Sam.
1.
Nzmnc-zpwxngr trvzpxpuu mz nzvz-nqblqngr nqmq kr kxdrka'-ngrng, X nztu-ngrbz mz lrpzki nyz kxnzaleng alwx. X trvzpxpuu mz nzprtr-ngrbz mz kxnzxtrnga-ngrdr Yawe. 
A' nzabrtzngr angidr lc vzpxm mz drtwr kx elalzm mz nzvz-nqblqngr Loukxtr sc Yawe, X mz nzaoti-zvzkr drtwr natqde ngrlx x nrlckxbq. 
Leplz lcng nzapulr nounc kcng dzbrdr tzkrlzobzlr lue, X leu rdr trnzbloung. X nzdo-zlwzng mz nzvz-krm nrpr angidr. Da kx nzalelr nradr yc-zvzbz. 
A' kxdrka'-ngrng trnzwailru. Nzapulr leu kxglr kcng tztakitrpwzlr nzngcngr. 
Delc trnatu-amqngi-ngrdru mzli kc na-ayzlu-ngrbz Gct da mz leplz. X trnaprtrpwzung mz kxnztubqng. 
Murde lrpzki rdr tutr me nzayrplapxngr. A' Yawe aclvebzle nzti r leplz kxnztubqng.