Sam.
86.
Nabz ne Devet. Yawe, xlrm nzkrka'-krnge, Murde trxplrwxu x ninge ncblo txne. 
Nim Gct rnge. Arlapx ninge mz nzbzngr murde tenge nim, X ninge kxnzawz nem kc tqmnc-xgle-zvzle nim. 
Nayc mz drtwrm ninge, Murde vz zvz nzkrka'-krbo bam. 
Kxetu rnge, aelalzm drtwrnge, Murde abrtrpo drtwrnge bam. 
Murde mrlz-esz'ngrn nzripq-zvzngr. X aodu-zvzq krkcng tzkrka'bzng bam. 
Yawe, lalztqm mz nzyrni-krnge, X ayzlum natqnge. 
Mzli ka kqlex nim mz nzkxpu-krnge, Murde angidati-zvzme nzrlx-krbo da bam. 
Kxetu, trpnz-moungr gct kx apule nim, Murde trpnzngr nidr kx rkrlz nzalengr da kxnzkctipxng kcng tqale-zvzq. 
Kxrpalz, lr drtc' amrlx kcng tqwz-ngrn Sa nayrngzobzng bam mz nzarmyalz-krdr nim. 
Murde nim txpwz Gct, Kc tqmatq-esz'ngr mz nzale-krm rkx kxetuting. 
Yawe, aelwa-ngrm bange me pnz drtwrm, murde navz-nqblqx natqm. X alvztrp bange nzamrlue-zvz-krnge nim. 
Murde nabznge atwrnrngr na-awibz bam mz nzngini-krm Gct x Kxetu rnge, X na-angio-zvzx drtqm. 
Murde nzaodu-zvz-krm ninge etu-esz'ngr, Mz nzarlapx-krm ninge mz nzbzngr. 
Gct, kxnzglqpx-lzbqng nztutitr nardr ninge. Zbo ngr ncblo kxayo lc nzrpilr nanibqlr ninge, murde nzpxtxpx-ngrdr nim. 
A' yc zvz mz drtwrm leplz, x zmrlz ngrm myalz-esz'ngr. X drtwrm trngya-aniu, a' nzaodu-krm x nzangidati-krm tqvzpe tqvzpe. 
Mz nzmu-krde lcde, yzlum x nayc mz drtwrm ninge. Axplr x arlapx ninge, murde wztrpo bam da kc tqwai lxenge mz nzwztr-krbzle bam. 
Yawe, okatrp ninge mz nivz lrm, murde drtq enqmi rngeng namyatx-zlwzng Mzli kc namc-ngrdr nzaxplr-krm ninge x nzapqtr-krme drtwrnge.