1 Txa²wã¹sũ̱³na² yxo²ĩ²ki̱³kxai²nãn²tu̱³ ha³lo²a² wah³nxe³ki̱³kxe³khai³nũ³a² ya²la³tu̱³ wxã³tu¹wa². Nxe³sxã³ yen³kxi³khai³xa² ĩ²ki̱³sxa³kxan²ti³:

— Yen³kxi³khai³xai²li² ya²la³tu̱³tã³na¹. Nxe³hĩ̱³ki̱³tã³la². 2 Txa²wã¹si³yah³la²nãu³xu¹tai²na² sa²kxai³lu² Txa²wã¹sũ̱³na² yxo²ĩ²ai¹nha²kxai³ Txa²wã¹sũ̱³na² hi²sen³kxai³lu² wi¹lhin¹sxã³ ĩ²kxain¹ta¹hxai²hẽ¹la².

3 A²wi¹lhĩ¹nu¹tai²na² Txa²wã¹sũ̱³nu²su² te²kxai³lu² hãi¹sxã³ ĩ³ye³ka³tu̱³ txa²wã¹ha³lo²ai²na² ĩ³yũ¹ta¹hxai²hẽ¹la². Nxe³kxe³su² Txa²wã¹sũ̱³na² yxo²ĩ²ki̱³sa²kxai³ ã³ne³wxe³ki̱³tã³la². Nxe³sxã³ yen³kxa² ĩ²ki̱³kxa² he³la³kxa² tẽ³sxã³ yu³tã̱³xa² we¹ta¹hxai²nxa³hẽ¹la². Hãi¹sxã³ a²wãn³txa² ĩ³ye³hĩ¹na¹ ĩ³yũ¹ta¹hxai²hẽ¹la². A²nxe³ju³tai²li² yxo²ĩ²ki̱³tã³la².

4 Nxa²ha¹te¹ A³be²lah³lu¹tai²na² Txa²wã¹sũ̱³na² wãn³txa² yxo²ĩ²ha²kxai³ yen³kxa² tẽ³sxã³ Txa²wã¹sũ̱³na² ũ³hũ¹ta¹hxai²hẽ¹la². Ka³ĩ²ah³lu¹tai²na² yen³kxa² tẽ³sxã³ Txa²wã¹sũ̱³na² ũ³hũ¹nũn³ta¹hxai²hẽ¹la². Yxãn¹ta¹ Txa²wã¹sũ̱³na² yxo²ĩ²ta¹hxai²nxa³hẽ¹la². Nxe³ju³tan¹te²kxa³ya̱³lhu² Txa²wã¹sũ̱³na² yen³nãu³a¹:

— A³be²lah³lai²na² yen³kxa² ã²la² wi¹na³na¹. Yxo²ĩ²sai¹nha²kxai³ wi¹lhin¹te²lo³txa¹xã¹. Yen³kxa² ũ³hũ¹sa³kxa² wi¹lĩ³li²na¹xã¹. Txa²wã¹sũ̱³na² nxe³ta¹hxai²hẽ¹la². Jã¹nxe³jut3su² A³be²lah³lu¹tai²na² kxãn³su² ya³lu²kxan²ti³ nxe³hĩ¹nãn¹te²tu̱³ ĩ³tih³nxe³nẽ³na³la².

5 Nxa²ha¹te¹ E³no²kah³lu¹tai²na² hin¹hĩ¹nũ¹tai²nãn²tu̱³ Txa²wã¹sũ̱³na² yxo²ĩ²ta²hxai³hẽ¹la². Yxo²ĩ²ju³tan¹te²kxa³ya̱³lhu² ya³lu²ta¹hxai²nxa³hẽ¹la². Hãi¹sxã³ Sũ̱³na² hxi²kai²na² ã³sa²so¹nũ²la² Sũ̱³nai²na² ha³lo²ai²nãn²tu̱³ oh³xai²nãn¹ko³xai²nãn²tu̱³ ã³wih¹ta¹hxai²hẽ¹la², ya³lu²nxa³kxan²ti³na². Sũ̱³nai²li² yxo²ĩ²sxã³ ĩ³wi¹lxon³kxi²ha²kxai³ ã³sa²so¹ta¹hxai²hẽ¹la². Txa²wã¹sũ̱³na² ũ³wha²li¹txã³nxa² nxe³te³nah¹lxi¹:

— E³no²kah³lu¹tai²na² ã³sa²so²nxa³ta̱³lxa¹ Txa²wã¹sũ̱³na² yen³nãu³a² ĩ³wi¹lxo³kxi²sa²tẽ³ta¹hxai²hẽ¹li¹. Nxe³ta¹hxai²hẽ¹la². Nxe³ju³tan¹te²kxa³kxai³la¹ yuh³xai²nãn¹ko³xan¹tũ̱³ka̱³txai²na² sa²kxai³lu² ã³te³nain¹kxan²ti³ hai³txi³ ĩ³ha¹txain¹ta¹hxai²nxa³hẽ¹la². 6 Jã¹nxe³jut3su² yxo²ĩ²ki̱³sxa³kxai²nãn²tu̱³ hxi²kan¹txi³ Txa²wã¹sũ̱³na² ĩ³wi¹lxo³kxi²hĩ̱³ki̱³sxa³wa². Nxe³sxã³:

— Txa²wã¹sũ̱³na² ã³tĩ³a¹tũ¹xã¹. Nxe³ki̱³kxai²nãn²tu̱³:

— Txa²wã¹sũ̱³na² ya²la³tu̱³ ka³te̱n³su² yxau²na³na¹. Txa²wã¹sũ̱³nai²li² ã³te³na¹kxai²nãn²tu̱³ wi¹lĩ²sa²sxã³ ain³kxi²sa³tũ¹xã¹. Nxe³ki̱³jau³su² yxo²ĩ²ki̱³kxai²nãn²tu̱³ Txa²wã¹sũ̱³na² ĩ³wi¹lxo³kxi²hĩ̱³ki̱³tã³la².

