Nzryrkr Jon Kx Ayrnrngr
Natq Ngr Nzaplxtqngr Mz Nzryrkr Jon Kx Ayrnrngr
Mc ‘Natq Ngr Nzaplxtqngr Mz Nrpakxmrlz Kx Yr Jon.’ Mwx yrle letz lc mz mzlir yiz 90—95 AD mz nibr nzrmcngr mz Jiszs. Jon yrbzle mz lrmakxtr mz provins kc Esia, kcng tzmnclzbzng bade. Suti drtwrde nzapqtr-krbzle nabzdr mz nzaxvctr-zvz-krbzlr mz Gct badr Mrlxde Jiszs Kxnzmcpx. X rpibzle badr kx bzkq nzvz-nqblq-krdr nzalvztrkr kxnzalvztr-rbrng, murde ma tzvecpx-lzbqmqng mz Gct x Mrlxde.
Kzdung da kx vz-rbr nidr seleng. Nzrpilr kx da amrlx mz nrlc ka kx nzmc x nzbxtr ngi da kxdrka'ngr, myapxbz nrkrdrtq leplz. Mz nzpokia-krdr nzrpi-kzlr kx Jiszs nide txpwz ncblo, x Kraes nide mqngr kx prtrpz bade mzli kc tqwrkxtr-ngrde, x rlasz-moule nide x sc tztqlvztr ate mz kros. Mz drtwrdr, Kraes kc tqngi Mrlx Gct trngi-angidru ncblo. Nzrpi-kzlr kx nidr leplz kxnzmyapxbzng murde nzkrlzlr nzyrplapxngr kx yc-kapq. X trtakitrdeu nzvz-nqblq-krdr natq Gct, da kc tzwai kzdung kz leplz. A' mrlz nzvz-zvz nzrmwimi-krdr leplz kxtrngiu krnalzdr. X nzalvztr-rbr-ngrdr kx mzli kc ncblo tqrlapxpe-ngrde mz nzlxngiti-krde Kraes, aopxpebzle drtqde mz nzaoti-zvzkr drtwrde kxmu nzmnc-zpwxngr mz nrlc ka. X nzrpi-kzlr kx trtakitrdeu nzmrlzti-krgu Gct, nzvz-nqblq-krgu natqde, x nzmrlzti-lzbq-krgu.
Jon yr-kzle letz lc murde nakrlzku leplz angidr neng Gct.
Mrkcng Mz Letz Lc
Jiszs ngi angidr Mrlx Gct. [1:1-4]
Gct tubq-esz'ngr x trpnzngr doa x da kxtrka kx natutrpz mz mzte. [1:5—2:2]
Kxnamu nzkrlz-krgu doa angidr neng Gct. [2:3—3:10]
Nzvz-nqblq-zvzlr natqde. [2:3-6]
Nzaelwapx-ngrdr nivz, a' trngiu nzrtrkalrngr. [2:7-11]
Trnztao-zvzung mz da kcng tzatalzngr nigu mz nrlc ka. [2:12-17]
Krkcng tzrpilr kx Jiszs trngiu Kxnzmcpx trnznginidru doa neng Gct. [2:18-27]
Nzmnckr doa neng Gct natubq. [2:28—3:10]
Kxnamu nqmq kr doa neng Gct. [3:11—5:13]
Namrlzti-lzbqng x navz-nqblq-zvzlr natqde. [3:11-24]
Nzrpilr kx Jiszs nide Mrlx Gct x nzvz-nqblq-zvzlr nzalvztrkr aposol. [4:1-6]
Nzaelwapx-ngrdr nivz lrde, murde nide nou nivz. [4:7-21]
Nzlxngitilr kx Jiszs nide Kxnzmcpx, nzmrlztilr nide, nzvz-nqblqlr natqde, x nzaovxiolr nzatalz-ngrng. [5:1-5]
Brti drtwrdr natq Gct mz nzycmnetr-krde Mrlxde Jiszs. [5:6-13]
Nakabz Gct da mz kxnzrlxngiting mz nzmnc-xgle-krdrleng x kzdq natq kx xplr mou. [5:14-21]
1
Jiszs Ngi Nou Nzlungr Kxboi
1 Krlc tqyrbo bamu Mevalu Kxnzmcpx kc tzrpibz ‘Natq Ngr Nzlungr.’ Murde nide nrpa kc tqatwzlr-ngrm Gct mz leplz, x nide nou nzlungr amrlx. Kxmule-esz' mnc pnz kai mzli kc tzwz-ngrdr nrlc, a' nigr aposol mc-angidrkr nide mz mzkr, lalztqbzkr mz nzalvztr-krdeng, kctipxkr nzale-krde da kxmatq kxkqlu, x maletr-kzpzkr nrkrdrtqde mz mqgr. 2 Nzmnc-along ncdr Trtede Gct mrkc Heven. Zbz vzm nzngini-krde leplz x aelwapx-lzbq-ngrm bagr. Mckr nide, x mzli ka ryrbo bamu mz nzpipx-zpwx-krbo bamu kx. Natwzku nzlungr kxboi mz nzaxvctr-krbzku bade. 3 Pibo bamu da kx mckr x xlrkr, murde narmcti-kzamu nzlungr kxboi. X naprtr-kzpa'mu bagr mz nzodutr-lxblr-ngrbz mz Gct Trtegu x Mrlxde Jiszs Kxnzmcpx. 4 Yrbo letz lc murde drtwrmu naelalzm mz nzvz-nqblq-krmu natqnge.
Gct Tubq-esz'ngr
5 Nrpa kc tqxlrbzkr mz Mrlxde x tqpibo bamu nide sele. Gct tubq-esz'ngr, x trtxpnzngr alwx ngrde kx akamrbrngr da mz nabzde. Trpnzngr doa x da kxtrka kx natutrpz mz mz Gct. 6 Nzmu narpiku kx nzaxvctrpzku mz Gct, a' ale-zvzku alwx, pokiaku murde pxtxpx-ngrgu nzalvztrngr angidr. 7 A' mz nzvz-nqblq-krgu nqmq kr Gct, odutr-lxblrku badr. X nzbzkr Mrlxde Jiszs atubqtile nqmq krgu, mz nzvz-nqblq-krgu nide.
Naplzpxku Alwx Rgung
8 Nzmu narpiku kx trpnzngr alwx rgung, esabrti-lzbqku x pxtxpx-ngrgu da angidr. 9 A' nzmu naplzpxbzku alwx rgung mz Gct, sa naipqle nigu x naycpqpxbzle da kxtrka amrlx mz nabzgu, murde natubqbzku mz nzobq-krde. Murde angidati-zvzle natqde x ale-zvzle da kxtubq. 10 Rpi Gct kx leplz amrlx nzaleng alwx. X mz nzrpi-krgu kx trpnzngr alwx rgung, rpi-kzku Gct pokia. X aelwapx-ngrde kx pxtxpx-ngrgu natqde.