahmo hualani den Dios, ahhuel tlen quichihuani.

34 Oncan oquiluihque in tequihuahten:

―Tehhuatl otitlacat titlahtlacolyo. Huan axan tel, ¿tehhuatl titlahtlacolyo tiixcohyehuis titechnextilis?

Huan oquixtohuetzohque den tiopantli.

35 Jesús omomat quen oquixtohuetzohque in ixpatzac, huan queman omoahsiloc, omoluic:

―¿Ticneltoca ica in Iconetzin Dios?

36 In tlacatl oteiluic:

―Tlacatzintli, manechiluican aquinon, ic niteneltocas.

37 In Jesús omonanquilic:

―Yitiquitztoc; yinehhuatl aquin ihuan timonohnotztica.

38 Oncan in tlacatl omotlancuaquetz teixpa in Jesús, huan oteiluic:

―Nicneltoca, Notecohtzin.

39 Saniman omihto in Jesús:

―Nehhuatl onihuala ipan inin tlalticpactli ic niquinixcomaca in tlalticpac tlacamen, huan ic in ixpatzacten maquinehnehuilican. Huan in aquin quihtohuahque mach tlachiyahque, mocahuasque quen ixpatzacten ica intlahtlacol.

40 Oncan sequin fariseos ocahcatca tehuan, huan ic oquicajque inon, otetlahtlanihque:

―Cox, ¿ticnehnehuiliya tehhuanten noyojqui tiixpatzaque?

41 In Jesús oquinnaquililoc:

―In tla namehhuan nanquihtonihque nanixpatzacten, ahmo mechtlahtlacoltihtonihque. Huan quenin nanquihtohuahque mach nantlachiyahque, ahhuel mechixtlapacholuisque namotlahtlacol.