1 Nxa²ha¹te¹ ye³ha¹li¹ ye³ha¹li¹ ka³na³ki¹ a³lan²tãu³a² A³na³ni²ah³la² Sũ̱³na² sxi²ha² wã³nxĩn¹ta² si³yxau³jah¹la² wxã³ta¹hxai²hẽ¹la². Wxã³ka³tu̱³ta¹ a²nũ²a²nãu³xa² ĩ³hi²txa² wxã³ain¹ta¹hxai²hẽ¹la². Ju³te²a² a²hxi²kan¹txa² nũ̱³ka̱³txa² ã³wxã³ha²kxai³ Ter²tu³lo³jah³lai²na² ha³te̱h³nxã³nxa² a²hoh³lxi³sa²khaix1nxe³jah¹la² kxeh³kon³kxi²nxa³jah¹la² ã³wxã³ha²kxai³ nxain¹ta¹hxai²hẽ¹la². Nxain¹ka³tu̱³ta¹ Pau²lah³lo²nu¹ta²kxai³ ko̱³to²la³kxi²ki³lot3xain¹sxã³ ĩ³ki³han³jau³su² e³ain¹ta¹hxai²hẽ¹la². 2 Nxe³ha²kxai³la¹ Pau²lah³lo²nu¹ta²kxai³ ĩ³kaix1so¹sãn²nũ²la² Ter²tu³lo³jah³la² ko̱³te³kxi² ã³si³wxe³te³nah¹lxi¹:

— Fe²lis³jah³lãi³. Txa²wã¹ha³lo²a² sa²hãu²not3ja³sa²sĩ¹nhxai¹nhẽ³li¹. A²hoh³lxi³si¹nha²kxai³ wi¹lhau³kot3ja³sa²nhĩn¹tai¹ti²tu³wi¹. 3 Nxe³ha²kxai³ wi¹lxo³kxi²sa²nhĩn¹tai¹ti²tu³wi¹. Nxe³ha²kxai³ sa²nẽn¹kxi¹nx2nha¹wi¹. 4 Nxe³nha¹jut3su² wãn³txa² ain³kxi²sa¹nha²kxai³ hxi²tha³txa²ha¹kxa²ya̱n³txi³su² nxe³nxa²ha¹nhai¹. Nxe³nxa²ha¹ha²kxai³ a³lu²te³nxa³lho³li¹. Jũ¹nxa² so¹lxi³ ain³kxi²sẽ¹li¹. 5 Jah¹lai²li² ha³nxeh³lxa³ti³ kãi³ũ¹nhẽ³lhxai²na²hẽ³li¹. Ju³te²a² nũ̱³ka̱³txi³nãu³xa² yxo²ha³kxa¹ ul²yxau³kxan²ti³ he¹li³si¹jau³su² kwa³na³hxai²na²hẽ³li¹. Nxe³ha²kxai³ Na³sa³rẽ²na² nũ̱³ka̱³txa² a²hxi²kan¹jah³lai²la¹wi¹. 6 Nxe³sãn²kxa²yu³su² Txa²wã¹sũ̱³na² sxi²ha² ã³khot3te³lhxã³ ã³wih¹na²hẽ³li¹. Nxe³ha²kxai³ ũ³tĩ̱¹kxi²na¹hẽ³li¹. Txa²wã¹yah³la²nãu³xu¹tai²na² wãn³txa² sa²yxo²wet1si¹ja³kxa³jau³su²: “Ko̱³nxe³thin¹ta̱³nxa² wi¹lhin¹ta̱³nxa² a³ya³txi²sĩ¹na¹tũ¹xã¹.” Nxe³nha¹hẽ³li¹. 7 Nxe³ta¹ Li²si³o³ah³la² so³ta²to² hxi²kan¹jah¹lan²tu̱³ ã³wxã³nũ²la² nũ̱³kxũn³txi³ sa²so¹kxi²sain¹sĩn¹na²hẽ³li¹. 8 Nxe³sain¹sĩn¹nũ²la² ĩ³yau¹ũ³nxa²si¹sain¹jau³su² kwa³na³sain¹na²hẽ³li¹. Nxe³jut3su² wãn³txa² ĩ³wã̱³txain¹sã²nĩn¹ka³tu̱³ ĩ³yau¹ũ³nxain¹kxai²nãn²tu̱³ wain³txi³ a³la³kxin¹tu¹wi¹. Nxe³ta¹hxai²hẽ¹la².