7 Nxa²ha¹te¹ No³e²ah³lu¹tai²na² te²yã¹nxe³nũn³jah¹lo²su² ta¹hxai²hẽ¹la². Txa²wã¹sũ̱³nu²kxai³lu² wãn³txa² a̱n³txi³jau³su² ha³lo²a² ko̱³ton³kxi³nũ³su² jau³jau¹xai²na² au³ta¹hxai²hẽ¹la². Ko̱³ton³kxi³ju³ta² ĩ²xa³ta̱³lxa¹ Txa²wã¹sũ̱³na² wãn³txa² yxo²ĩ²sxã³ sa²yxo²we¹ta¹hxai²hẽ¹la². Sa²yxo²we¹tũ²la² na³vi²o²tẽ³na² ar²ka³tẽ³na² a²sxe³xa³ka³lxa² whãi²na¹ a²wẽ³ha³lxa² whãi²na¹ ã³wih¹sxã³ yxau³ka³lo³nũ³a² txon³ ã³si³wxe³yah³lxi³ta¹hxai²hẽ¹la². Nxe³te³na¹ kãin² wẽ³hã¹ha²kxai³ ĩ̱³yau³xa² kãin² hũ³tha²kxai³ nxe² ã³si³wxe³ye²ta¹hxai²hẽ¹la². A²nxe³kxan²ta² No³e²ah³la² wẽ³ha³lxi³yu³ta² so¹lxi³ ĩ̱³yau³xa² ka³te̱n³ta² hãu¹yxa²xai³lhxã³ yxau³ah³lxi³ta¹hxai²hẽ¹la². A²nũ²a² a²yxo²ha³kxa¹ ya³lun¹txa²hxan³kxan²ti³nũ¹ No³e²ah³la² wẽ³ha³lxi³yu³ta² so¹lxi³ ka³te̱n³ti³ yxau³ah³lxi³ta¹hxai²hẽ¹la². Txa²wã¹sũ̱³na² wãn³txa³ jau¹xa²kxai³lu² No³e²ah³lu¹tai²na² yxo²ĩ²ha²kxai³ nũ̱³ka̱³txi³ ã̱³xa² yxo²ĩ²ai¹nxa³te²a² nxe³ye²ha²kxai³ nxe³ye²ta¹hxai²hẽ¹la².

8 Nxa²ha¹te¹ A³bra³ãu²ah³lu¹tai²na² sa²kxai³lu² Txa²wã¹sũ̱³na² wãn³txa² yxo²ĩ²ha²kxai³ sa²yxo²we¹ta¹hxai²hẽ¹la².

— Ha³lo²a² tah²ko³nũ³a² ũ³hũ¹nxa²ha¹tu¹wi¹. A³li³sxã³ ã³nxain¹tãu³a² ũ³hũ¹nxa²ha¹jen³nũ³a² wain³txi³ au³ũ¹nxa²ha¹tu¹wi¹. Txa²wã¹sũ̱³na² ĩ³ye³kxi²jau³su² ha²kxai³ A³bra³ãu²ah³lu¹tai²na² yxo²ĩ²ta¹hxai²hẽ¹la². Nxe³te³na¹ ha³lo²a² tah²ko³nũ³a² ai³tĩh³na² ĩ²xa³kxan²ti³ a²si³yah³la²nãu³xu¹tai²na² a²ha³lo²khai³xu¹tai²na² ã³sxã³ ai³ta¹hxai²hẽ¹la². 9 Txa²wã¹sũ̱³na² wãn³txa² yxo²ĩ²sa²tẽ³ha²kxai³ ha³lo²a² tah²ko³xa² Txa²wã¹sũ̱³na² ũ³hũ¹jen³nũ³ai³tã² kwa²hãi¹nxe² yxau² ã³la³kxi²sa²the³ta¹hxai²hẽ¹la². Nxe³sxã³ a²wẽ³sa² I³sa²kah³lu¹tai²la³ha²kxai³ a²sa³wi³sa² Ja³ko²ah³lu¹tai²la³ha²kxai³ ha³lo²a² ko¹xai²na² sxi²ha² ka³yxuh³xa² wã²la² we¹thĩ³na² kwa²hãi¹nxe² yxau² ã³la³kxi²sa²the³tain¹ta¹hxai²hẽ¹la². Txa²wã¹sũ̱³na² wãn³txa² jau¹xu¹tain²txi³ ain³kxi²sxã³ yxo²ĩ²ain¹ta¹hxai²hẽ¹la². 10 Jã¹nxe³jut3su² A³bra³ãu²ah³lo²kxai³lu² Txa²wã¹sũ̱³na² sxi²je³na² ta²hĩ³na² wah³nxe²sa²thet3xai³ta¹hxai²hẽ¹la². A²nxe³thĩ³nai²na² Txa²wã¹sũ̱³na² hi²sen³su² thĩ³nũ³ai²na² ĩ³hau³kot3sãn²nũ²la² txon³ta¹hxai²hẽ¹la². A²nxe³thĩ³na² txah³lxa³kxa³txa² a²si³yxau³tãu³a² a̱u³tũ³whxe³ha²kxai³ hxi²kan¹txi³ ã³kho³te²sxa³yu²hẽ³la². Jã¹nxe²na³la². Nxe³thĩn³thĩ¹nai²li² A³bra³ãu²ah³lu¹tai²na² wah³nxa³kxi²xai³ta¹hxai²hẽ¹la².

