AmaHubo.
132.
Ingoma yemiqanso. Oh Thixo, khumbula uDavida ngezinhlupheko zonke azibhenselayo. 
Wafunga isifungo kuThixo wenza isithembiso kuMninimandla kaJakhobe: 
“Angizukungena endlini yami loba ngiye embhedeni wami, 
angiyikuwavumela amehlo ami ubuthongo, akukuba lakuwozela enkopheni zami, 
ngize ngifumane indawo kaThixo, indawo yokuhlala uMninimandla kaJakhobe.” 
Sakuzwa lokhu e-Efrathi, sakubona emangweni waseJayari: 
“Kasiye lapho ahlala khona; kasikhonze phansi kwesihlalo sakhe. 
Phakama, Oh Thixo, ubuye endaweni yakho yokuphumula, wena umtshokotsho wesivumelwano elitshengisa amandla akho. 
Sengathi abaphristi bakho bangembeswa ngokulunga; sengathi labathembekileyo bakho bangahlabelela ngentokozo.” 
Ngenxa yenceku yakho uDavida, ungamfulatheli ogcotshiweyo wakho. 
UThixo wenza isifungo kuDavida, isifungo esiqinileyo angakusaphula wathi: “Omunye wezizukulwane zakho ngizambeka esihlalweni sakho sobukhosi 
aluba amadodana akho egcina isivumelwano sami lezimiso engibafundisa zona, lapho-ke amadodana abo azahlala esihlalweni sakho sobukhosi kuze kube nini lanini.” 
Ngoba uThixo uyikhethile iZiyoni, uyithandile ukuba yindawo yakhe yokuhlala: 
“Le yindawo yami yokuphumula lanini; lapha ngizahlala ngisebukhosini, ngoba ngiyithandile 
ngizayibusisa ngokudla okunengi; abayanga bayo ngizabasuthisa ngokudla. 
Ngizavunulisa abaphristi bayo ngensindiso, labathembekileyo bakhe bazahlabelela ngentokozo nini lanini. 
Lapha ngizakhulisa uphondo lukaDavida ngilungisele ogcotshiweyo wami isibane. 
Ngizakwembathisa izitha ngehlazo, kodwa umqhele osekhanda lakhe uzakhazimula.”