Yatjayaku.
43.
Mama Kuurrtu-tjananya Yitjurayilku tjamupirti watjarnu, “Kulila-rniya. Ngayulu-tjananyarnanta lurrtjurnu ngayuku katja yurntalpirti-yan nyinarratjaku. Nyangka-ya ngurlumaalpa nyinama. Ngayulu-tjananyarnanta wankarura kanyinma. Tjiinya ngayulu-tjananyarnanta ngurrkarntaralpi yini tjapirnu. Nyangka-tjuyan ngayuku nyinarra. 
Tjinguru-yan tjarrparra mapitjaku kapi warnanpa purlkanya kukurrmaranyangka. Nyangka-tjananyarnanta ngayulu yirringkara kanyinma. Nyangka-yan kapingka tjarrparra mirrirrikitjamunu. Puru-yan warungka tjarrparra mapitjanyangka kampakitjamunu-tjananyanta.” 
Kutjulpirtu Mama Kuurrtu yiwarra palyarnu wantingu kapi purlkanyawana-ya mapitjatjaku. 
Palunyalu-tjananya warrmarla pirni wuyurrmanu kapiwanalu-ya wanaltjaku. Nyangka-ya purni kaarrtjarra tjarrpangu punkarnu mirrirringu. Pirninyartu-ya tjarrparralpi palunya wiyarringu. 
Nyangka Mama Kuurrtu watjarnu, “Tirtu-kurlu-yan kulinma nyarra kutjulpirtu ngarangu. Wanti-ya. 
Nyangama-ya. Ngayulu-tjananyarnanta kuwarri-kuwarri kutjupa-kutjupa nintitjunku. Yuwa, wiyangkalpi ngarala. Nyakula-munta-yan? Ngayulu-tjanamparnanku yiwarra mayu-mayuwanalu palyara. Puru-tjanamparnanku kapi pirni yartakanku. 
Nyangka-rniya ngupanulu, karlayalutarrartu marninypungama. Tjiinyamarntu kapi warla purlkanya pilawana kukurrmanama ngayuku katja yurntalpirtilu-ya tjikiltjaku. 
Ngayulu-tjananyarna lurrtjurnu ngayuku katja yurntalpirti-ya nyinarratjaku. Tjiinya-rniyayi yinkarra marninypungama.”