11 Nxa²ha¹te¹ Sa²ra³ka³lxu¹tai²na² Txa²wã¹sũ̱³na² wãn³txa² yxo²ĩ²ha²kxai³ a³ka³lxon¹kxan²ti³ Txa²wã¹sũ̱³nu²su² te²kxai³lu² wãi²lxa² we²nxi²ki³lxo³nxe³yah³hĩ¹na¹ wẽh³ni²ta¹hxai²hẽ¹la². A³bra³ãu²ah³la² wẽ³sa² wẽh³ni³ya³ta¹hxai²hẽ¹la², wẽh³ni³kxi³je³na² wa³to²hi²kxan²ti³na².

— Txa²wã¹sũ̱³na² wãn³txa² ĩ³ye³kxi²sa²jau³xai³tã² kãi³ũ¹sa³tũ¹xã¹. Yxo²ĩ²a¹xã¹. Ta¹ka³lxu¹tai²na² nxe³ta¹hxai²hẽ¹la². 12 Nxe³ha²kxai³ A³bra³ãu²ah³lu¹tai²na² yah³lon¹khai¹nxe³sxã³ hin¹kxan²ti³ jah¹la²kxai³lu² a²nũ²a² ka³na³ka³na³kxan²ti³nu¹ ka³lxa¹khai¹nxe³sxã³ a²ne³tah²nãu³lon³ta¹hxai²hẽ¹la². Oh³sĩ̱³na² i³la³ka² wẽ³ha³lxa² ka³lxa¹kxe³jã¹nxe² a²ne³tah²nãu³lon³ta¹hxai²hẽ¹la². Te²yã¹nxe³sxã³ ka³wã³lxa² kxun²nãu³a² ka³yã̱³la³nũ̱³a² ki³ka³lxa¹ti³te²jai¹tu³wa². Nxe³kxa² yã¹nxe³sxã³ a²ne³tah²nãu³lon³ta¹hxai²hẽ¹la².

13 Jã¹nxe³jut3su² tũ̱¹ka̱³txi³nãu³xai²na² a²yxo²ha³kxa¹ yah³lon¹sxã³ a³ka³lxon¹sxã³ nxain¹nũ²la² ya³lu²te³lhxã³ tãu³a² ã²la² kan²txi³ yxo²ĩ²ain¹ta¹hxai²hẽ¹la². Yen³kxi³nũ³a² Txa²wã¹sũ̱³na² au³ũ¹hain¹kxai³tã² so¹kxain¹ta¹hxai²nxa³hẽ¹la². Hãi¹sxã³ u²ten³sa²tã³kxi³hũ̱³nxe² a²yen³kxa² u²lan¹te²hũ̱³nxe² so¹kxain¹ta¹hxai²nxa³hẽ³la².

— Yuh³xan¹ko³xai²na² yxau²xai³ko³xai²na² hai³txi³ txa²ha³lo²khai³sxa³wi¹. Hãi¹sxã³ ai³la¹ko³xai²la¹wi¹. Ten³sai¹nhxai²nxa³hẽ¹li¹. Nxe³ta¹hxai²hẽ¹la².

14 Nxe³sxã³ jau³jau¹xai²na² nxe²e³kxain¹tũ̱³ka̱³txa² e³la¹ ha³lo²a² tah²ko³xa² yxau²khai³ain¹ko³nũ³a² ã³ten³ye¹nx2tain¹na³la². 15 Hai³txi³ ta³ko¹xai²na² yxau³ai¹nhxai²ko³xai³tã² a³li³ain¹ko³xai³tã³ ã³wa̱³li²sxã³ yxau³xain¹te³lhxã³ te³nain¹ta¹hxai²nxa³hẽ¹la². Te³nain¹ke³la³te²kxai³ ã³wa̱³lai¹nhĩ̱³nx2na³la². Nxe³yãn¹ta¹ te³nain¹ta¹hxai²nxa³hẽ¹la². 16 Nxe³yãn¹ta¹ ha³lo²a² yxau³khai³xain¹ko³nũ³a² ã²la² wi¹ko³nũ³a² ã³te³nain¹ta¹hxai²hẽ¹la². Oh³xan¹ko³xa² ã³te³nain¹ta¹hxai²hẽ¹la². Oh³xan¹ko³xa² ã³te³nai¹nha²kxai³ Txa²wã¹sũ̱³nu²su² te²kxai³lu² ãu²li²te²sai¹nxa³wa².

— Txa²wã¹sũ̱³nu²su² nhi¹lxi¹. Nxe³si¹hain¹kxan²ti³ ãu²li²te²sai¹nxa³wa². Nxe³kxa²ya̱n³ti³tu̱³ti¹ sxi²ha² oh³xan¹thĩ³na² ãu¹la³kxi²nũ¹hain¹ta¹hxai²hẽ¹la².

