AmaHubo.
29.
Ihubo likaDavida. Mupheni uThixo, lina ziphakanyiswa, mupheni uThixo ubukhosi lamandla. 
Mupheni uThixo ubukhosi obufanele ibizo lakhe; mkhonzeni uThixo ekukhazimuleni kobungcwele bakhe. 
Ilizwi likaThixo liyazulazula phezu kwamanzi; uNkulunkulu wenkazimulo uyandindiza, uThixo uyandindiza phezu kwamanzi amanengi. 
Ilizwi likaThixo lilamandla; ilizwi likaThixo lilobukhosi. 
Ilizwi likaThixo lephula imisedari; uThixo uyiqamula ibe yizicucu imisedari yaseLebhanoni. 
Wenza iLebhanoni itshakale njengethole, iSiriyoni njengeguqa lenyathi. 
Ilizwi likaThixo litshaya ngezikhatha zombane. 
Ilizwi likaThixo liyayizamazamisa inkangala; uThixo uyayizamazamisa iNkangala yaseKhadeshi. 
Ilizwi likaThixo liyayitshila imikusu likhwebule izihlahla amagusu asale eze. Njalo ethempelini lakhe bonke bazamemeza bathi, “Inkazimulo!” 
UThixo uhlezi ebukhosini phezu kwesikhukhula; uThixo unguMbusi lanininini. 
UThixo unika amandla ebantwini bakhe; uThixo ubusisa abantu bakhe ngokuthula.