Sam.
66.
Nabz kx nzyrbz mz kxrmailz ngr dzbe kxnzngrng. Lr nrlc amrlx Namalqlvzlr Gct, 
Mz nzangrlvz-krdr nzmyalzkr drtqde, X mz nzglqlz-krdr nide mz nabz kxyrlvi. 
X narpibzku bade kx, “Da amrlx kcng tqaleqng nzkctitxpxng. X enqmi rmqng nzmetxpebzng bam mz nzetu-zlwzkr zmatq ngrm. 
X lr nrlc amrlx nzangiolr nim, Mz nzglqlz-krdr nim x nzarmyalz-krdr drtqm.” 
Nadcpx mz drtwrgu da kx nzkctipxng, Kcng tqalemqng Gct bagu, nigu leplz nedeng. 
Akipxle Prla Bla x aesakile nzyrlekr LueJodzn Mz nzyrlq-krbzle me mingrng kx navzki melrmqgung. X mzli ka na-awi-ngr-kzpzku bade da lcng. 
Murde aclve-alole mz zmatq ngrde. X yrlq zvz mzte lr mrkzbleng murde ma tzglqpx-lzbqng mz nzxpqbrlr-krdr nide. 
A' nimu lr mrkzbleng naglqlz-kzamu Gct rgr, Mz nzangrlvz-kato-krmu nide. 
Murde nide kc tqaclve-zvzbzle nzlu-krgr, X tr-rlrpx-ngrdeu nzaovxiokr enqmi nigr. 
Gct, kxmule-esz' atubqtipeq nigr, kx nabzgr nalqngi, Mz nzapu-krgr silvz kc tqyrleni, x zblqki rde navztx. 
X kxmule-esz' rlrpx-ngrn nzesabrtingr nigr, X batrpzme nzrglq-krgr da kx mrlepu. 
X kxmule-esz' rlr-ngrbzme mz enqmi rgrng nzrnzbrti-krdr nigr, X vztrkr mz nabz nzkxpungr Kx apule nyr x nrc kxoda, A' mzli ka sc tqyzlumipe-mope' nigr me na-arlapx-ngrgr. 
X ayzlu-kzpe' natqnge mz mzlir nzkxpu-krngeng, X delc naka-ngrbo bam da kcng tqpibo. Rtwzmc animol kxncblongr kx oliqtix mz olta nyzm, Mz nzangc-krbzlr bam mz Mangr-nzangiongr. Murde zsikapu ngrdr navzdzbz, Nangi dalr nzawi-krbo bam. 
Nimu amrlx kcng tzangiolr Gct, lalztqmamu bange, Mz nzpi-krbo bamu da kcng tqalemleng bange. 
Mz nzbrtikr drtwrnge nide, krka'bo bade, Mz nzoliqti-krnge nzawi-krbo bade mz nzayzlu-krmle natqnge. 
X ayzlu-zpwxmle natqnge murde plztipxbo alwx rngeng. A' rblx nzxlr-krde nzkrka'kr doa kx nabzde blqki. 
Awitx-zlwzbo mz Gct murde trpx-ngrdeu nzkrka'-krnge, X trpx-kz-ngrdeu nzaodu-krde ninge.