Sam.
140.
Nabz ne Devet kx yrbzle mz kxrmailz ngr dzbe kxnzngrng. Yawe, arlapxbz ninge mz kxdrka'-ngrng Kcng tzsuti drtwrdr nzatrkati-krdr ninge. 
Nzryrlq-zvzng drtwr kxtrka mz nabzdr, X nzapqtr-zvzlr drtwr ngr nzotangr. 
Natqdr nzlvati apule nipna kr ningidoe kc tqrtq, Mz nzrpikitingr x nzrpibqtingr. 
Yawe, arlapxbz ninge mz zmatq ngrdr. X aclve-angidrbz ninge mz krkcng tzryrlqng drtwr kx na-atrkati-ngrdr ninge. 
Sc tzglqpx-lzbqng nzamwi-kapqlr trtxki kx naprtz-ngrne mz nzatu-krdr br mz nzti rnge. X tzryrlqng drtwr kx nalolvz-ngrdr ninge. 
Yawe, xlrm nzkrka'-krnge, Murde rpi-zvzbo bam kx, “Yawe, nim Gct rnge.” 
Kxetu rnge, nzxplr-krm arlapxle ninge. X amyaq narnge mz nzvecngr. 
Bzkq rlr-ngrbzme nzngidatikr drtwr kcng tzyrlq kxdrka'-ngrng lcng Mz nzbilvz-krdr nzlolvz-krdr ninge, kxmule-esz' nzsuti zlwz drtwrdr. 
Enqmi lcng tztu-ngalelvzlr ninge. Batrpz nzayzlu-krbz badr natq ngr zngya kcng tzpimlr bange, murde nangq-moule nidr. 
X nyr natatiom nangc-ngrdr, X nartctiongr nidr mz gq kx trnarlapx-ngrdru. 
Suti drtwrnge kx krkcng tzpokiang nzmnc-krdr mz drtc' natangqneo. X da kxtrka nadwatibzle krkcng tzota-zvzng mz nzodati-krde nidr. 
Yawe, krlzx kx tu-zvzbzme mz nibr kx trpnzngr scde zmatq, X okatrq kxnzkxpung mz nzatubqti-krm da kx vz-rbr. 
Leplz kxnztubqng sa na-awibzng bam, X namnc-zvzamu badr.