Sam.
38.
Nabz ne Devet. Yawe, kxmule-esz' ngyati drtwrm ninge, A' bzkq ayrplapxq ninge. 
Murde nipna scmqng tupe bange, X pnzplrope-ngrn ninge. 
Xngitxtr-zlwzpex nzngyatikr drtwrm ninge. X yangrnga-zlwz-ngrne alwx rngeng. 
Zmrlepu r alwx lcng sc tqayrngzpupele ninge, X apupex ncblo kx boo mz alwx ngrdeng. 
Nzngqngu-plxsr-krnge aetqpemle drtqnge, Apule kxsqki kx mibi x brtu. 
Alwx rngeng nzyrlamyro-ngrdr ninge. Delc drle mzke' tqtao zvz mz zbq kang kqlu. 
Nzyagox-krnge apule nyr kx ngcpxm mz nrkrdrtqnge. X nzxplr-krnge yrkrtxpxpebz. 
Nzetqkr drtqnge wibrti-zlwzpe-ngrde ninge. X bztipenge nzyrningr murde drtqnge rkrkx-zlwzpe. 
Yawe, krlzpeq da amrlx kcng tqpq zlwz mz drtwrnge murde namnc-zpwxx. X xlrpe-kzpe' nzyrke-zlwz-krnge. 
Mzli ka drtqnge mewepe x nzycmini-krnge vz-ebirpengr, X mzke' obqkipele mrkzble. 
Kztengeng nzngangrpe-ngrdr ninge murde kxsqki rngeng. X kxnginingeng trnzesotrpepqngqu bange. 
Krkcng tzrpilr nanibqlr ninge, Nzamwipelr trtxki rnge. X krkcng tzaetqmlr drtqnge, sc tzrpilr naodatilr ninge. X sc tzryrlq-zvzng drtwr mz nzatrkati-krdr ninge. 
A' opxm kx trxlrwxu nzycmnekr enqmi rngeng. X trkrlzwxu nzycmnengr. 
Eu, apubo badr kx nradrtqde ngq, X trayzlupwc'u natqdr. 
Murde nim Yawe kx na-ayzlubzle nike nzalemlr bange, Mz nzngini-krm Gct rnge kc tqabrtrpo drtwrnge bade. 
Bzkq rlr-ngrbzme nzabrtzlvz-krdr nzetqkr drtqnge. X bzkq nzglqpx-lzbqng mz nzaovxio-krdr ninge. 
Murde ycpe pipz nzodati-krdr ninge, X nzetq-zvzkr drtqnge tryrkrtxpxpeu. 
Naplztxpxx nzvz-rbr-krngeng, Murde nzbatrplr nzkxnekr drtqnge. 
Enqmi rngeng nzxplrng x nzlu-zpwxng. X nzkqlung kx nztrkati nivz lrdr ninge. 
Da kxmrlz kcng tqalebo badr, nzayzlumlr mz da kxtrka. Nzpxtxpx-ngrdr ninge murde vz-nqblqx nzmncngr kxtubq. 
Yawe, bzkq amnctxnq ninge esz'-krnge, X bzkq mnc-zvzme rlru. 
Kxetu, vz-anim mz nzokatr-krm ninge, Murde nim Mevalu rnge.