Yatjayaku.
61.
Nyangka Mama Kuurrku waarka palyalpayilu watjarnu, “Tjiinya Mama Kuurrtu-rni ngurrkarntaralpi palunyaku Kuurti Walykumununya tjarrpatjunu. Palunyalu-rni witurnu, ‘Mapitja tjukurrpa walykumunu watjanma ngarltutjarra pirningka. Palunyalu pukurlmara kanyinma nyarra-ya tjuni kartalypa nyinarranytjanya. Puru-tjananya ngurra kutjupangka watjil-watjilpa nyinarranytjanya watjala tjiinya puurrtu-tjananya ngurraku witultjaku. Palunyalu-tjananya tjayilpangka nyinarranytjanya watjala tjiinya-rna Mama Kuurrtu-tjananya pakaltjingalku.’ 
Tjiinya-rni witurnu ngaapirinypa-rna watjaltjaku, ‘Kuwarrinya ngamurringu Mama Kuurrtu-lanya ngarltunytjulu wankarura kanyiratjaku, puru yanyan-yanyanpa nyinapayinya-tjananya ngaparrtjika pungkutjaku.’ Yuwa, Mama Kuurrtu-rni witurnu pukurlmara-tjananya kanyiratjaku nyarra tjirturu-tjirturu-ya nyinarranytjanya. 
Nyangka-tjananyarna walykumunura kanyinma nyarra Tjurutjamala tjuni kartalypa-ya nyinarranytjanya. Nyangka-yayi pukurlpa nyinama. Yulatjanu-yulatjanulu-yayi turlku yinkarra Mama Kuurrnga marninypungama. Tjiinya-yayi warta witu-witupirinypa nyinama, tjiinya Mama Kuurrtu murrutjunu wantitjanya. Nyangka-yayi tjukarurrulu palyanma. Nyangka-ya yarnangu pirnilu nyakulalpi Mama Kuurrnga marninypungama. 
Palunyangka-ya yiwarla purlkanya pirninya marlakulu palyalku, nyarra kutjulpirtu-ya yurntura punkatjingarayirnu wantitjanya.” Yuwa, palunya.