Sam.
103.
Naglqpxx Yawe mz nabznge atwrnrngr! Naglqpx-zvzx drtqde kxtr. 
Na-aoti zvz drtwrnge nivz lrde, X da kxmrlz kcng tqalemle bange. 
Murde katxpxbzle alwx rngeng amrlx. X amrlzle ninge mz zyagox amrlx. 
Arlapxle ninge mz nzbzngr. Aodu-zvzle ninge. 
Okatrle ninge mz da kxmrlz Murde nzlu-krnge naboi x nrkrdrtqnge naxplr, mz nzapu-krnge lr. 
Yawe okatrle kxnzobqszong murde ale-zvzle da kxtubq Mzli kc tqayzlu-ngrbzle da mz leplz. 
Aelwa-ngrbzle me pnz drtwrde mz Mosis, X zmatq ngrde mz lr Israel. 
Yawe mrlz-esz'ngr x aodu-zvzle nigu. Drtwrde trngya-aniu, a' okatr-zvzle nigu. 
Trkrlzleu nzaboitr-krmle zngya ngr drtwrde bagu, A' ani txpwz nzipq-mou-krde nigu. 
Kxmule-esz' takitrde nzayrplapx-zlwz-krde nigu, A' ycngr drtwrde nigu, x trayzlupleu bagu mz nzvz-nqblq-krde nzvz-rbr-krgung. 
Murde sc tqaodu-zvzpele nigu kcng tzamrluelr nide, Murde nzetu-krm nivz lrde bagu myaszpxle bongavz. 
X mz nzipqpx-krbzle alwx rgung, Apule kx rtctx-ngrbzle rlru, me trpengr nzrmc-moungr. 
X Yawe amqtrple drtwrgu, Da kc tqwai trte nzamqtr-krbzle drtwr doa nedeng. 
Dcpx mz drtwrde kx nigu leplz kxtrnzxplrung, Murde wztx-ngrpwzle nigu mz drtc'. 
X nzlu-krgu mrbcnepwz, Apule nepi kc tqprtzm mz nourla, x tqxplr mzli kc bea. A' sc tqtaope mou milzpq. Murde mzli kc nabzngr leplz trpengr nzrmc-moungr nidr. 
A' Yawe aodu-zvzle x amrlz-zvzle nigu, Kcng tzamrluelr nide, Mz nzyrlq-angidr-krgu natqde, X mz nzlolvz-amqngi-krgu Nzesz'tikr Drtwrgu badr. 
King Yawe wxbu mz tron nyzde Heven, Mrkc tqaclve-ngrde nrlc atwrnrngr. 
Nimu enjrl kxnzmatq kcng tzvz-nqblqlr natqde, Naglqpxamu nide! 
X nimu ami ngr Heven kcng tzwztrpzng bade mz nzatutr-krbzmu me pnz drtwrde, Naglqpx-kzamu nide. 
X nigu amrlx mz nrlc tulvzo naglqpx-kzku nide. Naglqpxx Yawe mz nabznge atwrnrngr!