Sam.
78.
Nabz ne Asaf. Leplz nengeng, lalztqmamu mz nzalvztr-krnge, Mz nzxlr-angidr-krmamu natqngeng. 
Sa naryapwxbo bamu mz nzycmne-ebzpxngr. X sa nayokaetipxbo dalr mzli kc bqnc kx trgalr kxrkrlz. 
Da lcng tqxlrpeku x tqkrlzpeku Murde nzpipem melrmqgung bagu. 
Bzkq yrlq-kapqbzkung mz doa negung, A' nayapwxtibzku badr. 
Yawe yrlqbzle loukxtr scde mz lr Israel, Mz nzka-krbzle natqde mz nqvi lr Jekop. X rngidrlvz-ngrbzle mz melrmqgu lcng Kx na-alvztr-ngrdr doa nedrng mz lou lcng. 
Murde nayrlqlr lou lcng, X na-alvztr-kzpzlr mz doa nedrng. 
Mz nzmu-krde lcde, nrpr ngr doa amrlx na-abrtrpzlr drtwrdr mz Gct, X na-aoti drtwrdr da kxnzkctipxng kcng tqalele mz nzvz-nqblq-krdr natqdeng. 
X bzkq na-apulr melrmqdrng kcng nardr tqmqngi x tzxpqbrlr-ngrdr Gct. Trtegu lcng nabzdr bao x nzvecpx-lzbqmqng bade. 
Mzli kc bqnc kzdung lr Israel, ncblo ngr vea nedrng nzoliq-angidrpeng mz popz' x nipna scdrng, A' mz zbq kc navecpengr, sc tzdwapeng. 
Murde trnzatutrlru Nzesz'tikr Drtwrdr badr Gct, X nzpxtxpx-ngrdr lou scdeng. 
Kxmule-esz' nzmcpelr zmatq ngr Gct, A' trmatqu mz drtwrdr da kxnzkctipxng kcng tqaleleng mrkc Ijipt. 
Akipxle Prla Bla x mz nrlarde rlilr atule apule nztukr drkq, Mz nzmailzo-krde leplz nedeng elr. 
X mz nzvz-krdr ngrlx, mailzle nidr mz dcbz, X nyr rtwayzbz badr mz nrlckxbq. 
Mzli kc tzmnc-ngrdr lzke, amrplxtrpzle rplz Kx yrlepx-ngrm lue x ningali. Murde narmnqng x drtwrdr naesatxpx zpwx Mz lue lc tqkabzle badr, tqxplrm nzyrle-krde. 
Kxmule-esz', a' vz zvz nzatrkati-krdr Gct kc tqmyalz-esz'ngr, Mz nzale-krdr alwx x nzxpqbrlr-ngrdr nide. 
Mz nzmqngikr nabzdr nzabzlr nzatalzngr Gct, Mz nzka-krbzle dakxnzng kx naesapxngr drtwrdr. 
Nzpibqtilr Gct, nzrpilr kx, “Kxmule-esz' luplxtrle rplz x lue yrlepx-katom elr, A' rblxbz bade nzrka-krmle nagu dakxnzng, Mz nzaclve-krde nigu leplz nedeng.” 
Yawe kx xlrle kc nzycmne-krdr, drtwrde trmrlzlzpuu. X zngya ngr drtwrde kc tzapqtr-zlwzbzlr. 
Murde trnzlxngitilru nide, X drtwrdr trnzabrtrpwzlru bade mz nzaclve-krde nidr. 
Kxmule-esz', a' lvxpxbzle bongavz, Mz nzatwzlro-krmle badr dakxnzng ngr Heven. 
X mzli lcde, leplz txneng nzmung dakxnzng nan enjrl, Mz nzangidati-krbz Gct zbrtale ngr nelzdr. 
X mz zmatq ngrde kz Sc tqawqpele nenq tonga x trlaki. 
X nenq lcng li nzrtwzmqng blzmr kio, X nzyrlwrne-krdr apule drta' ngr prla. 
Kio lcng nztatiomqng mz drtc' O-ngalele ma nyzdrng. 
Gct kabzle badr nikeng nzsuti zlwz drtwrdr. Nzngqdr x nelzdr krlc. 
Kxmule-esz', a' drtwrdr tresapxu. X mzli lc tzmube-ngrdr, 
Gct sc tqnibqtipebzle obla nedr kcng tzxplrng, Mz nzngyatikr drtwrde nidr. 
Kxmule-esz' Gct ayrplapx-katole nidr mz alwx ngrdrng, a' sc tzale-zvzng alwx. X kxmule-esz' nzmcpelr nzale-krde da kxnzkctipxng, a' trnzlxngitilru nide. 
Zbz sc tqnibq-anipele nidr Mz nzapusr-krdeleng lue kc tqmilqpx mz leu r nya x tqmrbro mz drtc'. 
Kx nibqle kcng, opxm kx drtwr kxnzlubeng sc tqyzlu-mopwz bade, Mz nzplzpx-krbzlr alwx ngrdr x nzkrka'-krbzlr bade. 
X opxm kz kx dctipx mou drtwrdr kx Gct kc tqrninr nide butqbr nyzdr, Kc tqarlapx-zvzle nidr. 
Kxmule-esz', a' nzpokiatilr nide Mz nzrpi-krbzlr bade kx nzmrlztilr nide. 
Kxmule-esz' nabzdr bao, X trnzatutrlru Nzesz'tikr Drtwrdr badr, 
A' trodatileu nidr, murde yckqti mou drtwrde nidr x ipqpxbzle alwx ngrdrng. X nzwrde kqlu kx ngyatingr drtwrde nidr, a' lolvztxde zngya ngr drtwrde. 
