Sam.
8.
Nabz ne Devet kx yrbzle mz kxrmailz ngr dzbe kxnzngrng. Yawe, nim Kxetu rgr. Drtqm myalz-esz'ngr mz nrlc tulvzo. X nzmyalz-krm myaszlzle bongavz. 
Mz nzvz-nqblq-krde me pnz drtwrm, doa kxnztopwzng nzglqlzlr nim. X natqdr ailvzole nzrpibqtikr enqmi rmqng x awx-nabule nidr. 
Kxrpalz, mzli kc tqobqlz-ngrne mz bongavz, Mclzx nzlulikr temz x vri kcng tqwz-ngrnqng. 
?A' memule tqmatq-ngrgr mz drtwrm? ?X memule tqmrlzti-ngrn nigr leplz txneng? 
Murde wz-ngrn leplz vzo kxpipz mz lr Heven, X kabzme badr zmrlue x nzamatqngr. 
Yrlqq nidr mz nzaclve-krdr da kcng tqwz-ngrn, X da amrlx nzyclzbzng mz zmatq ngrdr. 
Nzaclvelr animol krbzq, X animol kzpeto kz. 
X nidr kxnzetung r utc x nc, X da amrlx kx nzwrneng prla. 
Yawe, nim Kxetu rgr, Drtqm myalz-esz'ngr mz nrlc tulvzo.