Sam.
3.
Nabz ne Devet, kc tqyrle mzli kc tqdwasz-ngrde mrlxde Absalom. Yawe, enqmi rngeng nzkqlu-zlwzng, X nztutitr zvz nardr ninge. 
Nzrpilr mz nzyapwxti-krdr ninge kx, “Gct trtxpnzngr nzokatr-krde nide.” 
A' Yawe, nim kx mnc-ngale-zvzle ninge. Nim nou nzaovxio-krnge x nim kx apqtrp drtwrnge. 
Delc tqrlxti-ngrbo nzokatr-krm ninge, X ayzluome natqnge mz newz kxtr nyzm. 
Murde namwi-angidrx mz nrlckxbq x melz-mopwc' mz nourla, Mz nzaclve-angidrq ninge. 
Kxmule-esz' nztu-ngalelvzlr ninge siu ngr enqmi, A' trtxpnzngr nzmwxlr-krnge. 
Murde krka'-ngrne kx, “Yawe, Gct rnge, vzm arlapx ninge, X katxpxbz zmatq ngrdrng.” 
Yawe, nim nou nzarlapxngr, X da kxmrlzting amrlx kabzme mz leplz nemqng.