Sam.
128.
Nabz kx nzngrnelzngr Jerusalem mz nzangiongr. Yawe sa na-amrlzle trte kx amrluele nide, X o-zli-zvzle nzti rde. 
Murde da kx naokatrle lr ma nyzde navzpxm mz nzwz-krde, X na-abrtz-ngrde nzmnc-zpwx-krdr. 
Olvz nalzde na-apule nc bia kc nrade tqkqlu, Murde doa nedrng kalr na-apulr nrtr ngr nc brpi mz nzwxbu-ngalelvz-krdr nyr pnrde. 
Delc Yawe tqamrlz-ngrde Trte kx amrluele nide. 
Yawe, mz nzmncpx-krme Mangr-nzangiongr, Amrlz nigr lr Israel, murde namnc-zpwxkr. X trtegr lcng namc-zvzlr da kxmrlzting kcng tqaleme bagr, nigr lr Jerusalem. X namc-kzlr nzmnckr doa ne doa nedrng, x sc tzbz-ateng.