Kugbɔnku kùa bi kɛle' ki de'
Ebrembɛ
nnɔ
Nà wɔngeh kugbɔnku kuu te ma bo
Wà kɛle' kugbɔnku kuu nnɔ ŋa kɛle' uʼyel kuʼni niba saan, nɛ nil mɔ ŋa cinbe ki bɛn u kɛle' kù ki de' bidɛnb bà. Ama wà kɛle' kù nnɔ bɛn Kujɔtiekpaaku ya gbɔnku ya gbɛr mɔnmɔnm.
U kɛle' ki de' bà nnɔ lii yé Sufmbɛ nɛ, ki pɛ Kristo ya sɛn bo. Biʼgbɛnɛnt cin' ki ŋɛndeh, ba ji se usɛn nnɔ ni mɔnmɔnm. Nɛn nɛ cère' wà kɛle' kù nnɔ tùɔre' ki tɔke' bɛ bi kpiɛ' ki cii' miwɔknm mà nnɔ.
Kristo bo nɛ Uwien nin binib liɛbe' ki taan' buñɔbu (1:1-2:18). Wɔn bo nɛ bà teke' ki jin' li fre kí nɛkn Uwien kí lɛ limiɛl (3:1-5:10).
Bitɔtuɔrciɛnb ya ciɛn baba nɛ là ŋmɔbe usɛn wɔ ń kɔ Uwien ya ninbonl ya dubenku bó, kí tien lituɔrl binib ya biɛre bo. Kristo baba nɛ yé bitɔtuɔciɛnb ya ciɛn wà ŋa ŋmɔbe tɔ, ki kɔn' ki càare' Uwien ya ninbonl là te paaki nnɔ.
Bitɔtuɔrkaab là te ligol nɛ, ki tuu ki taah tiwɛnt ki tùɔreh ki lereh. Kristo wɔn taa' uʼba nɛ ki tien' lituɔrl miba kpein ki dɛ' unil kɛ ki wiɛ', ki pɛkre' usɛnfaan ki de' uʼyaab.
Wà kɛle' kugbɔnku kuu nnɔ saakreh u kɛle' ki de' bà nnɔ ya gbɛnɛnt nɛ, ki sureh bɛ, bɛ ń tɛkn bà là te uyo bo, ki teke' Uwien ki jin' nnɔ ya taal ni (11:1-12:13). U liɛbe' ki wɔngeh Kristo yaab li fuobe ma bo Uwien ya nun bó nɛ (12:14-13:1-25).
1
Uwien cère' uʼBijɛ nɛ len' nin tɛ
1 Uyo bo Uwien là ñɛn' isɛn yà yɛbe nɛ ki cère' uʼñɔbonsɔknb len' nin tiʼyaajɛb nà luo' bolm miŋɛ. 2 Ama idɛnfɔrkɛ yiɛ nɔ, u ji cère' uʼBijɛ nɛ len' nin tɛ. U cère' wɔn nɛ ñɛn' nà kɛ te, ki gɛ̀nde' wɔ ki tien' tibont kɛ ya daan. 3 UʼBijɛ bugbɛn nɛ yé uʼkpiɛke ya wenwenku, ki naan nin wɔ ki tì gben', ki cère' uʼgbɛr ya tuɔm co tibont kɛ tù se tuʼbùol, ki sɔkre' ki ñɛn' binib ya biɛre ki gben', nɛ ki don' paaki bó ki tì kɛ̀le' Uwien uyɛbm kɛ ya daan ya jie bó.
Uwien ya Bijɛ cɛn' Uwien ya tondb
4 Uwien ya Bijɛ cɛn' Uwien ya tondb. Nɛn bo nɛ Uwien yin' wɔ liyel là ŋmɔbe lisel ki cɛn' biʼyɛ. 5 Uwien kpele ki tɔke' u lɛ tond ba ki ye:
«Sin nɛ yé nʼBijɛ,
dinnɔ nɛ n wuɔn' ki ye n yé aʼBaa?»
Bii u tí kpele ki tɔke' u lɛ ba ki ye:
«Min li yé uʼBaa,
nɛ wɔ ń li yé nʼBijɛ?»
6 Ama uyo wà Uwien yíe uʼBijɛ wà yé kibukpiɛk nnɔ ń baa uŋɛndun ni nnɔ, u len' ki ye: «Uʼtondb kɛ ń gbaan kí puke uʼBijɛ.»
7 Uwien len' uʼtondb bɛn bo ki ye:
«U cèreh bi te tɛn mitafaam nɛ,
ki liɛbe' ki cèreh bi te tɛn umupien.»
8 Ama u len' uʼBijɛ wɔn bo ki ye:
«Uwien, a yé ubɛr nɛ ki kɛ aʼbɛrbiɛk bo,
nɛ aʼbɛl ŋa ŋmɔbe gbenm.
A likeh aʼnib nin mitetem mà cuube nɛ.
9 A yíe nà cuube nɛ ki nɛn nà bre.
Nɛn bo nɛ sin wà yé Uwien nnɔ,
aʼWien wule' aʼyul bo mikpɔm,
ki wuɔn' ki ye u gɛ̀nde' ŋɛ,
ki cère' aʼyɛnm sɔnge,
ki de' ŋɛ lisel ki cɛn' aʼtɔb kɛ.»
10 Uwien tí len' ki ye:
«Micincinm, sin Yonbdaan nɛ ñɛn' kitink,
nɛ kutaaku mɔ yé aʼnuɔ ya tuonl nɛ.
11 Nɛn kɛ li gben,
ama sin li tuu ki te nɛ,
nɛn kɛ li cɛre tɛn tikpɛlcɛr nɛ.
12 A li gongonde nɛn kɛ tɛn lilierl nɛ.
Imɔ̀n, a li lèbre tù tɛn bi lèbreh liliɛrl ma bo nɛ,
ama sin ŋa ń lèbre, a li tuu ki fuobe nɛ.»
13 Uwien kpele ki tɔke' u lɛ tond ba ki ye:
«Kɛ̀le nʼnɔjie bó,
kí tì baa uyo wà n li cère á tɛ aʼnɛnnɛndb bo litaal-i?»
14 Uwien ya tondb bɛn wɔn, biʼkɛ yé uʼtonsɔnb nɛ, nisaal ŋa ń fre kí lɛ bɛ nin nunbu. U sɔnh bɛn nɛ bi lá toreh binib bà u li ŋmiɛn bɛ nnɔ.