Sam.
101.
Nabz ne Devet. Yawe, nangr-ngrbo bam Nabz ngr da kxtubq x nzangidatingr. 
X namnc-nqblqx nztubqkr nqmq krm mz nzokatr-krm ninge. X nabznge nalqngi zvz mz nzmnc-krgr badr lr ma nyznge. 
Tr-rlr-ngrpwc'u nzprtr-krm da kxtrka brma. X pxtxpx-ngrne krkcng tzesablqtilr nim. 
Delc, nartctx-ngrne nqmq kr kxdrka'-ngrng, X nayrlqpx-lzbqnge mz da kxvz-rbr. 
Sa narpwa'-ngrbo krkcng tzpikiti-awalr kxnzmnc-aepztrpzng badr. X kxnzglqpx-lzbqng trmrlzu mz nzobq-krnge. 
A' kxnzlxngiti-zpwxlr nim nanginidr kztengeng, X kx nabzdr lqngi sa nawztrpqng bange. 
A' krkcng tzesabrng x tzpokia-zvzng, Trtxpnzngr nzmnctr-krmlr bange. 
Murde mz zbq kang kqlu sa nalolvztix kxdrka'-ngrng X namaszlrpx-ngrne nidr mz mzteadau nyzm.