Sam.
118.
Aodu-zvzle nigu. Awi-ngrbzku bade Nzmrlz-esz'ngr-krde. Aodu-zvzle nigu. 
Aodu-zvzle nigu. Lr Israel amrlx Napipxku kx, “Aodu-zvzle nigu.” 
Aodu-zvzle nigu. X nimu pris nedeng Napipxamu kx, “Aodu-zvzle nigu.” 
Aodu-zvzle nigu. X nimu kcng tzaxvctrmqng, Napipx-kzamu kx, “Aodu-zvzle nigu.” 
Mzli kc tqmnc-ngrne mz nzkxpungr, kqlex Yawe, Ayzlumle natqnge x aopxbzle drtqnge. 
Trtxpnzngr nzmwxlr-krnge, murde Yawe tu-zvzm mz nibrnge. X trtxpnzngr leplz kx krlzle nzatrkati-krde ninge. 
X sa namcx nzaovxio-krbzle enqmi rngeng, Murde mnc mz nrlarde nyznge. 
Mrlzvxitx nzmnc-xgle-krgu nzokatrkr Yawe Murde myaszpxle nzokatrkr leplz nigu. 
X mrlzvxitx nzabrtr-krbzku drtwrgu bade mz nzrlapx-krgu, Murde myaszpxle nzrmctitr-krbzkule mz kxnzrmailzng. 
Aovxiox mz zmatq ngrde mzli kc enqmi rngeng Tztu-ngalelvz-ngrdr ninge. Aovxiox mz zmatq ngrde. 
Aovxiox mz zmatq ngrde mzli kc tzavztio-ngrdr Ninge mz trtxki. Aovxiox mz zmatq ngrde. 
Aovxiox mz zmatq ngrde dzbe meningilo lc. Nzapulr nabr kx ngc. Aovxiox mz zmatq ngrde. 
Kxnzyrkrtilzlr ninge mz nzotangr, ycpwz pipz na-aovxio-krdr ninge. A' Yawe kx okatrle ninge. 
Nide oa kx xplr kc tqmailzle ninge mz vea, X tqarlapxle ninge. 
Mz nzmnc-krdr matelq ngr vea nyzdr, Ncblo ngr vea nedeng nzngr-abrtz-ngrdr nzaovxio-krde, nzrpi-krdr kx, “Yawe, oa ngr vea, kc tqaovxio zvz Mz zmatq ngrde. Yawe, oa ngr vea.” 
Delc trbz-ngrneu, a' lubex Murde napipxbo da kcng tqmatq tqaleting Yawe. 
Kxmule-esz' rlrpx-ngrde nzakxpu-zlwz-krdr ninge, A' trngiu dalr nzbz-krnge. 
King malqtrpz yz, rpile kx, “Lvxpxm bange naonrx ngr Mangr-nzangiongr Yawe, Murde navztrx elr mz nzawi-krbo bade.” 
X pris neng Yawe nzayzlubzlr natqde kx, “Krlc naonrx nyz Yawe, X kxnztubqng txpwz kx navztrng elr.” 
Mz nzvztrkr King elr, rpile kx, “Yawe, awi-zvzbo bam murde ayzlu-ngrme nzkrka'-krnge, Mz nzarlapx-krme ninge mz mq enqmi rngeng.” 
Leplz amrlx kcng tzyrlwr-lxblrng Mangr-nzangiongr nzrpilr kx, “Rplz kc etu tzpxtxpx-ngrdr ncblo kcng tzrwz-ngrng ma, Nzaelwapxngr kx nide nou rplz kc tqmyatxpx-zlwzbz.” 
Da lc Yawe kxrwzngr. X abrtztx-zlwz-ngrgu. 
Krlc zbq kx wzpxngr Yawe. X na-awi-ngrbzku bade. Murde nide kc tqrbatrp zbq lc Nzrmulvzngr nzaovxio-krgu mz vea. 
Ayzlu-ngrmle natqgu kx, “Yawe, arlapx nigr Mz nzokatr-krm nzaovxio-krgu.” 
Yawe, glqlzkr nide kc tqvzm mz drtqm. Glqlzkr nide mrka mz Mangr-nzangiongr. 
Yawe nide Gct kc tqokatr-zlwzle nigu. Delc naelami-ngrgu leu ngr nzaovxiongr, Mz nzvz-ngale-krgu olta nyzde Kc tqtr-esz'ngr. 
Yawe, nim Gct rnge x na-awi-ngrbo bamq Nzmyalz-esz'ngr-krmq. Yawe, nim Gct rnge. 
Aodu-zvzle nigu. Awi-ngrbzku bade Nzmrlz-esz'ngr-krde. Aodu-zvzle nigu.