17 Nxa²ha¹te¹ A³bra³ãu²ah³lu¹ta²kxai³lu² Txa²wã¹sũ̱³na² wãn³txa² yxo²ĩ²ta¹hxai²hẽ¹la². Nxe³hĩ¹nu¹ta²kxai³lu² Txa²wã¹sũ̱³na² sa²kxai³lu² A³bra³ãu²ah³lu¹tai²na² yxo²ĩ²kxe³ju³ta² a³ya³txi²te³lhxã³ ta¹hxai²hẽ¹la².

A³bra³ãu²ah³la² wẽ³sa² a³lxi²ju³ta² ã³sen³sai¹sxã³ a³lxi²sain¹te²la¹ku¹. Nxa¹nha¹. Nxe³sxã³ a²wẽ³sa³khai³xa² I³sa²kah³la² sa²kxai³lu² tẽ³nũ²la² Txa²wã¹sũ̱³na² ũ³hũ¹xi²si¹jau³su² ĩ³ya²lu¹te³lhxã³ ta¹hxai²hẽ¹la². A²nxe³jut3su² Txa²wã¹sũ̱³na² hi²sen³kxai³lu² ĩ²kxi²nũ²la² hãi¹nxã¹si¹jau³su¹ ĩ³ye³kxi²ta¹hxai²hẽ¹la². A²nxe³jah¹lai²na² sa²kxai³lu² kãin² a²ne³tah²nãu³lon³kxe³nũ³su² ha²kxai³ Txa²wã¹sũ̱³na² a²yxo²a² au³ta¹hxai²hẽ¹la². I³sa²kah³lu¹tai²li² a²ki³lha³lxan²tu̱³ ka³na³ka³na³te²a² so¹lxi³ wẽh³ni²sxã³ wet1ja¹ta¹hxai²ti³ai¹ti²tu³wa². Nxe³kxe³su² sa²wa²lho¹xi²sxã³ ain³kxi²xi²kxan²ti³ wẽ³sa² nũ¹ta² ki³lha³lxa²khai³xa²kxai³lu² Txa²wã¹sũ̱³na² ũ³hũ¹te³lhxã³ nxe³ta¹hxai²hẽ¹la². 18 Kxã³nhxĩ¹nai²kxai³lu² Txa²wã¹sũ̱³na² e³kxi²ta¹hxai²hẽ¹la². A³bra³ãu²ah³la² a²ne³nxẽ³na² ĩ³ye³kxi²te³nah¹lxi¹:

— A³bra³ãu²ah³lãi³. Wxa²ki³lha³lxa² I³sa²kah³la² so¹lxi³ we¹tin¹jah¹la² ka³lxa¹tũ̱³ka̱³txi³su² txon¹tu¹wi¹. Kãin² a²ne³tah²nãu³lot3tu¹wi¹. Nxe³ta¹hxai²hẽ¹la². 19 Nxa²ha¹te¹:

— Txa²wã¹sũ̱³na² hxi²kai²na² sa²kxai³lu² txa²wẽ³sa² ya³lu²kxi²sa²kxan²ti³ ka³te̱n³ta³ ĩ³sa²yxau³xi²sxã³ ka³te̱n³yah³lo²nũ³a² ũ³hũ¹xi²sa³tũ¹xã¹. A³bra³ãu²ah³lu¹tai²na² nxe³ta¹hxai²hẽ¹la². Nxe³ka³tu̱³ti¹ a²nũ²a² ya³lu²te²nãu³xai²na² I³sa²kah³lo²kxai³lu² ka³te̱n³ta³ ĩ³sa²yxau³xi²kxe³hũ̱³nxe² A³bra³ãu²ah³lo²kxai³lu² ka³te̱n³ta³ so¹kxi²xi²ta¹hxai²hẽ¹la².

20 Nxa²ha¹te¹ I³sa²kah³lo²kxai³lu² yxo²ĩ²ha²kxai³ a²wẽ³ha³lxi³khai³xa² ha¹lin¹te²kxai³lu² tẽ³sxã³ yen³kxa² wi¹kxa² ũ³hũ¹ju³ta³nũ³a² au³ya³ta¹hxai²hẽ¹la². Wẽ³ha³lxa² a²ĩ³lxa² Ja³ko²ah³lo²su² ha²kxai³ E³sa³u²ah³lo²su² ha²kxai³ nxe³ya³ta¹hxai²hẽ¹la².

21 Nxa²ha¹te¹ te¹yã¹nxe³sxã³ Ja³ko²ah³lu¹tai²na² yxo²ĩ²jah¹lo²su² ta¹hxai²hẽ¹la². A²nxe³jah¹la² yah³lon¹sxã³ ya³lu²te³lhxã³ tãu³u¹tai²na¹ Jo³se²ah³lu¹tai²na² wẽ³ha³lxa² a²ne³tah²nãu³lot3te³lhxã³ ĩ³kaix1ta¹hxai²hẽ¹la². A²nxe³te²na² tẽ³lxi²sxã³ wãn³txa² wi¹jau³xa² wi¹lxon³kxi²nũh¹ju³ta³nũ³a² au³ya³ta¹hxai²hẽ¹la². A²nxe³jah¹la²kxai³lu² Ja³ko²ah³la²kxai³lu² tãu²nxa² ũ³haik1ka³txa² ũ³hĩ¹nha²sxã³ yxau³sxã³ Txa²wã¹sũ̱³na² ĩ³sa²nẽn¹kxi²ta¹hxai²hẽ¹la².

