Sam.
60.
Nabz ne Devet kx yrbzle mz kxrmailz ngr dzbe kxnzngrng, mzli kc ami nzling nzrpilr narnzlvzo-ngrdr Israel nzprtrpqng mz kzdq nrlar Israel. X ami ngr lr Edom nzprtrpqng mz kzdq nrlarde, Nabzlwa ngr Dcpwe, mrkc Joab kc tqmailzle ami ngr Israel, tzabz-ngrdr ncblo siu-nzpnu-esz'-nrade-li (12,000). Gct, mz nzngyatikr drtwrm nigr, drtqm satrpem bagr. X batrpeme mz enqmi rgrng nzprtr-krmlr mz nzawxo-krdr bz ngr nrlc nyzgr. Nzatrkati-krdr nigr apule nengq mz nzaglqwiti-krde drtc'. X da amrlx trnzaxvctrpeung. Dea-ngrgr vznepe mz nzvzne-krgr apukr ncblo kxnzrmnqng, Mz nzaetqtitx-zlwz-krbzme drtqgr, nigr leplz nemqng. A' suti drtwrgr nayzlu-mopwe' bagr Mz nzamrlz-mou-krm drtc' nyzgr, murde namnc-zpwx-moukr. 
Nim Ngrlrvea ngrgr. Glalzm nc nqngq bagr, nigr kcng tzamrluelr nim, Murde navzmgr bam mz nztu-mou-krgr me esz'. 
Mz zmatq ngrm, arlapx nigr kcng tqaodu-zvzq, X ayzlu-ngrm natqgr. 
Gct, natqmqng nzvzpxmqng mz Mangr-nzangiongr, mz nzrpi-krdr kx, “Mzli kc na-aovxio-ngrne, sa na-akipxbo mz leplz nengeng Drtc' kcng mz nrlar LueJodzn rlilr. 
Murde neidu lr Gilead nengeng. X nqvi lr Manase nenge-kzng. X neidu lr Efrem tum mz nibrnge. X nqvi lr Judz kx na-aclve-zvzng mz zmatq rnge. 
A' enqmi rmung trna-aovxiolru nimu. Murde lr Moab sa nawztrpqng bange X lr Edom sa nametxmqng bange. X sa namalqlvzx nzmilxtxo-krnge lr Filistia.” 
?Myx kxmule, sa na-atutrq natqm lc mz nzokatr-krm ninge Nzprtr-krnge mz lrpalvc ngr mzteadau nyzdr lr Edom? 
Murde mzli kc pxtxpxpe-ngrn nigr, X trokatrwq ami negr mz nzotangr. 
Gct, okatrp nigr mz nzota-krgr badr enqmi rgrng mzli ka. Murde mane nzmnc-xgle-krgr ncblo nzarlapx-krdr nigr. 
X krlzkr kx mz nzmnc-krme bagr, Sa narnzlvzokr enqmi rgrng mz nzokatr-krm.