Sam.
36.
Nabz ne Devet, kxnzawz ne Yawe. Gct, nzmncngr kxtrka vzdz-zvzm mz nabz kxdrka'-ngrng, X sc tqrpipebzle badr kx, “Bzkq amrlueamu Gct.” 
X batrpzle nzglqpx-lzbq-krdr. Murde nzrpilr trmcwq alwx rdrng x trna-ayrplapxwq nidr. 
Natqdr trka-esz'ngr x yctr-ngrpwz nzpokiangr. Delc trtxpnzngr nzale-krdr da kxmrlz x tubq. 
Mz nrlckxbq sc tzaoti drtwrdr nzryrlq-krdr drtwr kxtrka. Nzpxtxpx-ngrdr nzti kxtubq mz nzmrlzkr badr lrpzki kx vz-rbr. 
Yawe, nzmyatxlzkr nzaodu-zvz-krm X nzangidati-zvz-krm natqm nzkrlzlzlr bongavz. 
Nztubq-krm vzdz krlzbzle newz kxnzmyalzng, x vzo kz la me boongr. Murde aclve-zpwxq leplz x animol mz nzrsakrlrngr. 
Gct, nzaodu-krm leplz mrlz-zlwzm bagr, Murde apusr-ngrm nigr nei kio kcng tzwxbulvzong lxedr. 
Mz nzrka-zvz-krme nagr dakxnzng, dakxnzng lcng yctxpxng zvz. Murde avzo-zvzme zmrlz ngrm bagr, apule lue kc tqyrletx alo. 
X nim narlue r nzlu-krgr, Kc tqapu-zvzmle bagr nzyrlelz-krm aulz. 
Yawe, navz zvz nzaodu-krm nigr kcng tzvz-nqblqlr nim, Mz nzamrlz-krm kx nabzdr tubq. 
Bzkq rlrpx-ngrn mq kxdrka'-ngrng nzlolvz-krdr ninge, X kxnzglqpx-lzbqng bzkq nanycdr nzrnzlvzolr ninge. 
Murde brti drtwrnge nzaovxio-krm kxdrka'-ngrng. X mz nztao-krdr, trpengr nztulz-mou-krmlr.