22 Nxa²ha¹te¹ Jo³se²ah³lu¹tai²na² yxo²ĩ²nũn³ta¹hxai²hẽ¹la². Nxe³sxã³ yah³lon¹sãn²nũ²la² ya³lu²ju³ta² ya̱u³son³tãu³a¹ a²sa³wi³ha³lxi³nũ̱³ka̱³txa² ĩ³kaix1sxã³ ĩ³ye³kxi²ta¹hxai²hẽ¹la². Ĩ³ye³kxi²sxã³ au³ain¹te³nah¹lxi¹, I³sa³e² a²nũ̱³ka̱³txa² E³ji²ta²ko³xa² a³li³sxã³ ih³hain¹ju³ta³nũ³a² au³ũ¹hain¹ta¹hxai²hẽ¹la². Au³ũ¹hain¹ka³tu̱³ti¹:

— Txai²li² ya³lu²na¹ju³ta² ya̱u³son³na³li¹. Nxe³na¹ha²kxai³ ya³lu²na¹kxan²ti³ ta²ko¹xai²na² E³ji²ta²ko³xai²na² a³li³hxan³yah³lxin¹tãu³a¹ txa²su³a² ya³lu²na¹ta³su³a² ã³tẽ³jah¹lxi³hẽ¹li¹. Nxe³ta¹hxai²hẽ¹la².

23 Nxa²ha¹te¹ Moi³se²ah³lu¹tai²na² a²wĩ³na² a²hã³ka³na² khai³su² ye³te²kxai³lu² a²wẽ³sa² Moi³se²ah³lo²kxai³lu² kwẽn¹ta² a³li³lah¹jah¹la² so¹sxã³ hãi³a² sa²no¹wxe³ya³ta¹hxai²hẽ¹la². Txa²wã¹sũ̱³na² yxo²ĩ²ya³ha²kxai³ nxe³ya³ta¹hxai²hẽ¹la². Nxe³sxã³ i³la³ka² ki³ha¹li¹ ka³na³ki¹ sa²tã³tĩ¹tãu³a² hãi³a² sa²no¹ya³ta¹hxai²hẽ¹la².

— Wẽ³sai²na² wi¹khaix1te²la¹xã¹. Ha³lo²a² a²wa³kxẽn³yah³lai²na² wãn³txi³su² ĩ³ye³kxi²sain¹jau³xai³tã²: “Wxa²wẽ³ha³lxa² in³txi³su² kxai²nãn²tu̱³ su²lhã³jah¹lxi³hẽ¹li¹.” Nxe³jau³xai³tã² yu̱h³lxi³ya³sa²nxa³nha¹. Sa²yxo²ã³ya³ha¹tũ¹xã¹. Ya³jau³su² Txa²wã¹sũ̱³na² yxo²ĩ²ya³ha²kxai³ nxe³ya³ta¹hxai²hẽ¹la².

24 Nxa²ha¹te¹ kxã³nãu³a¹ Moi³se²ah³lu¹tai²na² in³txi³lon³tãu³a¹ Txa²wã¹sũ̱³na² wãn³txa² yxo²ĩ²ha²kxai³ a²ẽ¹nãn¹jau³kxai³lu¹:

— Fa³ra³o²ah³la² a²ka³ne³lxai²na² wẽ³sa²ki³lot3sa²ju³ta² ten³sa²nxa³nha¹. óna¹a¹tũ¹xã¹. 25 I³sa³e² nũ̱³ka̱³txa² Txa²wã¹sũ̱³na² nũ̱³ka̱³txi³su² ha²kxai³ kãin² khãuh³lxa³txi³nyhain¹kxan²ti³ te²yã¹nxe² khãuh³lxa³txi¹nhain¹kxa² yã¹nxe² nxe³ju³ta² ten³sa³nha¹. “Ko̱³nxe³ti³ kãi³a¹kxe³su² ĩ³wi¹lxo³kxi²na¹tũ¹xã¹.” Nxe³na¹jau³su² ten³sa²nxa³nha¹. 26 Nxe³sxã³ E³ji²ta²ko³xa² a²wa³kxẽn³yah³lai²na² sa²kxai³lu² a²yen³kxa² ũh³wxe³ain¹kxa² a²yxo²ha³kxa¹ ũ³hũ¹sain¹kxan²ti³ ten³sa²nxa³nha¹. Txa²wã¹sũ̱³na² wa³ka³la² o²la³kxi²na¹ju³ta² so¹lxi³ ten³sa³nha¹. Nxe² o²la³kxi²na¹kxai²nãn²tu̱³ khãuh³lxa³txi³sain¹ta̱³nxa² ko̱³te³kxi²sain¹ta̱³nxa² nxe³sain¹ju³ta³nũ³a² ã²la² wai³nhĩ̱³nx2na³na¹. Kxãn¹ton³tãu³a¹ a²yo³yhu³ta² wain³txi³ ũ³hũ¹sa³tũ¹xã¹. Txa²wã¹sũ̱³na² ũ³yho³hi²sa²ju³ta³nũ³a² so¹lxi³ ten³sa³nha¹. Moi³se²ah³lu¹tai²na² nxe³ta¹hxai²hẽ¹la².

