22
Ihubo LikaDavida Lokudumisa
1 UDavida wahlabelela uThixo amazwi alelihubo lapho uThixo wamsindisa esandleni sezitha zakhe zonke lasesandleni sikaSawuli. 2 Wathi:
“UThixo ulidwala lami, inqaba yami lomsindisi wami;
3 uNkulunkulu wami ulidwala lami, lapho engiphephela khona,
isihlangu sami lophondo lokusindiswa kwami.
Uyinqaba yami, isiphephelo sami lomsindisi wami
uyangisindisa ebantwini abalodlakela.
4 Ngakhuleka kuThixo ofanele ukudunyiswa,
njalo ngikhululwe ezitheni zami.
5 Amagagasi okufa angikhulela;
lezikhukhula zokubhubhisa zangikhulela.
6 Izibopho zengcwaba zangithandela;
imijibila yokufa yangijamela.
7 Ekukhathazekeni kwami ngakhuleka kuThixo;
ngakhala kuNkulunkulu wami.
Esethempelini lakhe walizwa ilizwi lami;
ukukhala kwami kwafika ezindlebeni zakhe.
8 Umhlaba wagedezela wazamazama,
izisekelo zamazulu zanyikinyeka;
zagedezela ngoba wayethukuthele.
9 Intuthu yalanquka emakhaleni akhe;
umlilo ohangulayo waphuma emlonyeni wakhe,
amalahle avuthayo alavuka ephuma kuwo.
10 Waqhekeza amazulu wehlela phansi;
amayezi amnyama ayengaphansi kwezinyawo zakhe.
11 Wagada amakherubhi waphapha;
wantweza phezu kwamaphiko omoya.
12 Wenza umnyama isigubuzelo esimhanqileyo,
amayezi ezulu amnyama asemkhathini.
13 Phakathi kokukhazimula kobukhona bakhe,
izikhatha zombane zalavuza khona.
14 UThixo wakhwaza esezulwini;
ilizwi loPhezukonke lanqenqetha.
15 Waciba imitshoko wazihlakaza izitha,
ngezikhatha zombane waziqothula.
16 Izigodi zolwandle zambulwa
lezisekelo zomhlaba zavezwa obala
ekukhuzeni kukaThixo,
ngomfutho wokuphefumula kwamakhala akhe.
17 Welula isandla sakho usezulwini wangibamba
wangihlenga enzikini yamanzi.
18 Wangihlenga esitheni sami esilamandla,
ezitheni zami ezazingigabhela ngamandla.
19 Zangijamela mhla ngisebunzimeni,
kodwa uThixo waba yinsika yami.
20 Wangikhupha wangibeka endaweni ebanzi;
wangihlenga ngoba wayethokoza ngami.
21 UThixo ungenzele okulingene ukulunga kwami;
wangivuza ngokufanele ukuhlanzeka kwezandla zami.
22 Ngoba ngizigcinile izindlela zikaThixo;
angenzanga okubi ngokufulathela uNkulunkulu wami.
23 Yonke imithetho yakhe iphambi kwami;
angizifulathelanga izimiso zakhe.
24 Ngibe ngilokhu ngimsulwa phambi kwakhe
njalo ngisixwayile isono.
25 UThixo ungivuze ngokufanele ukulunga kwami;
ngokufanele ukuhlanzeka kwami phambi kwakhe.
26 Kwabathembekileyo lawe uthembekile,
kwabamsulwa lawe umsulwa,
27 kwabahlanzekileyo uziveza uhlanzekile,
kodwa kwabangaqondanga uziveza ukhaliphile.
28 Uyabasindisa abathobekileyo;
kodwa amehlo akho akhangele abazigqajayo ukuba ubehlisele phansi.
29 Uyisibane sami, Oh Thixo,
uThixo uguqula ubumnyama bami bube yikukhanya.
30 Ngosizo lwakho ngingaphuma ngimelane lebutho lempi,
ngoNkulunkulu wami ngingawukhwela umduli.
31 Izindlela zikaNkulunkulu uqobo lwakhe ziphelele;
ilizwi likaThixo kalilasici.
Ulihawu labo bonke abaphephela kuye.
32 Ngoba ngubani uNkulunkulu ngaphandle kukaThixo?
Njalo ngubani oliDwala ngaphandle kukaNkulunkulu wethu na?
33 NguNkulunkulu ongihlomisa amandla
enze indlela yami iphelele.
34 Wenza inyawo zami zibe njengezempala;
ungenza ngime ezingqongweni.
35 Ufundisa izandla zami ukulwa impi,
izingalo zami zingaligobisa idandili lethusi.
36 Uyanginika isihlangu sakho sokunqoba;
uyazehlisela phansi ukuze ungenze ngibe mkhulu.
37 Uqhelisa indlela enginyathela kuyo,
ukuze inqagala zami zingapheci.
38 Ngaxotshana lezitha zami ngaziqothula;
kangibuyanga ngingakazibhubhisi zonke.
39 Ngaziqothula okupheleleyo, njalo zazingeke zisavuka;
zawela ngaphansi kwezinyawo zami.
40 Wangihlomisa ngamandla okulwa impi;
wenza abaxabana lami bakhothama ezinyaweni zami.
41 Wenza izitha zami zafulathela zabaleka,
njalo ngazibhubhisa izitha zami.
42 Bakhala becela uncedo, kodwa wayengekho owayengabahlenga
kuThixo, kodwa kaphendulanga.
43 Ngabatshaya bacholeka njengothuli lomhlabathi;
ngabagxoba ngabanyathela njengodaka ezindleleni.
44 Ungikhulule ekuhlaselweni yilababantu;
ungigcine ngiyinhloko yezizwe.
Abantu engangingabazi sebebuswa yimi,
45 abezizweni bayatshotshobala phambi kwami;
bathi bengizwa nje ngendaba, bangilalele.
46 Bonke badelile;
beza bethuthumela bevela ezinqabeni zabo.
47 UThixo uyaphila! Alidunyiswe iDwala lami!
Kaphakanyiswe uNkulunkulu wami, iDwala, uMsindisi wami!
48 UnguNkulunkulu ongiphindiselelayo,
obeka izizwe ngaphansi kwami,
49 ongikhululayo ezitheni zami.
Wena wangiphakamisela ngaphezu kwezitha zami;
wangihlenga ebantwini bodlakela.
50 Ngakho ngizakudumisa, Oh Thixo, phakathi kwezizwe;
ngizahlabelela indumiso yebizo lakho.
51 Unika inkosi yakhe ukunqoba okukhulu;
ubonakalisa umusa wakhe ongapheliyo kogcotshiweyo wakhe,
kuDavida lenzalo yakhe kuze kube phakade.”