Sam.
46.
Nabz ne nqvi lr Kora. Gct kc tqmyatxlz, nide me rlakitrku x axplrle nigu, X mz nzkqle-krgu nide mz mzli kx nzkxpungr, okatrle nigu. 
Kxmule-esz' nengq aycngrlrle nrlc, x newz nzbrkaong prla, X kxmule-esz' dxvo votrp x nrc oda, X newz nzycngrlr-ngrdr kz nzyrpukr nrc kxetuting, A' trmwxlrkuu murde abrtrpzku drtwrgu mz Gct. 
Gct kc tqmyatxlz mnc mz mztea kxtr nyzde, Jerusalem, Mrkc tqpulio-ngrmle nzabrtzngr bagu, Mz nzngini-krgu lr mrnyzde. Nzvzo-krmle bagu apule lue kx yrle-kato. 
X rblx nzodatingr Jerusalem murde Gct mncm bagu, X naokatrle nigu mz zbq kxmrna. 
A' mz nzxlrkr lr nrlc natqde nzmwxlr-zlwzng. X ngyati drtwrdr nide murde aovxio-zvzle ami ngr kandre amlrx. 
Yawe nide ngrlrvea ngrgu, X nide lrpalvc nyzgu. 
Obqmamu! Mcamu da kc tqale Yawe. Murde aletile da kx nzodating mz nrlc ka. 
Aesakile vea amrlx mz nrlc tulvzo. Plameitile popz' x nipna x dalr vea amrlx x rtclz-ngrdeng mz nyr. 
X rpile kx, “Bzkq ota-zvzamu. A' metxpemamu bange murde ninge txpwz Gct. X ninge txpwz kx myatxlzbz mz neidu amrlx mz nrlc tulvzo.” 
Yawe kc tqrninr mncpem bagu, X nide lrpalvc nyzgu.