27 Nxe³ka³tu̱³ hã²wxãn³txa³ E³ji²ta²ko³xa² a³li³ta¹hxai²hẽ¹la². Txa²wã¹sũ̱³na² wãn³txa² yxo²ĩ²ha²kxai³ Moi³se²ah³lu¹ta²kxai³lu² a³li³ta¹hxai²hẽ¹la². E³ji²tan¹ko³xa² a²wa³kxẽn³yah¹lu¹tai²li² kãin² ĩ³a̱n³ta³kxi²kxan²ti³ hai³txi³ ĩ³yu̱h³lxi³ta¹hxai²nxa³hẽ¹la². Txa²wã¹sũ̱³na² hxi²kan¹txi³ ĩ²ki̱³sxa³jah¹lai²li² ĩ²kxi³te²hũ̱³nxe² ya³lo³txi²sxã³ yxau²xai³ta¹hxai²hẽ¹la². 28 Jã¹nxe³tãu³a² yxo²ĩ²ha²kxai³ Txa²wã¹sũ̱³na² wãn³txa² sa²yxo²we¹ta¹hxai²hẽ¹la². Sa²yxo²we¹te³an¹jau³kxai³lu²:

— Ka³yxuh³xa² wi¹te²a² a²ti³ha²yau³xa² tẽ³sxã³ sxi²ha² a²yxo²a² a²yxo²hẽt3si²ka³txa² ũ³to̱¹la³kxi¹nha²kxai³ sxih²yxo²a² a²yxo²ka³kxi²ka³txa² ũ³to̱¹la³kxi¹nha²kxai³ a²ti³ha²yau³xa² tẽ³sxã³ kãi³jah³lxi³hẽ¹li¹. Sa²yxo²wet1sah¹lxi³hẽ¹li¹. Sa²yxo²wet1sah¹lxin¹kxai²nãn²tu̱³ wi¹lhin¹sxã³ yxau³yah³lxin¹tu¹wi¹. Yxãn¹ta¹ sa²yxo²wet1sah²lxan³kxai²nãn²tu̱³ wxa²wẽ³sa² in³txa² wẽ³sa² hxi²kan¹te²nãu³xa² a²yxo²ha³kxa¹ ĩ³ya²lu¹tai¹nha³ta²wi¹. Yxãn¹ta¹ a²ti³ha²yau³xai²li² sxi²ha² ũh³yxo²hẽ¹jah³lxin¹kxai²nãn³tu̱³ ĩ³ya²lu¹tain¹ju³ta³nũ³a² yũ²nxa³lho³li¹. Txa²wã¹sũ̱³na² wãn³txa² kxã³nxai³kxai³ txa¹hxai²hẽ¹ nxe³jau³kxai³lu² yxo²ĩ²ha²kxai³ wain³sxã³ kãi³ta¹hxai²hẽ¹la².

29 A²lan²nũ³tãu³kxai³lu² Txa²wã¹sũ̱³na² wãn³txa² yxo²ĩ²ha²kxai³ Moi³se²ah³lu¹tai²na² hi²sen³kxai³lu² I³sa³e² nũ̱³ka̱³txa² a²yxo²ha³kxa¹ ĩ̱³ye³na² kah³je³na² ĩ³yxo²ha³ti³sa¹yah³lxi³ta¹hxai²hẽ¹la². Ĩ̱³ye³na² tĩh³na² ĩ³nxũ²kwa̱i³hai¹tĩh³na² ĩ³nxũ²kwa̱i³tet2tĩh³nu³su² ha²kxai³ ĩ³yxo²ha³ti³sa¹yah³lxi³ta¹hxai³hẽ¹la². Nxe³nxa²ha¹te¹ E³ji²ta²ko³xan¹tũ̱³ka̱²txa² ĩ³hi²txi²nyhain¹sxã³ a²ẽ¹nãn¹jau³xa² nxe³te³nah¹lxi¹:

— I³sa³e² nũ̱³ka̱³txai²na² ĩ̱³ye³na² ĩ³nxũ²kwa̱i³hai¹tĩh³na² yxo²ha³ti³lhi³ain¹na³na¹. Te²a² yã¹nxũ³na¹tũ¹xã¹. Ain¹jau³su² kxan²ti³ ã³nxai³te²i³ ĩ̱³ye³na²kxai³lu¹ ĩ³wa³nũ³kxi²xi²nha²te³nah¹lxi¹ ãn³si³hẽ¹tũ̱³ka̱³txa² ĩ³lo³nxe² ĩ³ya²lun¹ta² hxa³nain¹ta¹hxai²hẽ¹la².

30 Nxa²ha¹te¹ kwẽ³kon³ ka³lxa¹tãu³ãn²tu̱³ Je³ri³ko²thĩ³na² ko̱³nxe³ti³ kãi³yah³lxi³thĩ³na² ĩ³ki³hain³kxain¹ta¹hxai²hẽ¹la². Ĩ³ki³hain³kxi²sxã³ ye³ha¹li¹ ye³ha¹li¹ ye³ha¹li¹ ka³na³ki¹ a³lan²tãu³a² ĩ³ki³hain³kxi²xai³ain¹ta¹hxai²hẽ¹la². Txa²wã¹sũ̱³na² wãn³txa² yxo²ĩ²ai¹nha²kxai³ nxe² kãi³ain¹ta¹hxai²hẽ¹la². Nxe³te²kxa³kxa¹ sxi²je³nai²na² ki³tã̱¹kxi²nha²thĩ³na² kĩ³kxan²ti³ wã²nxũh¹lxi³sxã³ ã³yxun¹na³ah³lxi³ta¹hxai²hẽ¹la². 31 Nxe² ã³yxun¹na³ah³lxi³nũ²la² Je³ri³ko²thĩ³na² yxau²xai³tũ̱³ka̱³txai²na² ã³ya²lu¹ta³lxi²hxa³jah³lxi³ta¹hxai²hẽ¹la². Hãi¹nxe³sxã³ Ra³a²ba³ka³lxa² so¹lxi³ hin¹ye²ta¹hxai²hẽ¹la². Nxe³ta¹ka³lxa² yãn³txai²na¹ ko̱³nxe³thin¹sxã³ o²la³kxi²ta¹ka³lxu³su² ta¹hxai²hẽ¹la². A²nxe³sxã³ ta¹ka³lxa²kxai³lu² Txa²wã¹sũ̱³na² wãn³txa² yxo²ĩ² ã³si³wxe³ha²kxai³ I³sa³e² nũ̱³ka̱³txa² a²in³txai²na² sa²no¹wxe³ha²kxai³ wi¹lhin¹sxã³ kãi³ũ¹hain¹ta¹hxai²hẽ¹la². Nxe³ju³tan¹te²kxa³ya̱³kxai³lu² hin¹ye²ta¹hxai²hẽ¹la².

