1 Txa²wã³tã̱³nãu³xãi³. Je³su² Kris²tu³jah¹la² a³ka³nxi²ju³ta³nũ³a² ĩ³yau¹ũ³hi² ã³yã³nũ²kxi²ki̱³ju³ta³nũ³a² ĩ³yau¹ũ³hi² nxe³nx2ti³nha¹tu¹wa². 2 Kwa²wãn³txa² yxo²ĩ²yah³lxi³sĩn¹txa³hẽ¹la². Nxe²e³kxi¹nx2tain¹te³nah¹lxi¹:

— Je³su²jah³la² ã²la² a³ka³nxi²na²hẽ³li¹. Jau³su² ta̱³nxa²:

— Hxi²sxã³nho³tẽx3jut3sũ̱³ju³ta² ĩ²a¹hẽ³li¹. òla² a³ka³nxi²na²hẽ³li¹. Jau³su² ta̱³nxa²:

— Txa²wã¹sũ̱³na² wãn³txi³khai³xa² ain³kxi²na¹hẽ³li¹. òla² a³ka³nxi²na²hẽ³li¹. Jau³su² ta̱³nxa², nxe³jau³jau¹xai²na² ain³kxah¹lxin¹kxai²nãn²tu̱³ hxi²waun³txi³sxã³ ĩ³wã̱³wã̱³jah³lxi³sĩn¹txa³hẽ¹la². Ĩ³ki³ha¹kxi¹nx2tain¹sĩ¹nha³ta²wa². Ha³te̱h³nxã³nxa² ĩ³sa²si¹hã³nx2ti³sĩ¹na¹ki³lxo³nxe³tain¹kxan²ti³ we¹tain¹yah³lxi³sĩn¹txa³hẽ¹la². 3 Wãn³txa² ka³lxa¹txi³ e³kxi¹nx2tain¹kxan²ti³ ain³nyha¹lxi³sĩn¹txa³hẽ¹la². Ĩ³ki³ha¹kxi¹nx2tai¹nha³ta²wa². Nxe³ha²kxai³ a³ka³nxi²ju³ta² wa³su¹txi³ wã²nxa³ta̱³lxa¹ ju³tha¹li¹ wxã³sãn²tu¹wa².

— Txa²wã¹sũ̱³na² ten³ti³hex1sa²nxa³nhai¹. Yxo²kwĩ̱¹ki²sa³nhai¹. A²nũ²a² ka³la¹txi³ nxe²e³kain¹sãn²tu¹wa². Nain¹sãn²ka³tu̱³ a²nũ²a² ka³na³ka³nat3sxã³ ko̱³nxe³thin¹khaix1te²a² wxã³nũn³tu¹wa². Nxe³jah¹lai²li² a²ko̱³nxe³ju³ta² kãin² yũ²na³la². Yxãn¹ta¹ kxã³nãu³a¹ Txa²wã¹sũ̱³na² hi²sen³su² ko̱³nxe³ti³ ĩ³yĩ¹li²nũ¹sxã³ ha³lo²a² i̱³sa²tẽ³ko³xa² ã³na¹sxã³ wxe³ha²kxai³ nxe³te³na¹ i̱³sa²tẽ³si¹tu¹wa², ko̱³nxe³thin¹khaix1jah¹la²sa³. 4 A²nxe³jah¹lai²na² wãn³txi³kxai³lu¹ ki³ha¹kxi¹nx2ti³te³nah¹lxi¹:

— Txai²li² Sũ̱³na² Si³yxau³jah¹lo²sa¹wi¹. Sũ̱³na² ã̱³xa² yũ³te²sxa³yu²hẽ³li¹. Nxe³nũ²la² Sũ̱³na² sxi²ha² ã³wih¹ka³tu̱³ Sũ̱³na² ã³wxe³ka³lo³a² ã³wxe³tu¹wa². Nxe³nũ²la² sũ̱³nu²su²ki³lxo³tu¹wa². Yxãn¹ta¹ kãin²ki³han³jah¹lo²su²hĩ̱³nx2na³la².

