TAITAS
Taitason Vuak Amur
Taitas fu e Jius bakin revo fu For vuak fu nijaimo ijia fu Jesu Kurais ma vierafen. Regavo For fu Godon vuak iji abe kuardiaoinma ijia Taitas fu fusik oin. Regavo For fu Taitas kuamga fu tavan nokarok (2) Korint ijia vain. Regavo rad For fu Taitas kuamga fu e ai Kurit saof uf ijia moik be daturaiko namo ijia karine God ma vierafejo ijiebuon e nigen ren. Ijefuon fu fas igi isoime Taitas nijame e iji bu kenva bu e God ma vierafejo ijiebuon e nigen renva iji kuardain. Regavo madu e iji vuak kufui nijaidiavo ijigam e God ma vierafejo bu unam ma ijia kekfuon iji nijaime kuardain.
Taitason vuak kafokafo fu isoinma ijin
1:1-4 For fu Taitas bieme anainma ijin.
1:5-16 E iji bu e nigen rekfuon iji buka e ma ijia kekfuon ijin.
2:1-15 E kafokafo God ma vierafejo ijiebuon vuak ijin.
3:1-11 Unam izeg e ma vierafejo bu kariokfuon ijin.
3:12-15 For tavan rad fu anadia vuak kuardiainma ijin.
1
1 Na For nar fas igi isoime Taitas a nijav. Na Godon ikreoknum vo Jesu Kuraison vuak abe nijaidiaoijo ijefuon bu na afasorno kiev. Regavo naiji fun Godri imut bijieme e iji fur imut bijiainma na ijin ifejdiav. Na bu ifejdiaga bu una buk akaij ijia vuak ma iji faivknum ma vierafene maturaime karivak.
2 Regavo vuak ijefuon gireg ma iji izeg no rad Jesuna varur gufia ma karivakfuon no iji abekfuon. Regavo ur moikigi ba amarenma ijia God e iti kufui bakin ijar rad no funa ma karivakfuon iji fun kuain. 3 Regavo God e iji no karaunuinma iji fun tavan ma ijia vuak fuon na nijaidien. Fu na nijaidiega nar vuak fuon abe kuaime samafrega e bu vuak fuon ma iji mukorigia faim vierafek. 4 Regavo Taitas aiji a farinun nar nafenva igekin. Ijefuon maiji tavan iji na Jesu Kuraison a kuardainva ijia aka izeg nar ma vierafejo ijeg ak aka ma vierafen. Ijefuon na vierafe God Asoinuvuon ijiga Jesu Kurais e iji no karaunuinva ijieb tavan bog a ma redame mukorigia samuagdake a afuime fiokfuon.
Taitas fu ai Kurit ijia ik reoinma ijin
5-6 Regavo anej ma iji irerafuon aiji na moik Kurit ijia uname ruainva iji a ik buin na ijia are ruainva a iji re barekafa na iji uname ruain. Regavo e sos samuakfuon iji a mai besubesum ijia kekfuon. Regavo vuak irerag na a kuardainva iji ni mukoi vierafe. A vierafekin tavan iji a e sos samuakfuon iji kekma aka e iji fuka unam maturainma ijia kegoino ga bara besum abenma iji abekfuon. Revo afijaf buka Jesu ma vierafeknum eofijaf igiavo ga unam ise kafokafo rejo bakin ijia game abene.
7 Regavo vierafe e iji sos samuakfuon iji fu Godon ik iji samuakreno ijefuon fub ise kafo reok. Regavo e iji fub tavan bog vierafero fu fur e bomanaro aroikarak. Regavo e iji fuka ba migegare uri zieknum do kugin ioknum bijaimoknum ga ire uruvana fuon karkafa vierafeno ijin. 8 Regavo fuka e iji oimardiaknum ga unam ma ijesugin oijmiamo ijin. Regavo irerag vajai fuon ijar rekreno ijia mukorigia samuanamimo ga e vuak ma ijesugin kuaimoino ga ka e akai igegreoinon e ijekin ijia abene. 9 Regavo fuka e Godon vuak ma iji no nijaidiavo iji giriesame anu kuniaimo. Fu ijegreokma ijia fur e roin ifejdiaga bu giriesame ma vierafek. A e ijekin iji abekma fur e iji eraneb bu unam ma iji uzame una e iji vuak ma iji abe kuaimoijo ijiena nigaraioijo ijiebuon ise iji fur visume e fok kuardiak.
10 Ijefuon maiji e uruvana buka vuak kufui kuaimoijknum una vuak ma ijin dab buzeime nigaraimoij. E ijegreoijo iji bu e Jius bu ur oi karoime Jesu ma vierafenva ijieb ijeg reoij. Bu kuardiame kia, Ja vierafe bu ja karauniakva ni E Jiusbuon akai iji mukoi igiafno kiav. 11 Regavo na vierafe aka vuak buon kufui iji bu kuaivo iji kuriaireme kiaga bu arek. Ijefuon maiji bu vuak ise naba nijaidiavo bu iji nijaidiav. Bu ijegrejo ijia buka e agan kafo ma vierafejo iji kam iserediav. Bu kufuimeoijo ijesugin bakin gavo buka vuak kufuimeoknum mon amarev. 12 Regavo vuak iji fun ebuon Kritko fu suar isoimo ijar ijeg kuai, E Kritko iji buka vuak kufui mene kuaimoijo ijia bun ijejkirariain. Regavo buka maf kuriai igeg bijaimoknum e nui giki rene ik rejo bakin revo buka maf igeg duok uruvana ijno kuain. 13 Regavo vuak irerag fu kuainma iji fu ma kuain. Ijefuon nika uruvana igia darokma kuardiaga bu una unam ma ijia Kurais ma vierafe. 14 Regavo buba una e Jiusbuon suar usuikor ijiga e iji bu vuak maiji uzainva ijiebuon vuak iji uruvana igia vierafek. 15 Regavo e iji maturainva iji buiji ire uruvana bu oibuon ijia vierafejo iji buka maum ren. Regavo e iji nigen ga oibuon ka ma taikin ga ba mukoi kegoknum God ma vierafejo iji ire fok bu vierafeoijo iji buka ma ise. 16 Bu ijegrejknum kuai, No God non vierafenvano kuaiv revo unam buon bu kegoijo ijar nijaiduomoni bu God buba mukorigia vierafej. Regavo e ijekin iji buka ma e ise vo ba God igavo ijefuon buba ire ma kafo rekfuon.