32 Nxe³nxa²ha¹te¹ yxo²ĩ²tũ̱³ka̱³txu¹tai²na² ka³lxa¹txi³lon³ta¹hxai²hẽ¹la². Nxe³yãn¹ta¹ a²yxo²ha³kxa¹ ĩ³yau¹ũ¹nx2ta¹ju³ta² hxi²kan¹sa²nxa³nha²wa². Ha³lo²a² a³lu²xa³wa². Ji³ti³ãu²ah³lu¹tai²na² Ba³ra²kah³lu¹tai²na² Sã³sãu²ah³lu¹tai²na² Je²tah³lu¹tai²na² Ta³vi²yah³lu¹tai²na² Sa³mu³e²lah³lu¹tai²na² Txa²wã¹sũ̱³na² wãn³txa² ĩ³hen³txi³tũ̱³ka̱³txu¹tai²na² nxe³yah³lxi³sxã³ Txa²wã¹sũ̱³na² wãn³txa² yxo²ĩ²yah³lxi³te²nãu³xa² ka³lxa²on³yah³lxi³ta¹hxai²hẽ¹la². 33 Nxe³sxã³ yxo²ĩ²ai¹nha²kxai³ a²ko̱¹ko̱¹nũ̱³ka̱³txa² nũ̱³kxũn³khai¹nxe³tũ̱³ka̱³txi³su² nxain¹kxan²ti³ wa³ka³ton³yah³lxi³ta¹hxai²hẽ¹la². Wain³ju³ta² kãi³ai¹nha²kxai³ Txa²wã¹sũ̱³nai²na² kãi³ũh¹ju³ta³nũ³a² au³ũ¹hain¹jau³xai³tã² ũ³hũ¹ain¹ta¹hxai²hẽ¹la². Ka³yxuh³xa² ha³nxeh³lxi³te²a² le³ãu²su¹ nxe³hxai²na²hẽ³la². A²nxe³te²a² a²yxo²a² Txa²wã¹sũ̱³na² hxi²ka² kwa² ũh³yxo²tĩ̱¹ha²kxai³ a²nũ²a² hxi²kan¹ti³ ĩ³so¹jĩ²ta¹hxai²nxa³hẽ¹la². 34 Ha³nxe²a² i̱³tho³xa² ũ³he³nha³kain¹kxan²ti³ hai³txi³ ã³ni̱³xa³ha²kxai³ wãn²nxa³ha²kxai³ nxe³ta¹hxai²hẽ¹la². A²nũ²a² ã̱³xa² yxo²ĩ²te²na² a²ko̱¹ko̱¹nũ̱³ka̱³txa² hi³ki²a³la² ha³nxeh³lxi³ka³txa² tẽ³sxã³ wxã³kxan²ti³ ka³te̱n³ti³ ih³sau³nain¹ta¹hxai²hẽ¹la². A²nũ²a² ã̱³xai²na² sa²kxai³lu² hxi²tha²on³khai¹nxe³kxan²ti³ Txa²wã¹sũ̱³na² wãn³txa² yxo²ĩ²ai¹nha²kxai³ ĩ³nũ³kxũn³tain¹ta¹hxai²hẽ¹la². A²nũ²a² ã̱³xai²na² sa²kxai³lu² a²ko̱¹ko̱¹nũ̱³ka̱³txa² he¹kxi²te³lhxã³ wxã³kxai²nãn²tu̱³ nũ³kxũn³txi³ sa²hxi²ka¹tain¹ta¹hxai²hẽ¹la². Wa³nũt3tũ̱³ka̱³txa² wxã³sxã³ wa³ka³ti³lo³te³lhxã³ wxã³kxan²ti³ ih³hain¹ta¹hxai²hẽ¹la². 35 Te²yã¹nxe³jut3su² tu¹txi³nãu³xai²na² sa²kxai³lu² a²wẽ³ha³lxa² ya³lu²kxi²tai³tã² ka³te̱n³su² ĩ³sa²yxau³xain¹ta¹hxai²hẽ¹la², yxo²ĩ²ai¹nha²kxai³la². Yxãn¹ta¹ ã̱³xai²na² sa²kxai³lu² Txa²wã¹sũ̱³na² wãn³txa² ã³na¹si¹jau³su² ĩ³khãuh³lxa³tain¹yah³lxi³ta¹hxai²hẽ¹la²:

— Txa²wã¹sũ̱³na² ã³na¹yah²lxan³kxai²nãn²tu̱³ wã²nhxa³txa²lxa¹tu¹wi¹. Nxe³jau³xai²na² ã²la² ain³kxain¹kxan²ti³ Txa²wã¹sũ̱³na² yxo²ĩ²ain¹kxe³su² ã³na¹ain¹ta¹hxai²nxa³hẽ¹la².

