Sam.
110.
Nabz ne Devet. Yawe rpibzle mz King kc tqngi Kxetu rnge kx, “Wxbu mrlc tqmatq-esz'ngr mz nrlarnge kxrtc, Navz nakrlz-zpwxbzle mzli kc nangi-batr-ngrbo mz enqmi rmqng nzmetx-krbzlr bam.” 
Murde Yawe sa nangi-batr-kzpzle nzetunepxkr zmatq ngrm mz nzvzpx-krme Jerusalem, Mz nzaovxio-krm enqmi lcng. 
X mzli lcde, drtq leplz nemqng sa navq zlwz nzprtr-krbzlr mz ami nem, Murde namailzq nidr mz zmatq ngrm kc tqluli, tqtr. X obla nemqng sa navzmqng naprtr-kzpzng bam mz nzaxplr-mou-krdr ami nem. Na-apubzlr badr mi kc tqvzom mz nzrka-krbzle nzlungr kxmrna mz nabr. 
X Yawe esalz-ngrde drtqde x trnatekqtrleu drtwrde. Rpile kx, “Nim King nenge, nangini-alo-kzp pris mz nzvz-nqblq-krde nzwzkr Melkesidek.” 
X Yawe sa natubz mz nibrm, Mz nzmilxtxo-krde king kxnzkqlung mz zngya ngr drtwrde. 
X sa na-ayrplapxle lr mrkzbleng mz nznibqti-krde nidr amrlx. X sa na-aovxio-atwrnr-ngrde king rdrng mz nrlc tulvzo. 
X nim, King rnge, mz nzvz-krm lc, nzxplr-kato-krm sa namatqnepx kz. X sa na-aovxio-atwrnr-ngrn nrlc.