9 Nxe²e³nũ²la² Ju²te²a² nũ̱³ka̱³txu¹tai²na² ĩ³ye³kxi²ti³ãn¹jau³kxai³lu¹:

— Wain³sĩn¹na³li¹. Wãn³txi³khai³xai²la¹wi¹. Nxain¹ta¹hxai²hẽ¹la². Nxain¹ta¹ kãin² ki³ha³nain¹ta¹hxai²hẽ¹la².

10 Nxa²ha¹te¹ ĩ³wa²lũ³xi²si¹jau³su² Fe²lis³jah³lo²nu¹ta²kxai³lu² wxa²ye³wxã̱i³ta¹hxai²hẽ¹la². Nxe³ha²kxai³ Pau²lah³lo²nu¹ta²kxai³ ĩ³ye³kxi²te³nah¹lxi¹:

— Fe²lis³jah³lãi³. A²hoh³lxi³si¹lxi¹. A²nũ²a² wain³txi³ sa²hau³kot3sxai¹nhẽ³li¹. Nxe³na¹jut3su² ka³lih³kxi²la²nha² wain³txi³ ĩ³yau¹ũ³nx2ta¹tu¹wi¹. 11 Jã¹nxa¹jut3su² a³lan²ti³hĩ¹nai³tã² ye³ 12 nxe² a³lan²ti³hĩ¹nai³tã² Txa²wã¹sũ̱³na² e³kxi²si¹jau³nũ³su² Je³ru³sa³lẽ²thĩ³na² ã³wi¹ha¹hẽ³li¹. Nxe³na¹ju³ta² ya²la³tu̱³tu̱²na³na¹. Nxet3sxã³ a²nũ²a²nãu³xa² ĩ³wã̱³txi³txai¹nhẽ³li¹. 12 Jã¹nxe³na¹tãu³ai³tã² Txa²wã¹sũ̱³na² sxi²ha² ã³wi¹ha¹tãu³a² yxo²xũ̱n³txi³ ĩ³ye³nxa³ha²kxai³ a²nũ²a²nãu³xa² he¹li³si¹hain¹jau³su² kwa³na³nxa³ha²kxai³ nxe²nxa³hẽ³li¹. Ju³te²a² nũ̱³ka̱³txa² ã³nũ²kxi²thĩ³na² ta̱³nxa² Je³ru³sa³lẽ²thĩ³na² whãi²na¹ nxe²nxa³hẽ³li¹. 13 Nxe³kxa²yu³su² ko̱³nxe³ti³ ti³hit1sain¹jau³su² hxi²kan¹txi³ ĩ³ye³yxo²nũn¹nyhai¹nxa³lho³li¹. 14-16 Nxe³na¹ju³kxai³lu² tũ̱¹ka̱³txai²na² sa²kxai³lu² ko̱³te³kxi²sain¹tũ̱³ka̱³txai²nãn²tu̱³ Moi³se²ah³lo²nu¹tai²na² ũ³wha²li¹txã³nxa² ain³kxi² Sũ̱³na² wãn³txa² ĩ³hen³txi³tũ̱³ka̱³txu¹tai²na² ũ³wha²li¹txã³nxa² ain³kxi² nxe³ai¹nhxai²tai¹ti²tu³wi¹. Nxain¹sxã³ a²nũ²a² ko̱³nxe³thin¹te²sa² ta̱³nxa² wi¹lhin¹te²sa² ta̱³nxa² nxe³te²a² yxo²ha³kxa¹ ya³lu²kxai²nãn²tu̱³ ka³te̱n³su² ĩ³sa²yxau³si¹jau³nũ³su² yxo²ĩ²ain¹te²jai¹ti²tu³wi¹. Nxain¹ka³tu̱³ wah³nxe³kxain¹te²jai¹ti²tu³wi¹. Nxain¹kxa² yã¹nxũn³te²sa¹wi¹. Jau¹xai²na² yxo²ha³kxa¹ yxo²ĩ²nũ³na¹wi¹. Nxa¹ha²kxai³ txa²ẽ¹nãu³ai²na² sa²kxai³lu² Txa²wã¹sũ̱³na² ĩ²sa²ta̱³nxa² a²nũ²a² ĩ²sa²ta̱³nxa² nxe³sain¹sxã³ txa²ẽ¹nãu³ai²na² wi¹lxi³ yxau²xai³nha¹ju³ta² ten³sa³nhai¹. Nxe³na¹kxa²yu³su² Je³su²jah³lai²na² wãn³txa² ã³si³tẽ³kxi²jah¹lo²sa¹wi¹. Nxe³na¹ha²kxai³ Txa²wã¹sũ̱³na² Si³yxau³ka³txai²na² txa²wã¹yah³la²nãu³xu¹tai²na² sa²yxo²we¹tain¹jah¹lain²txi³ sa²yxo²we¹tũ³na¹wi¹. Nxe³na¹ta¹ tũ̱¹ka̱³txai²na² ko̱³te³kxi²sain¹tũ̱³ka̱³txan²tu̱³ nxe³te²na² wãn³txi³kxai³lu¹: “Wãn³txa² Je³su²jah³lai²na² wãn³txa² yxo²ĩ²kxi³ju³ta² wai³nxa³wi¹.” Jau¹xai²na² nxe³ain¹na³li¹. Ain¹kxan²ti³nũ¹ txai²na² sa²kxai³lu² Je³su²jah³lai²na² wãn³txa² yxo²ĩ²te³sa¹wi¹.

