Sam.
104.
Yawe Kxrpalz, naglqpxx nim mz nabznge. Murde nim Gct kc tqluli, tqmyalz-esz'ngr. Nzmyalz-krm x zmatq ngrm nzngrlelvzlr nim nzapulr lrpz kx kq-ngrn. X zyzlr ngrm apule lrpzu scm. Bongavz apule nqni kxetu kc tqprlxpxq. X atuome elr nctrpou ngr ma nyzm. Dcbz apule lika kx lvc-ngrn, Mz nztwz-krde nim nenq kxwq. 
Zmatq ngrm batrpzle mz enjrl nemqng nzlvc-ani-krdr mz nzapu-krdr nenq. X menrpa lcng tzwztrpzng bam nzapu-kzlr bzlrpc kc tqpctipx. 
Wztioq nrlc mz nou rplz kxmqngi, Murde trpnzngr nzycngrlr-krde. 
Mzli kc ayrnrngr, drtc' mrbrobz prla, X newz amrlx akq-atwrnr-ngrde. 
Zbz mzli kc tqpnanati-ngrn prla sc tqpzneope, Mz nzxlr-krde natqm kc tqapule bzlrmei. 
Prla pzneom mz nar-newzng, vzo krlzobzle nabzlwang, Vzo mrkc tqyrlqbzme kx nalrlz-ngrmle. 
X yrlqbzme bz ngr me naesakingr prla, Murde ma tqakq-atwrnr-mou-ngrde drtc'. 
Wz-ngrn aulz, nzaulzmqng mz nabzlwa amrlx, Lue lcng nzvzong x lue kxetung nzyrleng mz mzlir newz amrlx. 
Animol amrlx nzrmnqng lue lcng, Mz nzbrlxkzkr drtwrdr. 
Utc nzrwzpe-ngrng ma nyzdr x nzngr-zvzng Mz nounc mz nqlvi r lue lcng. 
Adcme tewa mz ma nyzm bongavz. Dcom mz newz amrlx. X amrlzle drtc' murde kxnzlung kcng tqwz-ngrn namnc-zpwxng. 
Wz-ngrn nabr x dakxnzng nztuting mz drtc' Nangi nan animol x leplz. 
Rkame waen kx na-aelalz-ngrm drtwrgr, X tolo kx na-alqngr nrkrdrtqgr, X dakxnzng kx naxplrngr nigr. 
Yawe, nounc nyzm kc tqpetiq Nzdo-zlwz-krdr vzpxm mz nzadco-krme tewa badr. 
X utc kang kqlu nzmncpxng mz nounc lcng. X nzwzpx-ngrdr ma nyzdr elr. 
Gout nzmncomqng mz newz, X animol kxnztopwzng nzmnc-kapqneng me rplzngr. 
Yawe, wz-ngrn temz nangi noabx ngr mzli, X nepi noabx ngr zbq. 
Nim kx rwzngr nzlo ngr nrlckxbq, Mzli r nzprpx-krm animol kzpeto me nzmnc-ngrdrng. 
Laion nzyrni-katong mz nzrtangr-krdr dakxnzng Kx nakabzme badr. 
A' mzli kc tqprtz-ngrm nepi, Sc tzyzlupeng ma nyzdr, tzmwipeng. 
X mz nrlc kxngrlx, leplz nzvzng mz nzale-krdr nzwz-krdr, Nzwzng vz vz krlzbzle milzpq. 
Yawe, animol kcng tqwz-ngrn kqlu-esz'ngr. Nrlc ka yrbulzm mz da lcng amrlx tqwz-ngrn mz nzyrplapx-krm. 
Dcpwe yrlwrlz-ngrm nc kxkqlu x rblx nzrlwx-krgrleng. Kzdu nc lcng nzetuting x kzdu nztopwzneng. 
Lcsu kxnzkqlung nzvoneng prla. X nc kxbe kc tqwz-ngrn drtqde besilr ayone kz elr. 
Animol lcng nzmnc-xglelr nim, X rka-zvzbzme nadr dakxnzng. 
X mz nzrka-krbzme da kxmrlz badr Amrlz-zvzq nidr. 
Mzli kc tqrka-ngrbzme zycmini sc tzlupeng, Murde nim Kxrpalz. X ngi-batr-zvzbzme nzlukr animol amrlx mz nrlc. A' mzli kc tqpxtxpx-ngrn nidr, nelzdr vzdzm. Murde mz nzrkatxpx-krbzme zycmini lc, nzbzng. X nzyzlu-moung mz drtc' kc tqwz-ngrn nidr. 
Nzmyalzkr Yawe navz zvz, X nzabrtzlvz-krde nikeng wz-ngrdeng amrlx. 
Mz nzobqo-krmle, drtc' ycngrlrlzm apule nengq kx vzm, X ngi-batrpzle nzsikapukr trmami mz nzmaletr-krde newzng. 
Na-angrlvz-zvzx Yawe Gct rnge, Navz nakrlzbzle nzesakikr nzycmini-krnge. 
Mrlzvxitx Yawe nzabrtzlvz-krde natqngeng mz nzngr-krbo bade, Murde nide kc tqrngi-batr-zvzm nzabrtz-krnge. 
Mrlzvxitx nznibqti-krde kxdrka'-ngrng Murde nzatrkatilr nrlc kc tqwz-ngrde mz nzpxtxpx-krdr nzglqlz-krdr nide. Yawe naglqpxx nim mz nabznge. Eu. Naglqlz-zvzkr nim.