5
Ukukhululeka KuKhristu
1 UKhristu wasikhululela ukuthi sibe lenkululeko. Ngakho manini liqine, lingavumeli ukuthi libotshelwe futhi ejogeni lobugqili.
2 Qaphelani amazwi ami! Mina Phawuli, ngiyalitshela ukuthi lingavuma ukusoka, uKhristu kayikuba lusizo kini. 3 Njalo ngiyaqinisa ebantwini bonke abavumayo ukusoka ukuthi balomlandu wokulalela umthetho wonke. 4 Lina elizama ukulungisiswa ngomthetho selehlukaniswe loKhristu; selehlukane lomusa. 5 Kodwa ngokukholwa siholwa nguMoya silindele ithemba lokulunga ngokutshiseka. 6 Ngoba kuKhristu uJesu ukusoka loba ukungasoki akulasizo. Into kuphela eyiyo eqakathekileyo yikukholwa okuzibonakalisa ngothando.
7 Kade lihamba kuhle. Ngubani olikhuphe ekulandeleni iqiniso na? 8 Ukuncenga okunjalo kakuveli kulowo olibizayo. 9 “Imvubelo encinyazana ibilisa inhlama yonke.” 10 Ngiyathemba eNkosini ukuthi kaliyikwamukela omunye umnakano. Lowo olibeka phakathi kwenyakanyaka uzajeziswa, loba engubani. 11 Bazalwane, nxa ngisatshumayela ngokusoka, pho kungani ngilokhu ngihlukuluzwa? Nxa kunjalo isikhubekiso sesiphambano sesisusiwe. 12 Labo abahluphayo, ngifisa ukuthi ngabe bayaqhubeka bazithene!
Ukuphila NgoMoya
13 Lina bazalwane bami, labizelwa ukuthi likhululeke. Kodwa lingasebenzisi inkululeko yenu ukuthokozisa inyama* 5.13 ibala elithi inyama ngesiGrikhi litsho imvelo yesono okuyindlela yokona koluntu okuphambene lokwenza intando kaMoya; lelibala litholakala lakuvesi 16, 17, 19 lo 24 kanye laku 6.8.; kodwa sizanani omunye lomunye lizehlisa ngothando. 14 Umthetho wonke uhlanganiswa ngumlayo owodwa othi: “Thanda umakhelwane wakho njengoba uzithanda.”† 5.14 ULevi 19.18 15 Nxa liqhubeka lilumana lokudlanana, qaphelani hlezi liqedane du.
16 Ngakho ngithi philani ngoMoya, kaliyikuthokozisa izinkanuko zenu zenyama. 17 Ngoba imvelo yesono ikhanuka okuphambene loMoya, loMoya ufuna okuphambene lemvelo yesono. Kuyaphikisana ukuze lingenzi elikuthandayo. 18 Kodwa nxa likhokhelwa nguMoya, kalikho ngaphansi komthetho.
19 Izenzo zenyama zisobala: ukuhlobonga, lokungesabi ukujeziswa, lokuxhwala; 20 ukukhonza izithombe lobuthakathi; inzondo lokuxabana, umona lentukuthelo, lobuhwaba, ukungezwani lokungavumelani 21 lomhawu; ukudakwa lokuzitika ngamanyala kanye lokunye okunjalo. Ngiyalixwayisa, njengoba lami ngaphila phakathi kwakho ukuthi abaphila kanje kabayikulidla ilifa lombuso kaNkulunkulu.
22 Kodwa izithelo zikaMoya luthando, lokuthokoza, lokuthula, lokubekezela, lomusa, lokulunga, lokuthembeka, 23 lobumnene kanye lokuzithiba. Ezintweni ezinje akulamthetho. 24 Labo abangabakaKhristu uJesu sebayibethela esiphambanweni imvelo yabo yesono lokufutheka kwayo kanye lezinkanuko. 25 Njengoba siphila ngoMoya, kasenzeni okuhambelana loMoya. 26 Kasingazikhukhumezi, singaqalani kumbe senzelane umona.