Sam.
21.
Nabz ne Devet. Yawe, ninge king nem x abrtz-zlwzx murde nzrka-krme bange zmatq. Bilvzx nzaovxio-krbzme enqmi rngeng. 
Da amrlx kcng tqsuti drtwrnge, tqrlxtibo. X sc tqkatimeng x alebzmeng amrlx. 
Vzpeme bange mz nzrka-krme da kxmrlzting. X alaome mz narnge kraon kx ngi gol. 
Rlxtibo nzlungr bam, X kapeme bange nzlungr lc tqboi. 
Leplz kxkqlu nzxlrlr nrpa ngr drtqnge, murde okatr-zvzq ninge. X nzamatqlr ninge, murde armyalzq ninge mz nzngini-krnge King. 
Da kxmrlz kcng tqkatimeng bange, sa nayc-alomqng bange. X abrtz-zvz-ngrne nzmnc-krme bange. 
Yawe kc tqrninr, ninge king nem x abrtrpo drtwrnge bam, Murde namnc-zpwxx mz nzaodu-krm kc tqyc tqyc. 
Yawe, aovxio-zvzq enqmi rmqng, X lolvztiq krkcng amrlx tzpxtxpx-ngrdr nim. 
X mz nzlolvzti-krm lc nidr, odatiq nidr, apule nyr kc tqangcle nrlc. Yawe, milxtxo-zvzq nidr x ayrkrtxtrq nidr mz nyr. 
Trpnzngr kx rlapx mz nqvi lrdr, Murde nibqtiqng amrlx. 
Mz nzyrlq-krdr drtwr ngr nzota-krmu badr mz vea, Trna-angidalru drtwr lc tzyrlqlr. 
Murde nzdwaszlr nim Mz nzpnz-krm nidr mz nipna scmqng. 
Yawe, glqlz-ngrgr nim nzxplr-esz'ngr-krm. X angrlvzkr nim mz zmatq ngrm.