Sam.
89.
Nabz ne Etan. Yawe, sa nangr-zvz-ngrne nzaodu-krm, Kc tqyc tqyc. X sa nayapwxtipx-alox nzangidati-krm natqm, Kc tqyctx alo, da kc tqwai bongavz. 
X sa nayrlq-zvzq natqm kc tqpibzme mz kxnzawz nem, Devet, Kc tqmcpxq, mz Nzesz'tikr Drtwrmu ncdr. 
Rpibzme bade kx, “Ncblo kcng tzvzpxmqng mz neidu lrm, sa nanginipwzlr king, Murde nqvi lrm na-aclve alo.” 
Yawe, lr Heven nzglqpxlr nzangidati-krm, Mz nzangrlvz-krdr da kxnzkctipx kcng tqaleq. Enjrl amrlx nzamrlue-zlwzlr nim, Murde trpnzngr lr Heven kx apule nim, kc tqmyaszlzle nidr amrlx. 
Yawe Gct kc tqrninr, nim txpwz kx xplr-esz'ngr, Mz nzangidati-krm me pnz drtwrm. 
Kxmule-esz' srkau xplr, a' sc tqlolvzq, X mz nzprtz-krm nrc kxoda, lclvzbzme murde nrwx navo. 
X aovxio-zvzq enqmi rmqng mz nzxplr-esz'ngr-krm, Da kc tqwai nztabrti-krm Mepwz ngr prla kc bqnc. 
Kxrpalz, bongavz x drtc' nyzmqng, Murde nim kx rwzngr nrlc x dalrdeng amrlx. 
X doa x da amrlx mz nrlc tulvzo Nzaxvctr-lxblrng mz nzangrlvz-krdr drtqm, 
Mz nzrpi-krdr kx, “Nim kc tqmatq-esz'ngr, X nzxplr-krm etu-esz'ngr. 
Nou nzaclve-krm nrlc nidr seleng: Nztubqngr, nzrsakrlrngr, nzaodu-zvzngr, x nzangidatingr.” 
Yawe, ngi da kxmrlz nzmalq-abrtzlvz-krgr nim, Murde xngibzkr nzulrm. 
X ngi da kxmrlz nzbilvz-krgr drtqm, X nzglqlz-krgr nztubq-esz'ngr-krm mz zbq kang kqlu. 
Murde axplrq nigr, X aovxiokr enqmi rgrng mz nzokatr-krm. 
Yawe, nim Gct kc tqtr-esz'ngr x angio-txpwzkr nim. Murde mcpxbzme king rgr lc tqaclve-zpwxle nigr. 
Mzli kc bqnc, mz nzyrlq-krm Devet nzngini-krde king, vzme mz profet nemqng, X rpibzme mz nzrmwiblengr kx, “Aprcbo zmatq mz kzdq ngrlrvea kx xplr, Mz nzarmyalz-krnge nide mz leplz txneng, murde nanginide king. 
Ncblo kxnzawz nenge lc tqmcpxx, Devet, X aelux nide mz tolo kxtr. 
Sa namailzx nide mz mqnge. X sa na-axplrx nide mz zmatq rnge. 
Kxdrka'-ngrng kcng tzngi enqmi rdeng, trtxpnzngr nzyatr-krbzlr bade Mz nzamyati-krbzlr drtqde. 
Murde sa natamyr-ngrbo nidr Mz nznibqti-krbo kxnzpxtxpx-ngrdr nide. 
Sa na-aodu-zvzx nide x nanginide kztenge. X sa nabatrpo bade nzaovxio-krde mz drtqnge. 
Sa nakabo bade zmatq ngr nzaclve-krde Prla Meditrenia, Navz nakrlzbzle Lue Yufretis. 
Sa namcle kx ninge trtede, Kc tqngi Gct rde x butqbr nyzde kc tqrlakitrle. 