Murde krlzle kx nidr leplz x nzkrlzlr nzbzngr, Mz nzapu-krdr nenq kc tqwq x sc tqamaneope. 
Nzwrde kqlu lzke nzxpqbrlr-ngrdr nide, Mz nzavzti-krbzlr drtwrde. 
Zvz nzale-ebir-krdr da kx nzangyati-ngrbzlr drtwrde, Mz drtwrdr kx lctr-zvzbz mz Gct kc Tqtr-esz'ngr. 
Mrbrtr mz drtwrdr zmatq ngrde Mz nzarlapx-krde nidr mz mq enqmi rdrng. 
Mzli kc tqale-ngrde da kxnzkctipxng Mz nzvzmipx-krde nidr Ijipt. 
X mzli kc tzmnc-ngrdr Ijipt, ngi-batrpzle lue kxetung nzlrtipx-krdr mepyr, Murde lr Ijipt ma tzrmnqng lue. 
Atwzlr-ngrmle frck kxkqlu kx na-atrkatilr mrnyzdr, X mc kxkqlu kx namakxtilr nidr. 
Nibqtibzle kzu, sip, x gout nedrng Mz kzdq zyagox kxtrka. X mz nibrde atwzlr-ngrmle trlipu kxetu, Mz nzamzti-krbzle nounc x dalr nrlanc nyzdrng mz nzatatio-krmleleng muli-aes. Zbz sc tqatwzlrpe-ngrmle kionabr Mz nzngqti-krdr dakxnzng amrlx kx nzlutinepwzng mz nrlanc. 
X mz nzngyati-zlwzkr drtwrde lr Ijipt kcng tzakxputilr leplz nedeng, Atwzlr-ngrmle enjrl kxnzkqlung mz nzpulio-krmlr nyr mz nzayrplapx-krdeleng. 
Trlolvzleu zngya ngr drtwrde, A' xplr-esz'ngr apule nubla ngr lue mz nznibqti-krde nidr. 
Nibqtibzle doa ncblo kx ayrnrngr nedrng, Nidr kcng tzvzpxmqng mz nqvi lr Ham, doa ne Noa. 
Mz nibrde sc tqrtwayzpebz mz leplz nedeng mz nzrlasz-krdr Ijipt. X mailztrle nidr lzke mz nzapu-krdr sip nedeng. 
Aclve-angidrle nidr, x trnzmwxlru. A' aboobzle enqmi rdrng amrlx prla. 
X mz nibrde sc tqvzmitr-atele nidr mz drtc' kxtr nyzde, Kenan, Mrkc tqtungr Newz Saeon, kx nztwz mz zmatq ngr nzaovxio-krde. 
Maneutipxle leplz kxnzmnc-mrbrng mrlcde, mz nzvztrkr leplz nedeng mz drtc' lc. X sc tqakipxpebzle drtc' lc mz neidu lr Israel kcng nzpnu-esz'-nrade-li, x nzmncpx-alzupq'ng mz ma nyzdr. 
Kxmule-esz' nzmncpeng mz drtc' kxtr, a' sc tzycmne-plztitrlr x nzxpqbrlr-ngrdr Gct kc tqrninr mz nzpxtxpx-krdr natqdeng. 
Leplz lcng nzapulr melrmqdr kcng bqnc mz nzesablqti-krdr nide x nzvecpx-lzbq-krmlr bade. Mz nzmu-krde lcde, trpengr kx brti drtwrde nidr. 
Nzangyatibzlr drtwrde mz nzangio-krdr kx trngiu Yawe Gct angidr, X mz nzyrngzo-krbzlr mz mqngr da kxnzlz. 
Kx mcle da lcng tzaletilr, ngyati zlwz drtwrde leplz nedeng, X sc tqpxtxpxpe-ngrde nidr. 
Rlasz-pnzle Tentkxtr nyzde kc mztea Saelc, mz drtc' nyz Efrem. Mrkc tzmnc-kai-ngrdr badr leplz nedeng. 
X rlr-ngrbzle mz enqmi nztwz-krdr Bokis kc tqyclz-ngrm Nzesz'tikr Drtwrdr Badr, Kc tqngi rkx ngr zmatq x nzmyapx-esz'ngr-krde. 
X mz nzngyati-zlwzkr drtwrde leplz nedeng, Rlr-ngrbzle mz enqmi rdrng nznibqti-krdr nidr. 
X obla nedrng amrlx nzbzting mz vea, X olvi nedrng trpengr obla kx naryrlzting. 
Pris nedrng nzbzti-kzng mz vea, X olvz ngrdr nzmwxlr-zlwzng x trpnzngr mzli kx nayrnimi-ngrdr namz ngrdr. 
Mz nibrde, mz drtwrdr opxm kx Kxetu apule ncblo kx melz-atem Mz nzmwingr mz nzrmnq-krde waen. 
X mzli lcpwz aovxiole enqmi rdeng, Mz nzamyati-alo-krbzle drtqdr. 
Gct trsutiu drtwrde doa neng Josip, X sc tqrlaszpele drtc' nyz Efrem, kzdq mrlxde. 
A' mcpx-alzule neidu lr Judz, Mz nzmnc-krde Newz Saeon, kc tqmrlz-zlwzbz bade. 
Mrlc dekc tqwztio-ngrde Mrkc Tqtr murde nayc alo elr, Da kc tqwai nzyc-alokr Heven x nrlc. 
X mcpx-kzle Devet kx nawztrpz bade. X kapxmle nide mz nzaclve-krde sip neng trtede, Murde nanginide king r lr Israel, Mz nzaclve-krde leplz neng Gct. 
X nzaclvekr Devet nidr tubq, Mz nzmailz-zpwx-krde nidr.