5 Jau¹xai²na² yxo²ha³kxa¹ wxã³sxã³ ĩ³ye³kxi¹nx2ti³nha¹tai¹ti²tu³wa². 6-8 Jã¹nxe³sxã³ ha³lo²a² hau³ko³nhĩ¹na¹ wxã³tu¹wa². Ko̱³nxe³thin¹khaix1jah¹la² wxã³tu¹wa². Jau¹xai²na² ya³nx2ti³nha¹hẽ³la². A²nxe³jah¹la² ko̱³nxe³thin¹khaix1jah¹lai²na² o²la³kxi²ju³ta³nũ³a² ã²la² ãn³si³wxe²na³la². Yxãn¹ta¹ jah¹la² sa²kxai³lu² hĩ¹na² hxi²kan¹txi³ wxã²nxa³lho³la². Jã¹nxe³sxã³ wi¹lhin¹khaix1jah¹la² ã²la² yxau³ya³nhẽ³na³la². Nxe³ha²kxai³ yxau³ya³nhẽ³tãu³a² ko̱³nxe³thin¹khaix1jah¹la² hxi²kan¹txi³ wxã²nxa³lho³la². Yxãn¹ta¹ wi¹lhin¹khaix1jah¹la² ã³sxã³ ã³waix3sãn²ka³tu̱³ hã²wxãn³txa³ ko̱³nxe³thin¹khaix1jah¹la² wxã³tu¹wa². 9 A²nxe³jah¹la² sa²kxai³lu² Sa³ta³na²jah¹la² ĩ³nũ̱³kxũ³nũ¹hai¹nha²kxai³ wã³nxĩn¹sxã³ o²la³kxi²ki³lxo³tu¹wa². 10 Nxe³ha²kxai³ ko̱³nxe³tĩh³na² ai³ain¹te²na² yxo²ha³kxa¹ ĩ³ki³ha¹kain¹tu¹wa². Wã³nxĩn¹sxã³ o²la³kxi²ki³lxot3sa²kxai³ ĩ³ki³ha¹kxain¹tu¹wa². Txa²wã¹sũ̱³na² wãn³txa² te³nai¹nxa³ha²kxai³ jau¹xai²na² a³lxai¹nxa³ha²kxai³ a²ẽ¹nãu³ai²na² sa²hau³ko³tai¹nxa³ha²kxai³ nxe³ain¹tu¹wa². 11 Nxain¹jut3su² ĩ³ki³ha¹kain¹jau³xai²li² sa²yxo²we¹tain¹kxe³su² Txa²wã¹sũ̱³na² ũ³hũ¹ain¹tu¹wa². 12 Nxain¹ka³tu̱³ tũ̱¹ka̱³txai²na² yxo²ha³kxa¹ ya²la³tu̱³jau³xa² te³nai¹nxa³te²na² a²yxo²ha³kxa¹ ko̱³nxe³ti³ kãi³ki̱³ju³ta² te³nain¹te²na² a²yxo²ha³kxa¹ nxe³sxã³ Txa²wã¹sũ̱³na² hi²sen³su² ã³na¹ain¹tu¹wa². A³ka³nxi²sxã³ wxã³hĩ¹na¹ ã³na¹ain¹tu¹wa². Hãi¹sxã³ ko̱³nxe³ti³ ĩ³yĩ¹li²hai¹nha²kxai³ ko̱³nxe³ti³ kãi³ain¹kxa² yo³ha² ũ³yho³hi²hain¹tu¹wa², Txa²wã¹sũ̱³na² hxi²ka²sa³.

13 Txa²wã³tã̱³nãu³xãi³. Txa²wã¹hxi²kan¹jah¹la² a³lxi¹nx2ti³na³la². Nxe³nx2ti³ha²kxai³ kã³nhxĩ¹nai³kxai³ Txa²wã¹sũ̱³na² wãn³txa² ya²la³tu̱³ jau³xan²tu̱³ yxo²ĩ² ãn³si³wxe³yah³lxi¹nhĩ¹nai³tã² Txa²wã¹sũ̱³na² hi²sen³su² wxa²ẽ¹nãu³ai²na² sa²hau³kot3sxã³ ĩ²sxã³ ĩ³so¹nx2ti³tai¹ti²tu³wa². Nxe³hĩ¹nai³tã² Txa²wã¹sũ̱³na² Yãu³ka³txa² nxũ²kwa̱i³wi¹nxa²lxi³te³lhxã³ sa²si¹hã³na²hẽ³la². Nxe³jut3su² Txa²wã¹sũ̱³na² ĩ³sa²nẽn¹kxi²to³sĩ¹na¹wa². 14 Txa²wã¹sũ̱³na² wãn³txa² ĩ³hen³txi³nha¹jau³xai²na² ain³kxah¹lxin¹tai¹ti²tu³wa². Nxe³yah³lxi¹nha²kxai³ jau¹xai²na² ain³kxi²sah¹lxi¹nha²kxai³ kxã¹nãu³a¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² te²a² a³ka³nxi²tãu³a¹ a²wxi²kin³ti³ton³khai³ju³ta² wã²nhũ¹nx2ti³tu¹wa². 15 Txa²wã³tã̱³nãu³xãi³. Txa²wãn³txa² ĩ³yau¹ũ¹nx2ti³nha¹jau³xai²li² wxa²ne³nxẽ³na² ain³kxi²sah¹lxin¹nhĩn¹jau³su² ta̱³nxa² ha³te̱h³nxã³nxa² ĩ³sa²si¹hã³nx2ti³nha¹jau³su² ta̱³nxa² nxe³sxã³ jau¹xai²li² nxe³wã²na³yah³lxi³txa³hẽ¹la². Yxãn¹ta¹ ĩ³nxũ²kwa̱i³lxũ¹sxã³ yxo²ĩ² kan²txi³ sa²yxo²so² nxe³jah³lxi³hẽ¹la².

16 A²nxe³jut3su² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ Txa²wã¹sũ̱³na² nxe³ya³sxã³ a²nxe³te²a² hi²sen³su² a³lxi²khai¹nxe³lain¹na³la². A³lxi²nẽ³lhxã³ ĩ³nxũ²kwa̱i³lxũ¹txi³nẽ³lain¹na³la². A³ka³nxi²sxã³ wa̱³lain¹ju³ta³nũ³a² wah³nxe³ki̱³tã³la². 17 Te²yã¹nxe³sxã³ wi¹lo²la³kxah¹lxin¹jut3su² ta̱³nxa² wãn³txa² wi¹jau³xa² wi¹le³yah³lxin¹jut3su² ta̱³nxa² nxe³si¹yhah³lxin¹jau³su² ya³lot3sxã³ nũ̱³kxũn³txi³ ĩ³hxi²ka¹ta³lxi³si¹ha¹jau³su² Txa²wã¹sũ̱³na² e³kxi²ya³to³ha¹wa².