Sam Kranzpnu-rlimz-nrade-rlimz (77)
?Nzngya-zlwzkr Drtwr Gct Mrilvzole Nivz Lrde?
Nabz ne Asaf.
Nzkrka'ngr
1 Yrnibo mz Gct.
Yrni-katobo bade murde naxlrmle natqnge.
2 Mzli ka tqkxpu-ngrne, glalzbo mqnge mz Kxetu.
Kxmule-esz' krka'tix nzwr nrlckxbq, a' trxngipwc'u nzamqtr-ngrm drtwrnge.
3 Gct, kx aoti drtwrnge nim, nabznge ngrgo.
X sc tqyrni-katopex mz nzetqkr drtqnge.
Nzrlxtingr
4 Nzkxpu-krngeng aobqtx-zvzle ninge mz nrlckxbq,
X rblx-kzp bange nzycmnengr mz nztalvzokr nabznge.
5 Aoti drtwrnge zbq kcng pnz
X yiz kcng bqnc.
6 X drtwrnge ao-zlwzx mz nrlckxbq.
A' drtwrnge kc tqveabe kx,
7 ?Myx kxmule, Kxetu sa napxtxpx-alope-ngrde nigr?
?X trpengr nzmrlzti-mou-krde nigr?
8 ?Nzaodu-krde nigr sa nayrkrpx-alope?
?X nzesz'tikr drtwrgr badr naesakipe?
9 ?Myx kxmule, Gct trnaycpeu mz drtwrde nigr?
?X nzngya-zlwzkr drtwrde mrilvzole nivz lrde?
10 Xngitxtr-zlwzx
Gct kc tqmyalz-esz'ngr traelwapxpe-ngrpleu zmatq ngrde bagr.
Nqmq Kr Gct
11 Yawe, sa tqdcpx mz drtwrnge nqmq krmqng,
X da kxnzkctipx kcng tqaletiqng mzli kc bqnc.
12 X sa na-aoti zlwz drtwrnge da kxmrlz kxetuting
Kcng tqwz-ngrn mz zmatq ngrm.
13 Gct, nqmq krmqng amrlx tr-esz'ngr,
X trpnz-moungr gct kx myaszpxle nim.
14 Nim txpwz Gct kc tqaleti da kxnzkctipxng,
Mz nzbatr-krbzme mz lr mrkzbleng nzmc-krdr nzxplr-krm.
15 Arlapxpeq nqvi lr Jekop x Josip, murde nidr leplz nemqng,
Mz nzaovxio-krm enqmi rdrng mz zmatq ngrm.
Zmatq Ngr Gct Mzli Kc
16 Gct, mzli kc tqvz-ngrme, prla rnrcti-lzbq,
X wai-kzle meboo-ngrng.
17-18 X drtc' ycngrlrlzm mz trlipu.
X zbo nzadclr tewa kxetu.
X bzlrpc rpnakile nrlc apule nipna
Mz nzpnamilxti-krde nrlc.
X bzlrmei yrpu-zlile bongavz
Mz nzpro-krm nounenq.
19 Kxmule-esz' trpnzngr kxrmc nabzlvz r nanycm x lrpzki rm,
A' sc tqkawicpeq meboongr ngr Prla Bla.
20 X mailzq leplz nemqng mz nzapu-krdr sip,
Mz mq Mosis x Eron.