17 Nxe³na¹jut3su² kwẽ³kxa² ko³ha¹li¹ ko³ha¹li¹ kwẽ³kon³sxã³ ul²xai³na¹hẽ³li¹. Hã²wxãn³txa³ Je³ru³sa³lẽ²thĩ³na² ã³wa̱³li² ĩ³xi²na¹hẽ³li¹. Nxe³na¹tãu³a² txa²nũ̱³ka̱³txa² ũ³yho³hi²txã³nxa² wã²nhũ¹nxe² Txa²wã¹sũ̱³na² kwa²ũ³hũ¹nxe² nxe³na¹hẽ³li¹. 18 Nxe³sxã³ ã³ta³lu²na¹ti̱³kxai³lu² Txa²wã¹sũ̱³na² sxi²ha² ĩ³ha¹txi²sain¹na²hẽ³li¹. Nxe³sain¹to³ta¹ hai³txi³ ko̱³nxe³tũ̱³ka̱³txa² ã³si³tẽ³kxi²sai¹nxa³ha²kxai³ ã³nhe¹li³na¹ju³ta³la³ yũ²nxa³ha²kxai³ nxe³na¹hẽ³li¹. 19 Nxe³na¹ka³tu̱³ Ju³te²a² nũ̱³ka̱³txai²li² nũ¹ka³na¹ A²si³a³ko³xa² wxã³ain¹te²nũ̱³ka̱³txai²li² thĩ¹nai²na² ĩ³ha¹txi²sain¹na²hẽ³li¹. Nxe³sain¹jut3su² ko̱³to²la³kxi²na¹ke³la³te²kxai³ ĩ³hen³txi³nxai¹nhĩ̱³nx2na³li¹. Yxãn¹ta¹ wxã³ye¹nxai¹nxãn³tai¹. 20 Ye¹nxai¹nxa³kxai²nãn²tu̱³ ti¹ai²li² wxã³ain¹tũ̱³ka̱³txai²na² sa²kxai³lu² Je³ru³sa³lẽ²thĩ³na² ĩ³wã̱³txi³sain¹jau³xai³tã² ĩ²sain¹na²hẽ³li¹. Ko̱³to²la³kxi²na¹ju³ta² yũ³yai¹na¹ke³la³te²kxai³ ĩ³yau¹ũ³sa²si¹hai¹na¹jau³su² kwa³na³txai¹nhẽ³li¹. 21 Jã¹nxa¹jut3su² yau³ka³na³ka³nat3sxã³ ã³te³nai¹nxa³hẽ³li¹. Nxe³na¹te³nah¹lxi¹: “A²nũ²a² ya³lu²te²a² ka³te̱n³ti³ ĩ³sa²yxau³xi²ju³ta³nũ³su² yxo²ĩ²a¹nhai¹.” Nxa¹jau³xai³tã² ĩ³ye³a¹ha²kxai³ hi̱t3sain¹na²hẽ³li¹. Nxe³na¹jau³su² ĩ³ye³ye¹nx2ta¹wi¹. Pau²lah³lo²nu¹ta²kxai³ nxe³ta¹hxai²hẽ¹la².

22 Nxa²ha¹te¹ Fe²lis³jah³lo²su² hi²sen³kxai³lu² Je³su²jah³lai¹tã² wãn³txa² ã³si³tẽ³kxi²kxe³su² ã³ne³wxe³ha²kxai³ hãi¹nxa¹si¹jau³su² kwa³na³te³nah¹lxi¹:

— Klau²ti³o³ Li²si³o³ah³la² wxã³hĩ¹na¹ ãh¹ ĩ³ye³kxi¹nx2ta¹tu¹wi¹. Nxe³ta¹hxai²hẽ¹la².

