Sam.
28.
Nabz ne Devet. Yawe, kqlex nim murde nim butqbr kx rlakitrx. Bzkq apume bange kxnradrtqde ngq. Murde ma tqbzx nzmu napx-ngrn nzxlrngr nzyrni-krnge. 
Mzli kc tqobqtr-ngrbo Mrkc Tqtr mz nzmnc-krnge Mangr-nzangiongr nim, x glalzx mqnge mz nzkrka'-krbo bam, Xlrm natqnge x okatrp ninge. 
Bzkq apusr-ngrn ninge kxdrka'-ngrng kcng tzrtrngz-zvzbzng da kxtrka. X nzrpilr kx nidr ncblo ngr nivz, a' trtingr. 
Ayzlu-mopwz mz nzayrplapx-krm nidr mz da kxtrka x nzrtrkalrngr kcng tzalelr, Kabz badr da kx takitrde nzvz-rbr-krdrng. 
Murde matitrpe drtwrdr da kcng tqwz-ngrn x da kxetuting tqaleqng. Dekc namilxtxo-ngrn nidr x bzkq da kx na-ale-moulr. 
Yawe, glqlz-lxblrkr nim Murde ayzlume natqnge mz nzokatr-krm ninge. 
Nim lrpalvc nyznge x temz ngr lomrnge kc tqyrputrngr nipna. Abrtrpo drtwrnge bam x okatr-zvzq ninge. Delc tqelalz-ngrm drtwrnge X tqawi-zvz-ngrbo bam mz nzngrngr. 
Yawe, nim lrpalvc nyzgr kx rlakitrkr. X nim nzxplr-krnge, ninge king kc tqmcpxbzme. 
Amrlz nigr leplz nemqng mz nzarlapx-krm nigr, Mz nzngini-krgr sip nemqng kcng tqaclve-zvzq.