7
Puurrpa Purlkalu Yatjuranya Witurnu Tjurutjamalakutu Yankutjaku
1-5 Nyangka-ya nyinarra kurli pirni pungkula warnirranytja. Nyangka wati yini Yatjuranya nyinarranytja Papulanta. Tjiinya kutjulpirtu palunyaku tjamupirti marlangkatja-marlangkatja pirninya pakara-wanara-ya watirringkula tjurrtju purlkanyangka Tjurutjamala waarkarringkupayi.
6-10 Nyangka Yatjuralu Mama Kuurrku wangka kutjulpirtu walkatjunu wantitjanya tirtu nyakula watjalpayi. Palunyalu wangka palunyanya rawalu kulilpayi. Palunyalu yarnangu pirningkartu parrawatjalpayi. Nyangka Mama Kuurrtu-lu walykumunura kanyiranytja. Nyangka Yatjuralu tjapirnu puurrpa purlkanyalu witultjaku-lu Tjurutjamalakutu. Nyangka Mama Kuurrtu-lu puurrpa palunyanya wuyurrmanu. Nyangka mularrpartu witurnu. Nyangka-ya wati pirni pitjangu Yatjurala lurrtjurringu tjiinya tjurrtju purlkanyangka waarkarrikitja.
Nyangka-ya ngurra Papulannga wantirra pakara kutipitjangu. Pitjalayirnu-ya kirnara kutjarra-kutjarranguru parrapitjangu Tjurutjamalakutu.
11 Nyangka tjiinya puurrpa purlkanyalu lata walkatjuralpi Yatjuraku nintirnu ngurra palunyakutu katitjaku.
12 Yuwa Yatjura, ngayulu-rna puurrpa purlkalu lata ngaanya walkatjura. 13 Yuwa, tjinguru-ya Yitjurayilku tjamupirti mukurringkula nyuntulawana lurrtjurringkula Tjurutjamalakutu yankukitja. Yuwa, palya-ya yanku. 14 Nyangka-yan mapitjaku Tjurutjamala tjarrparralpi nyaku, “Mama Kuurrku wangka-munta-ya tjukarurrulu kulira palyara?”
15-16 Yuwa, ngayulu puru ngayuku yamatji pirnilutarrartu-latju kawurlpa puru tjilpa pirni nintirnu nyuntulun makatirra Mama Kuurrku nintiltjaku. 17 Tjiinya-yan tjimarri palunyangka puluka pirni puru tjiipu pirni payipungku. Palunyalu-yan pungkulalpi tililku tjunku Mama Kuurrku nintilku.
21-23 Yuwa Yatjura, nyuntunyan puurrpa yilkaringkatjaku wangkaku ninti purlkanya nyinarra. Tjingurun wati nyarra tjimarri-ya kanyilpayinya-tjananyan tjapilku. Nyangkanta-ya kutjupa-kutjupa nintilku. Nyangkan puurrpa yilkaringkatjaku nintilku tjiinya-tju ngayuku mirrparnarritjakutarrartu.
25 Yuwa Yatjura, nyuntulun wati pirni tjunku yarnangu nyarra Tjurutjamalawana-ya nyinarranytjanya-tjananya tjurrkurlmara kanyiratjaku. Nyangka-yan Mama Kuurrku wangka nintipungama yarnangu ngurrpa pirningka.
Yatjuralu Mama Kuurrnga Marninypungkulanytja
27-28 Nyangka Yatjuranya pukurlarringu tjiinyamarntu puurrpa palunyalu-ra lata nintinnyangka. Palunyalu watjarnu, “Yuwa, Mama Kuurrnga walykumunu mularrpa. Palunyalu puurrpa purlkanya wuyurrmanu, nyangka-rni yirringkanu. Yuwa, raparringu-rna Mama Kuurrtu-rni kanyiranyangka. Palunyalu-rna yarnangu pirninya yarltingu. Nyangka-rniya lurrtjurringu Tjurutjamalakutu yankukitja.”