23 Nxa²ha¹te¹ a²sa³wi³sai²li² ĩ³kwa³na³te³nah¹lxi¹:

— Pau²lah³lai²li² ũ³tĩ̱¹kxi¹xi¹sẽ¹li¹. Yxãn¹ta¹ a²sa³wit3su² wxã³kxai²nãn²tu̱³ hãi¹nxã¹txa²hẽ³li¹. Yain³txi³su² ta̱³nxa² yen³kxi³su² ta̱³nxa² tẽ³sxã³ wxã³kxe³su² ũ³hũ¹txai²li¹. Nxe³ta¹hxai²hẽ¹la². Nxai¹nha²kxai³ Pau²lah³lo²nu¹ta²kxai³ ũ³tĩ̱¹kxi²xi²ta¹hxai²hẽ¹la².

24 Nxa²ha¹te¹ ye³ha¹la² a³lan²tãu³a² Fe²lis³jah³lo²nu¹ta²kxai³lu² wa̱³li²ta¹hxai²hẽ¹la². A²sxe³xa² Tru³si²la³ka³lxi³su² ta¹hxai²hẽ¹la². A²nxe³ta¹ka³lxa² Ju³te²a² nũ̱³ka̱³txa¹ka³lxi³su² ta¹hxai²hẽ¹la². A²nxe³ya³te²na² ã³wxã³ya³ha²kxai³ Pau²lah³lo²nu¹tai²na² ĩ³kaix1te³nah¹lxi¹:

— Je³su² Kris²tu³jah¹lai²na² wãn³txa² yxo²ĩ²kxi³ju³ta² ain³kxi²ti³ten³sa³nhai¹. Nxai¹nha²kxai³ jau¹xai²na² Pau²lah³lo²nu¹ta²kxai³la¹ ĩ³yau¹ũ³ta¹hxai²hẽ¹la². 25 Ĩ³yau¹ũ³jau³kxai³la¹:

— Txa²wã¹sũ̱³na² wãn³txa² wain³txi³ sa²yxo²we¹txa²hẽ³li¹. “Ko̱³nxe³ti³ kãi³ti³ten³sa³nha¹.” Nxĩn¹jau³la³ e³kxi²nha²txa³hẽ¹li¹. Kxãn³nãu³a² Txa²wã¹sũ̱³na² yen³nãu³a¹ kãi³ki̱³kxa² yo³ha² ũ³yho³hi²nẽ³tu¹wi¹. Wi¹lhin¹sxã³ kãi³ta̱³nxa² ko̱³nxe³ti³ kãi³ta̱³nxa² Txa²wã¹sũ̱³na² hxi²ki³kxai³lu² wain³txi³ ũ³yho³hi²xai³nẽ³tu¹wi¹. Nxe³ta¹hxai²hẽ¹la². Nxa²ha¹te¹ Fe²lis³jah³lo²nu¹ta²kxai³lu² jau¹xai²na² ain³kxi²ju³tan¹te²kxa³ya̱³lhu² yu̱h³lxi³khai¹nxe³ju³tan¹te²kxa³ya̱³lhu² ĩ³ye³kxi²te³nah¹lxi¹:

— Hĩ¹na² a³li³xi¹txu¹li¹. Hãi¹nxo³ki̱³tu¹wi¹. Kxãn³ton³sxã³: “Jã¹nxa¹tũ¹xã¹.” Na¹kxai²nãn²tu̱³ ĩ³kaix1txa²ha¹tu¹wi¹. Nxe³ta¹hxai²hẽ¹la².

26 Nxe³ha²kxai³la¹:

— Pau²lah³lai²li² ũ³yho³hi²sain¹kxai²nãn²tu̱³ wi¹wi¹nxa² sa²tã³a¹tũ¹xã¹. A²ẽ¹nãn¹jau³su² ye³ka³lxa¹txi³ ĩ³kaix1so¹sxã³ ĩ³ye³kxi²nhyu¹to³ta¹hxai²hẽ¹la².

27 Nxa²ha¹te¹ ye³ha¹li¹ kwẽ³kon³tãu³a² Por³si³o³ Fes²jah³la² ã³wẽ̱³non³jah¹lo²nũ³su² wxã³ta¹hxai²hẽ¹la². Nxe³ju³tan¹te²kxa³ya̱³lhu² Fe²lis³jah³lo²nu¹ta² hi²sen³kxai³lu² Ju³te²a² nũ̱³ka̱³txai²na² ũ³yhe³wãx3te³lhxã³ ha²kxai³ Pau²lah³lo²nu¹ta²kxai³ ũ³tĩ̱¹kxi²wxe³ain¹ta¹hxai²hẽ¹la².