Sam.
132.
Nabz kx nzngrnelzngr Jerusalem mz nzangiongr. Yawe, na-aoti drtwrm nzkxpukr Devet, Mz nzwztr-krbzle bam. 
Nim Gct kc tqrninr tqangio Jekop. X Devet esalzbz bam. 
Rpibzle kx, “Yawe, trtxpnzngr nzvz-krnge ma nyznge o mz nelvq nyznge, X trtxpnzngr nzama-krnge x nzmwi-krnge, 
A' nawzti-kaix dq ma kx namnc-ngrn, Mz nzngini-krm Gct r Jekop.” 
Mzli kc Devet badr ncblo nedeng tzmnc-ngrdr Efrata, Nzxlrlr nrpa ngr Bokis kc tqyclz-ngrm Nzesz'tikr Drtwrdr Badr Gct. X sc tzrmctipelr mz mztea Jerim mz nrlarnrlc lcde. 
X sc tzrpipelr kx, “Naglqpeku Bokis lc mz Tentkxtr nyz Yawe. Mz nzangio-krgu nide mrkc tqwxbu-ngrde mz tron.” 
X sc tzrpipebzlr mz Gct kx, “Yawe, vzm mz Tentkxtr nyzm, Murde namnc-zvzq mrkc tqycngr Bokis ngr zmatq ngrm. 
Murde pris nemqng nayapwxtipxbzlr nztubq-esz'ngr-krm mz leplz nedrng, Kcng na-angrlvzlr nim.” 
Yawe, mzli ka bzkq pxtxpx-ngrn king rgr kc tqmcpxbzme, A' atutr nzesalz-krbzme mz kxnzawz nem, King Devet. 
Murde esalz-ngrbzme bade da kx trnzkatxu, Mz nzrpi-krbzme bade kx, “Sa nayrlqbo dq mrlxm kx nanginide king kx na-aclvele lr Israel mz nibrm. 
X nzmu mrlxdrng nayrlq-angidrlr nzesz'tikr drtwrgr badr, X navz-nqblqlr natqnge kc tqkapxbo badr, Sa nangini-zvzdr king, Badr mrlxdrng, tqyc tqyc.” 
Yawe, rlxtibzkr nzamrlz-krm king nem. Murde mcpxq Jerusalem nangi mztea nyzm, 
Mz nzrpi-krm kx, “Krlc mztea kx namnc-alo-ngrne, Mz nzvz-nqblq-krde me pnz drtwrnge. 
Sa nakabo mz lr mztea nyznge lc da kxmrlzting kxkqlu. X sa na-aputrx kxtrnzrngiscung murde nelzdr nakrlc x naesatxpx zpwx. 
Sa nabatrpo mz pris nengeng nzyapwxtipx-krbzlr mz leplz nengeng nzarlapx-krnge nidr, Murde leplz kxnztr lcng namalqlvzlr ninge. 
Sa nayrlqx king kc tqmatq Jerusalem kx navzpxm mz nqvi lr Devet, X nzaclve-krde trtxpnzngr nzesaki-krde. 
Sa na-amyalzx nide mz nzalao-krbo kraon mz narde, A' sa nabatrpo nzmyakr drtq enqmi rdeng.”