Sam.
88.
Nabz ne nqvi lr Kora. Yawe, nim Gct kx arlapxle ninge, X yrni-katobo bam ngrlx x nrlckxbq. 
Xlrm natqnge X lalztqm mz nzkrka'-krnge. 
Murde prtilzpele ninge nzkxpungr kxkqlu, X ycpe pipz nzbz-krnge. 
Mzli ka mewepex, X trpengr da kx nawaitrpem bange. 
Nzapusr-ngrdr ninge namz kx nzyrtzmqng mz gq. Murde krlcng tzbzpeng nzmrbrtitrpe drtwr nidr x trpengr nzrmcti-krdr nzokatr-krm. 
Rtcope-ngrn ninge mz gq kx vzo la, X tutx-ngrpwz nzlo. 
Nzngyatikr drtwrm ninge batrpzle nzetq-zlwzkr drtqnge, Mz nzmrilvzo-krde nabznge apule nrc kc tqyrplalvzo-ebir-ngrde ninge. 
Ngi-batrpe' nzngangrkr kztengeng ninge mz nzmwxlrti-krdr zyagox lc tqdwatimle ninge. X trpengr me nayrbqkipxx. 
Yawe, mzke' vaotxtrpebz mz nzyrningr mz nzvzkr drtwrnge. Kxmule-esz', a' mz zbq kang kqlu glalz-zvzbo mqnge mz nzkrka'-krbo bam. 
Bzkq rlr-ngrme nzbz-krnge Murde ma tqrblxpem bange nzyapwxtipx-krbo nim mz leplz. Murde kxnzlu-txpwzng kcng tqalebzme badr da kxnzkctipxng. X namz ngr leplz trnztulzpeung mz nzglqlz-krdr nim. 
Trnzycmnetrpe-ngrdru nzaodu-zvz-krm mz nabz gq kc tqngi me nzodatingr nidr. A' nzangidati-krm nzpipxbz mz krkcng tzlubeng mz nrlc ka. 
X rblxpebz mz kxnzyrtzmqng nzrmc-krdr nzmyalz-esz'ngr-krm murde nzmncng mz nabz nzlo, X nivz lrm mrbrtr-alope kz mz drtwr, mz gq lr kxnzbzng. 
A' krka'-zvzbo bam mz zbq kang kqlu, kx Yawe, Murde nayc mz drtwrm ninge. 
A' opxm kx drtqm satrpem bange, X sc tqesablqtipeq ninge. 
Murde ayrplatxpx-zlwzq ninge, yzutr pnz mzli kc tqngi-oblabe-ngrne. X mzli ka nzetq-zvzkr drtqnge ycpe pipz nzayrkrpx-krde ninge. 
Nzngyati-zlwzkr drtwrm ninge apule nubla kc tqtwzle ninge, Mz nzbatr-krbzle nzmrbrkr nzlu-krnge. 
X nzkxpu-krnge lcng nzngrlelvzlr ninge, X trpengr me nayrbqkipxx. 
Ngi-batrpe' kztengeng kxnzmrlzng nzngangr-krdr ninge. X mzli ka nabznge talvzo zlwz mz nzmnc-krnge esz'-krnge mz nabz nzlo.