Yatjayaku.
40.
Mama Kuurrnga tjiinya pupakatirra-lan marninypungkupayilu watjarnu, “Ngayuku-tju katja yurntalpirti-tjananya watjala pukurlmarra. 
Walykumunulu-tjananya watjala yarnangu nyarra Tjurutjamala nyinapayi. Ngaapirinypa-tjananya watjala, ‘Nyuntulu-yan palyamunu palyaranytja. Nyangka-tjananyarnanta ngaparrtjika pika purlkanya yutirayirnu wiyarringu. Palunyalu kuwarrinya-tjanamparnanku kalyparringkulalpi nyinarra.’” 
Tjiinya kutjupalu mirrarra watjara, “Mayu-mayuwana-ya yiwarra tamarlmarra wanti Puurrku. Yiwarra tjukarurru-ya palyala wanti Mama Kuurrku. 
Parna yapu wararrangkatja-ya tjutira-wanala lawuwanalu wanti. Nyangkayi tjukarurru ngarama. Parna-ya tjutira-wanala kakal-kakalwanalu wanti. Nyangkayi tjukarurru ngarama. 
Nyangka Mama Kuurrku tili purlkanya yartakarriku. Nyangka-ya yarnangu pirnilu nyaku. Tjiinya Mama Kuurrtu watjarnu wantingu.” 
Yuwa, kutjupalu-rni watjarnu tjukurrpa-rna watjaltjaku. Nyangka-rna tjapirnu, “Nyaapirinypa-rna watjalku?” Nyangka-rni watjarnu ngaapirinypa watjaltjaku, “Yarnangu pirninya-lan yukiripirinypa. Tjiinyakurlu yukiri ngara rawamaalpartu pikirriwa, palunyapirinypa. Nyangka-lan puru yirnuntjipirinypartu nyinarra. Tjiinyakurlu walykumunu ngaralalpi punkala wiyarriwa, palunyapirinypa. 
Tjiinya Mama Kuurrtu watjannyangka yukiri pikirriku puru yirnuntji punkalku wiyarriku. Nyangka-lan palunyapirinypa nyinarra wiyarringama. 
Yuwa, yukiri ngaraku pikirriku. Nyangka yirnuntji punkalku wiyarriku. Nyangka Mama Kuurrku wangka tirtu ngaraku ngarama.” 
Yarnangu Tjurutjamanyamartatji pirni, tjukurrpa walykumunu-ya mirrarra watjanma. Purlingka-ya tatiralpi mirrarra watjanma. Ngurlumaaltu-ya rapalu mirrarra watjanma, “Mama Kuurrnga pitjalayirni.” Nyangka-yayi yarnangu ngurra pirningkatjalu kulila, ngurra nyarra Tjuutalawana nyinarranytjalu. 
Nyawa-ya. Mama Kuurrnga Puurrpa Purlkanya pitjalayirni. Palunyalu-lanyanta puurrarringkulalpi kanyinma. Palunyalu-lampa kutjupa-kutjupa walykumunu nintilku katja yurntalpirtiku. 
Yuwa, Mama Kuurrtu-lanyanta katja yurntalpirti tjiipupirinypa miranykanyira katirrayinma. Tjiinyakurlu tjiipu warlangu kurlunypa yampura katirrayinma. Palunyalu-tjananya tjiipu ngunytju kurlunytjarra purinytju walara parrakatirrayinma. Palunyapirinypa-lanya walara parrakatirrayinma. 
Yitjurayilku tjamupirti-yan tirtu watjalpayi, “Wiya, yarnangu kutjupalu-lanyantaya kurraranyangka Mama Kuurrtu-lanyanta kulira wantipayi.” 
Ngurrpa-munta-yan? Kulintjamaalpa-munta-yan? Tjiinya Mama Kuurrnga kutjulpirtu nyinarranytja. Palunyalu tirtu nyinaku nyinama. Kutju-palunyalu parna yilkari palyarnu. Palunyalu talypurringkulanytjamunu puru nyuurrukatirranytjamunu. Yuwa, yarnangu pirnilu-lan purtu kulilpayi tjiinya Mama Kuurrtu nintipukalu kuliranyangka. 
Nyangka-tjinguru-rna patalyarringkulalpi talypurriku. Nyangka-rni Mama Kuurrtu walykumunulku. 
Tjiinya-ya yangupalatarrartu patalyarringkulalpi punkalkutarrartu. 
Nyangka-ya Mama Kuurrnga mularrkuliranytjalu patalyarrinytjatjanu walykumunurriku. Palunyalu-ya patalymaalpa tirtu parrapitjalayinma. Tjiinyakurlu-ya warlawurru patalymaalpa yilkaringka tirtu parrapitjalayinma. Palunyapirinypa-ya Mama Kuurrnga mularrkuliranytjalu talypumaalpa kukurrpa parrapitjalayinma. Puru-ya patalymaalpa tirtu parrawirrtjarayinma.