X sa na-apusr-ngrne nide mrlxnge krdau, Mz nzarmyalz-zlwz-krbo nide mz king amrlx mz nrlc. 
Drtwr kxesz'ti kc tqyrlqbo bade, trtxpnzngr nzyzpr-krde, Mz nzangidati-krnge nzaodu-zvz-krnge nide. 
X nzyrlq-krbo nzaclvekr nqvi lrde tqyc tqyc, Da kc tqwai nzyc-alokr bongavz.” 
X rpi-mopwz Gct kx, “A' nzmu doa nedeng naesablqtilr loukxtr scnge, Mz trnzlolvz-amqngi-krdru nzalvztr-krnge 
X nzmu trnavz-nqblqlru me pnz drtwrnge Mz nzpxtxpx-krdr natqnge, 
Sa na-ayrplapxxng mz alwx ngrdr, Mz nzaetq-krbo drtqdr mz nikeng nzvz-rbrtilr. 
A' trpnzngr nzatao-krnge da kc tqesalz-ngrbo mz Devet, A' sa na-aodu-zvzx nide. 
X trpnzngr nztekqtr-krnge natqnge, A' sa na-atutr-zvzx nzesz'tikr drtwr kc tqyrlqbo bade. 
Esalzpex mz drtqnge kxtr X amqngipex kx trtxpnzngr nzesabrti-krnge nide. 
X nzaclvekr nqvi lrde tqyc tqyc, Da kc tqwai nzti-alokr nepi x nzprtz-krm temz x nztao-krde.” 
Yawe, rpiq da lc, a' mzli ka drtqm satrpem bange x rlaszpeq ninge, Mz nzngyati-moukr drtwrm ninge, king kc tqmcpxq. 
Nikipeq Nzesz'tikr Drtwr kx yrlqbzme mz melrmqgr Devet, kx natu-zvzbzme mz nibr nqvi lrde, Mz nzapusr-krbzme kraon ngr narnge brmrda. 
Awxlikitxopebzme drkq ngr mzteadau nyznge. X odati-atwrnr-ngrbzme lrpalvc nyzgrng amrlx. 
Enqmi rgrng amrlx nzatrkati-zlwzlr nigr. X lr mrkzbleng kcng tzmnc-aepztrpqng bagr nzyrpalelvzlr ninge, king nem. 
Murde ngi-batrpzme nzxplrkr ncblo ngr vea nedrng. X mzli ka sc tzbilvzpelr. 
Amyatibzme nipna scngeng mz nzrpna-krnge, X rlr-ngrbzme nzaovxio-krdr nigr. 
Odatipeq tron nyznge, Mz nzkatxpx-krbzme zmatq ngr nzngini-krnge king. 
Amyatibzme drtqnge mz mz leplz. X ngi-batrpe' nzngini-ani-krnge lrtzlvz. 
Yawe, bzkq mnc-rlrume bagr. X bzkq apqtipeq nigr mz nzngya-zlwzkr drtwrm. 
A' na-aoti drtwrm nzmrbcnekr nzlu-krgr nigr leplz Mz nzmnc-krgr mz nrlc. 
Trpnzngr leplz kx na-arlapx-lzbq, Murde nigr amrlx mnclzbzkr mz zmatq ngr nzbzngr. 
Kxetu, opxm kx trangidatipewq natqm kc tqpibzme mz Devet, Murde trxngipepwzkru nzaodu-zvz-krm kc bqnc. 
Bzkq mrbrtr mz drtwrm nzobqszokr leplz ninge, kxnzawz nem, Murde kxnzmnc-mrbr lcng sc tzbilvztipelr ninge. 
Yawe, enqmi rmqng nznelvztilr ninge, king kc tqmcpxq, Mz nzxtrnga-krdr ninge. 
Na-armyalzku Yawe, kc tqngi Kxetu rgu. Tqvzpe, tqvzpe. Eu. Na-armyalzku Yawe.