Sam.
29.
Nabz ne Devet. Nimu enjrl ngr Heven nayrngzobzmu mz Yawe, Mz nzmc-krmu nzmyalz-krde x zmatq ngrde. 
Napipxamu kx takitrde nzamrluengr drtqde, Mz nzangio-krmu nztr-esz'ngr-krde. 
Murde natq Yawe aelwapx-lzbqngr mz trlipu. Nate kxmatq o-zlile dcpwe mz nzapu-krde bzlrmei prla. 
Natq Yawe matq-esz'ngr. Eu. Natqde xplr zlwz. 
Natq Yawe rpesaliti nc trpili, Mz nzapu-krdr nounc kx nzlapizting. 
Natq Yawe aycngrlrle newz nyzgung, Mz nzapu-krdr ncblo kx nzelang. 
Natq Yawe batrpzle bzlrpc. X bzlrmei ngrde aycngrlrle peto. 
Natq Yawe apule nenq kc tqrkqtuti nc yrni x krlxpqtile leu rdr. X kxnzangiong amrlx mz Mangr-nzangiongr nzrpilr kx, “Gct, nzmyalz-esz'ngr-krm glqlz-ngrgr nim!” 
Nubla ngr tewa kxetu yclzbz mz zmatq ngr Yawe, Mz nzngini-krde King kc tqaclve alo. 
X mz zmatq lc axplrle nigu leplz nedeng Murde namnc-zpwxku.