— Oh³nãu³nũ¹ka³na¹ kxã³nãu³a¹ ka³te̱³na² wi¹yxau³na¹ju³ta³nũ³a² wah³nxa¹tũ¹xã¹. A²ẽ¹nãn¹jau³su² ta¹hxai²hẽ¹la². 36 A²nũ²a² ã̱³xai²na² sa²kxai³lu² ko̱³te³kxi²nũ¹hai¹nha²kxai³ ã̱³xai²na² po¹na² wã²la² tẽ³sxã³ u³kxi²tĩh³na² wet1sãn²nũ²la² khãuh³lxa³txi³sxã³ ĩ³ta³lo³wai¹tũ¹hai¹nha²kxai³ a²nũ²a² ã̱³xai²na² sa²txa̱i³kxi²sãn²nũ²la² sxi²ha² kan²thĩ³na² so¹sxã³ ũ³whi¹hi² nxe³sxã³ ũ³tĩ̱¹kxain¹yah³lxi³ta¹hxai²hẽ¹la². 37 A²nũ²a² ã̱³sa²nũn³te²na² sa²kxai³lu² yxo²ĩ²ai¹nha²kxai³ txah³lxa³kxa² tẽ³sxã³ ã³nan³sxã³ ã³ya²lut1txa³lxi³ta¹hxai²hẽ¹la². Ã̱³xai²na² sa²kxai³lu² se³ho²ta²ka³lo³a² tẽ³sxã³ ũ³ha³la³jo³li² ya²lu¹tain¹ta¹hxai²hẽ¹la², yxo²ĩ²ai¹nha²kxai³la². Ã̱³xai²na² sa²kxai³lu² ko̱³nxe³ti³ kãi³sa̱in³si¹nyhain¹ta¹hxai²hẽ¹la², Sũ̱³na² wãn³txa² sa²yxo²ã³si¹hain¹jau³sa³. Ã̱³xai²na² sa²kxai³lu² hi³ki²a³la² tẽ³sxã³ ũ³ja³lu³kxi²sxã³ ũ³yha³lu¹txa³lxi³yhain¹ta¹hxai²hẽ¹la², yxo²ĩ²ai¹nha²kxai³la². Ã̱³xai²na² sa²kxai³lu² wã²la²ka³lo³la³ yũ²ai¹nxa³ha²kxai³ o³ve²a² wã²la² tẽ³i² ka³bri²ta² wã²la² tẽ³i² nxain¹sxã³ ũ³whi²kxi²nha²ka³lo³a² we¹tain¹ta¹hxai²hẽ¹la². Ã̱³xai²na² sa²kxai³lu² he³ja³lu²jut3su² ha²kxai³ nxe³ta¹hxai²hẽ¹la². Ãh¹ ã̱³xai²na² sa²kxai³lu² kãin² ĩ³khãuh³lxa³txai¹nha²kxai³ ãh¹ ã̱³xai²na² sa²kxai³lu² ko̱³nxe³thin¹sxã³ kãi³ũ¹hai¹nha²kxai³ nxe²xai³nyhain¹ta¹hxai²hẽ¹la², yxo²ĩ²ai¹nha²kxai³la². 38 Ha³lo²ai²na² a²nũ²a² yũ²nxa³ko³xai²na² ã³nxai³sxã³ ho³hai¹nha²kxai³ ain¹ta¹hxai²hẽ¹la². Wã³la³ka³tẽ¹na² yxau³ai¹nha²kxai³ kxĩh³nxẽ¹na² yxau³ai¹nha²kxai³ nxain¹ta¹hxai²hẽ¹la². Wi¹lhin¹tũ̱³ka̱³txi³su² ha²kxai³ hxi²kan¹ti³ yuh³xai²nãn¹te²a² hxi²ki³kxai³lu² ã³te³nain¹ta¹hxai²nxa³hẽ¹la².

39 Jã¹nxe³jut3su² tũ̱³ka̱³txai²na² a²yxo²ha³kxa¹ Txa²wã¹sũ̱³na² yxo²ĩ²ai¹nha²kxai³ Txa²wã¹sũ̱³nu²su² te²kxai³lu² wi¹lhin¹sxã³ a³ya³tain¹ta¹hxai²hẽ¹la². Nxain¹kxan²ti³ yen³kxa² wi¹khai¹nxe³ju³ta³nũ³a² au³hxai²kxai³tã² so¹kxain¹ta¹hxai²nxa³hẽ¹la². 40 Nxe³yãn¹ta¹ Txa²wã¹sũ̱³na² hi²sen³kxai³lu² ha³lo²a²nũ³su² ã²la² wi¹ju³ta³nũ³su² ã²la² ãu¹la³kxi²nũ¹nhẽ³ta¹hxai²hẽ¹la². Nxe³sxã³ tũ̱¹ka̱³txai³ta³lxi³ txa²wa¹kxi³na¹xain²txi³ a²wi¹lhin¹si¹ki̱³jau³su² ta³lu³ti²nũ¹nhẽ³ta¹hxai²hẽ¹la².